Saludsod
Siasino ni Jesu-Cristo?
Sungbat
Saan nga kasla iti saludsod nga, “Adda aya iti Dios,?” sumagmamano laeng nga tao ti agsalsaludsod iti “Siasino ni Jesu-Cristo?” agsipud ta nganngani amin a tao ket bigbigenda nga ni Jesus ket pundo a tao nga nagbiag ken nagnaed idiay Israel dua a ribo (2,000) a tawen iti napalabas. Mangrugi ti panagsusupiat no ti pagsasaritaan ket maipanggep iti katatao ni Jesus. Nganngani amin a relihiyon ket mangisursuro nga ni Jesus ket maysa nga propeta, nalaing nga manursuro, wenno tao nga maka-Dios. Ngem ti Nasantoan a Kasuratan ket iparparangarangna nga ni Jesus ket nangatngato ngem iti propeta, nasayaat a manursuro, wenno tao a maka-Dios.
Iti libro na nga “Mere Christianity,” insurat ni C.S.Lewis ti kastoy: “Pinadasko nga lappedan ti siasinoman nga mangibagbaga iti kinamaag maipapan kenni Jesu-Cristo: ‘Nakasaganaak nga aklunen nga ni Jesus ket maysa a natan-ok a manursuro, ngem saanko nga aklunen ti pannangipakaammona ti bagina nga Isu ket Dios. ‘Dayta ti maysa a banag nga saantayo a rebbeng nga ibaga. Ti maysa a kadawyan a tao nga agtagicua a kas ti pinarangarang ni Jesus ket uray katnoman ket saan nga abalin a nalaing a Manursuro. Mabalin nga isu ket agmauyong- kapada iti panagkuna nga Isu ket kasla saan unay nga naluto nga itlog- no saan met Isu ket maysa a diablo iti impiyerno. Kasapulam ti pumili- Mabalin nga daytoy a tao ket Anak iti Dios, Wenno maysa nga agmauyong wenno nakarkaro…Ibagam nga Isu ket nakuneng, tupraam Isuna ken patayem wenno agrukbabka iti sangona ket awagam Isuna nga Apo ken Dios. Ngem saantayo nga palabasen ti awan pategna a panangbigbig kenni Jesus a maysa nga nalaing nga manursuro laeng. Ti panagpili no kasano ti panangbigbigtayo kenni Jesus babaen iti panagkitatayo ket maysa a banag nga saanna a pinalubosan. Saan a dayta ti panggepna.”
No kasta ngarud, siasino ni Jesu-Cristo babaen iti pannangipakaammona iti bagina? Siasino Isuna babaen iti kinuna ti Nasantoan a Kasuratan? Umuna, kitaentayo ti kinuna ni Jesus idiay Juan 10:30, “Siak ken ti Ama,maymaysakami”. Iti biglaan nga panagkita, kasla saan nga deritso nga inaklon na nga Isu ket Dios. Ngem sukimatentayo ti reaksiyon dagiti Judio, “Saandaka nga uboren gapu kadagiti naimbag nga aramid, no di ket gapu iti saom a maikontra iti Dios” (Juan 10:33). Iti sangoanan dagiti Judio, awan panagduadua nga inaklon ni Jesus nga Isu ket Dios. Iti simmaruno nga versikulo, saan nga inlinteg ni Jesu-Cristo dagiti Judio iti pannakaawatda ket kinunana, ”Saan ko nga aklonen nga Siak ket Dios.” Pinaneknekan daytoy nga versiculo nga pudno a ni Jesu-Cristo ket Dios idi kinuna na nga “Siak ken ti Ama, maymaysakami” (Juan 10:30). Ti Juan 8:58 ket maysa nga pammaneknek nga ni Jesu-Cristo ket Dios. Kinuna ni Jesus, “Ibagak ti pudno kadakayo: Sakbay nga nayanak ni Abraham, addaakon!” (Juan 8:58). Nagpidut dagiti tattao kadagiti bato a panguborda kenni Jesus. Ti pannangipakaammo ni Jesus iti bagina a kas “Siak ti Siak,” ket kalintegan nga panangusar ti nagan ti Dios iti Daan a Tulag (Exodo 3:14). Apay nga kasapulan nga uboren dagiti Judio ni Jesu-Cristo, no awan ti kinunana nga iti pammati da ket panangtabbaaw iti kanaganan ti kangatoan a Dios?
Daytoy ti kunkuna idiay Juan 1:1: “Ket ti Sao, Dios.” Ken iti Juan 1:14 ket daytoy met ti kunkunana, “Nagbalin a Tao ti Sao.” Daytoy ket nalawag nga ni Jesus ket Dios nga nagbalin a lasag. Ti adalan nga ni Tomas ket nagkuna maipapan ken Jesus ti kastoy, “Apok ken Diosko!” (Juan 20:28). Saan nga nagbiddut ni Tomas agsipud ta saan nga inlinteg ni Jesus ti imbagana. Kastoy met ti pannangimustra ni Pablo nga adalan kenni Apo Jesus, “inton agparang ti dayag ni Jesu-Cristo a naindaklan a Dios ken Mangisalakan kadatayo…” (Tito 2:13). Kastoy met ti imbaga ni Pedro nga adalan,”…ti Dios ken ni Jesu-Cristo a Mangisalakan kadatayo” (2 Pedro 1:1). Pinaneknekan ti Dios Ama nga ni Jesu-Cristo ket Dios, “Mataginayon nga awan ingganati pagariam, O Dios. Iturayam dagiti tattaom babaen iti hustisia” (Dagiti Salmo 45:6). Impakaammo dagiti Propeta babaen kadagiti padto iti Daan a Tulag a ni Jesus ket Dios, “Naipasngay kadatayo ti maysa nga ubing, Adda ubing a lalaki a naited kadatayo, Ket isunto ti mangituray kadatayo. Maawaganto iti, Nakaskasdaw a Mammagbaga, Mannakabalin a Dios, Agnanayon nga Ama, Prinsipe ti Kappia” (Isaias 9:6).
Gapuna nga ti pannangikalintegan ni C.S.Lewis, Ti panamati kenni Jesus a kas nasayaat nga manursuro laeng ket maysa a banag nga saan a rumbeng nga baybay-an. Nalawag a saan nga nagsarimadeng ni Jesu-Cristo nga inaklonna nga Isu ket Dios. No saan nga Dios Isuna, Isu ket ulbod, saan a Propeta, saan a nasayaat a manursuro, nangnangruna nga saan a maka-Dios. Iti tarigagayda nga iyadayo dagiti tao iti kinapundo maipapan iti pannangipakaammo ni Jesus iti bagina, isursuro iti kabarwan “iskolar” nga ti “pudno a Jesus iti pakasaritaan dagiti pasamak” ket saan nga inaklon dagiti adu a padto ken pannangipakaammo iti Nasantoan a Kasuratan maipanggep iti kababalinna kas maysa nga Dios. Anya ti karbengantayo a mangkalintegan maipapan kadagiti sao nga impakaammo ni Jesus, ken dagiti sao nga saanna nga imbaga ngem nakasurat kano? Kasano nga mapasamak nga dagiti kabarwan nga “iskolar” nga nganngani dua a ribo nga tawen ti baetna iti panawen ni Jesus ket maaddaan iti adadu nga ammo ngem kadagiti adalanna nga kanayon a kaduana nga nagserbi kenkuana? (Juan 14:26).
Apay a nagpateg ti saludsud maipapan iti pudno a kinasiasino ni Jesu-Cristo? Apay a napateg nga maammoan no siasino ti pudno a Dios wenno saan? Iti kadakkelan a gapu no apay nga kaspulan nga awaten nga ni Jesus ket Dios agsipudta, no Isu ket kadawyan a tao laeng, iti pannakatayna ket saan nga umdas a pangbayad tapno subbotenna amin a basol dagiti tattao (1 Juan 2:2). Ti laeng Dios ti adda kabaelanna a bayadan ken isalakan ti tao iti awan patinggana a dusa iti basol (Roma 5:8; 2 Corinto 5:21). Masapul a Dios ni Jesus tapno maananay ti bayad dagiti basbasoltayo. Kasapulan met a tao ni Jesus tapno sagabaenna ti ipapatay nga bayad dagiti basol (Roma 6:23). Ti pannakaisalakan ket malak-am tayo no laeng mamati ken agtalektayo kenni Jesu-cristo! Ti panamati iti kina-Dios ni Jesu-Cristo ti laeng dalan a agturong iti pannakaisalakan.
Ti kina-Dios ni Jesus ti gapu no apay a napnoan ti kinapudno nga impakaammo, “Siak ti dalan, ken ti pudno, ken ti biag; awan ti makapan iti Ama no di magna kaniak” (Juan 14:6).
English
Siasino ni Jesu-Cristo?
