No naisalakanen, agnanayonen a naisalakan?



Saludsod: No naisalakanen, agnanayonen a naisalakan?

Sungbat:
No naisalakanen, agnanayonen a naisalakan? Iti kanito a naam-ammo dagiti tattao ni Cristo kas Mangisalakanda, naaddaanda iti relasion iti Dios a mangpasingked iti agnanayon a kinatalged ti pannakaisalakanda. Adu a bersikulo iti Nasantoan a Surat ti mangibaga iti daytoy a kinapudno.

(a) Ibaga ti Roma 8:30, "Iti kasta, inayaban ti Dios dagiti pinilina. Saanna la nga inayaban ida, no di ket pinagbalinna pay ida a nalinteg. Saanna la a pinagbalin ida a nalinteg, no di ket imbingayanna pay ida iti gloriana." Ibaga daytoy a bersikulo a sipud pay iti kanito a panangpili ti Dios kadatayo, kaslatayon naigloria iti presensiana idiay langit. Awan ti aniaman a makalapped iti pannakaigloria ti maysa a namati agsipudta pinanggepen daytoy ti Dios idiay langit. No napalintegen ti maysa a tao, natalged metten ti pannakaisalakanna - natalged isuna a kasla naiglorian idiay langit.

(b) Sinaludsod ni Pablo ti dua a napapateg a saludsod idiay Roma 8:33-34 "Siasinonto ti mangidarum kadagiti pinili ti Dios? Ti mismo a Dios, ibilangna ida nga awan basolda! Siasino ngarud ti makabalin a mangsentensia kadakuada? Ni Cristo Jesus kadi nga adda iti makannawan ti Dios? Saan! Ta saan la a natay no di ket isu pay ti mangibabaet kadatayo." Siasinonto ti mangidarum kadagiti pinili ti Dios? Awanto, agsipud ta ni Cristo ti mangibabaet kadatayo. Siasinonto ti mangsentensia kadatayo? Awanto, agsipud ta ni Cristo a natay para kadatayo ti nasentensiaan. Agpada nga adda kadatayo ti mangibabaet ken ukom kas Mangisalakan.

(c) Nayanak manen (nabalbaliwan) dagiti namati idi namatida (Juan 3:3; Tito 3:5). Tapno mapukaw ti maysa a Kristiano ti pannakaisalakanna, masapol a mabaliktad ti pannakabalbaliwna. Awan ti ipaay ti Biblia a pammaneknek a mabalin a mapukaw ti baro a pannakayanak.

(d) Agtataeng ti Espiritu Santo kadagiti amin a namati (Juan 14:17; Roma 8:9) ken ibautisarna amin ida iti Bagi ni Cristo (1 Corinto 12:13). Tapno mapukaw ti maysa a namati ti pannakaisalakanna, masapul a "saan a pagtaengan" daytoy ti Espiritu Santo ken maisina iti Bagi ni Cristo.

(e) Ibaga ti Juan 3:15 a "maaddaanto iti agnanayon a biag" ti siasino man a mamati ken ni Jesu-Cristo. No mamatika ken ni Cristo iti daytoy nga aldaw ken maaddaanka iti agnanayon a biag, ngem mapukawmo daytoy no bigat, saan pulos ngarud nga "agnanayon" daytoy. Ket no mapukawmo ti pannakaisalakanmo, kamali ngarud dagiti kari ti Biblia nga agnanayon a biag.

(f) Para iti kauddian nga argumento, iti panagkunak, ti Nasantoan a Surat a mismo ti kasayaatan a mangibaga iti daytoy, "Awan duaduak nga awan ti makaisina kadatayo iti ayatna: ti patay man wenno ti biag, dagiti angheles man wenno dagiti sabali a nailangitan nga agturay wenno pannakabalin, ti agdama man wenno ti masakbayan, ti kangatoan a law-ang man wenno ti kaunggan ti daga. Awan a pulos iti sangaparsuaan ti makaisina kadatayo iti ayat ti Dios a kukuatayo gapu ken ni Cristo Jesus nga Apotayo" (Roma 8:38-39). Laglagipem a ti Dios a nangisalakan kenka ket isu met laeng ti Dios a mangsaluad kenka. No naisalakantayon, agnanayonen a naisalakantayo. Sigurado ken agnanayon a natalged ti pannakaisalakantayo!



Agsubli iti kasangoan a panid ti Ilocano



No naisalakanen, agnanayonen a naisalakan?