Saludsod
Apay ta saanak nga agpakamatay?
Sungbat
Maseknan ti pusomi kadagiti agpangpanggep a manggibus iti biagna babaen iti panagpakamatay. No sika dayta, mabalin a gapu iti adu a rikna, kas iti kinaawan iti namnama ken pannakaupay. Mabalin nga iti panagriknam, adda ka iti nauneg unay nga abut ket awanen ti namnamam a sumayaat pay dagiti bambanag. Kasla awan ti maseknan wenno makaawat iti pagdaldalanam. Kasla awanen pateg ti panagbiag wenno adda pay kadi aya?
No palubosam laeng koma ti Dios iti sumagmamano a kanito nga agbalin a pudpudno a Dios dita biagmo, paneknekanna kenka no kasano ti kadakkelna, “Ta awan ti saan a kabaelan ti Dios nga aramiden” (Lucas 1:37). Mabalin a naut-ot dagiti napalabas a sugsugat ket nakaipaay daytoy iti rikna a pannakailaksid wenno pannakabaybay-a. Mabalin nga agbunga dayta iti panangay-ay iti bagi, pungtot, kinapait, panunot a panagibales, wenno saan a nasayaat a panagbuteng, banag a nakaited iti problema kadagiti dadduma a kapapategan a relasionmo.
Apay ta saanka nga agpakamatay? Gayyem, uray kasano kaalas dagiti bambanag dita biagmo, adda naayat a Dios nga agur-uray iti pammalubosmo tapno idalannaka manipud dita abut ti pannakaupaymo nga agturong iti nakaskasdaaw a lawag. Isuna ti namnamam. Ti naganna ket Jesus.
Maawatan ni Jesus, ti awan basolna nga Anak ti Dios, ti pagdaldalanam a pannakailaksid ken pannakaibabain. Insurat ni profeta Isaias ti maipapan Kenkuana idiay Isaias 53:2-6. Inladawanna Isuna kas tao nga “inuy-uyaw ken saan a naawat” ti tunggal maysa. Napunno iti ladingit ken panagsagaba ti biagna. Ngem saanna a bukbukod ti inawitna a kinaladingit; kukuatayo dagidiay. Naduyok, nasugat, ken nagrigat, gapu amin iti basoltayo. Gapu iti panagsagabana, mabalin a masubbot ken maan-anay ti biagtayo.
Gayyem, inibturan amin daytoy ni Jesu-Cristo tapno mapakawan dagiti amin a basbasolmo. Aniaman kadagsen ti basol a bagbagkatem, ammoem a pakawanennakanto no sipapakumbaba nga awatem Isuna kas Mangisalakanmo. “No umay ti riribuk, awagannak; ispalenkanto...” (Salmo 50:15). Awan ti dakes unay a naaramidmo a saan a mapakawan ni Jesus. Nakaaramid dagiti dadduma a kasasayaatan nga adipenna iti nakakaro a basol kas iti pamapatay (ni Moises), pamapatay ken pannakikamalala (ni Ari David), ken panagabuso a napisikalan ken naemosionalan (ni apostol Pablo). Ngem nakasarakda iti Apo iti pammakawan ken baro a nawadwad a biag. “Maysa a baro a parsua ti siasinoman a mainaig ken ni Cristo. Naglabasen dagiti daan a banag ket dimtengen dagiti baro.” (2 Corinto 5:17).
Apay ta saanka nga agpakamatay? Gayyem, sisasagana ti Dios a mangtarimaan iti “nadadael” a biagmo ken uray dayta agdama a kasasaadmo, dayta biag a kayatmo a gibusan babaen iti panagpakamatay. Insurat ti profeta iti Isaias 61:1-3, “Pinunnonak ni Apo Dios iti espirituna. Pinilinak ket imbaonnak a mangipakaammo iti naimbag a damag kadagiti napanglaw, mangliwliwa kadagiti nalapunos iti ladingit, mangiwaragawag iti pannakaruk-at dagiti napagtalaw, ken ti pannakawayawaya dagiti adda iti pagbaludan. Imbaonnak a mangipakaammo: dimtengen ti tiempo nga isalakan ti Apo dagiti tattaona... Imbaonnak a mangliwliwa kadagiti agladladingit, a mangted iti rag-o ken ragsak a di ket liday kadagiti agdungdung-aw...; mangted iti kanta a pagdaydayaw a saan ket a naladingit a kanta.”
Umasidegka ken Jesus, palubosam a pasublienna ti rag-o ken kinapategmo ken agtalekka Kenkuana a ruggianna ti baro a panagtignay dita biagmo. Inkarina a pasublienna ti kinarag-o a napukawmo ken itedna kenka ti baro nga espiritu a mangtaginayon kenka. Napateg Kenkuana dayta naburburak a pusom: “O Dios, ti napakumbaba nga espiritu ti sakrifisiok kenka; dimonto laksiden ti puso a napakumbaba ken nagbabawi” (Salmo 51:12, 15-17).
Awatem kadi ti Apo kas Mangisalakan ken Pastormo? Idalannanto ti panunot ken addangmo—iti inaldaw—babaen iti Saona, ti Biblia. “Idalanka iti rumbeng a pagnaam; isuroka ken inka balakadan” (Salmo 32:8). “Ikkanna iti talged ti nasion. Kanayon a salaknibanna dagiti tattaona, ket ikkanna ida iti sirib ken ammo. Kapatgan a gamengda ti panagdayawda a sibubuteng iti Apo” (Isaias 33:6). Adda latta met dagiti pakarikutam no addaka ken ni Cristo, ngem maaddaankanton iti namnama. Isuna ti “gayyem a nadekdekket pay ngem ti kakabsat” (Proverbio 18:24). Makikaadda koma kenka ti parabur ni Apo Jesus kas addaka iti tiempo a panagkeddengmo.
No tarigagayam ti agtalek ken ni Jesu-Cristo kas Mangisalakanmo, ibagam iti Dios dagitoy a sao manipud dita pusom: “Apo Dios kasapulanka ditoy pusok. Pakawanennak kadagiti amin nga inaramidko. Agtalekak ken ni Jesu-Cristo ken patiek nga Isuna ti Mangisalakanko. Dalusannak, agasannak, ken pasubliem ti rag-o ditoy biagko. Agyamanak iti panagayatmo kaniak ken iti ipapatay ni Jesus para iti lugarko.”
Nagdesisyon ka kadi para ken Cristo gapu iti nabasam ditoy? No kasta, maidawat a pindutem iti baba ti "Inawat ko ni Cristo ita nga aldaw".
English
Apay ta saanak nga agpakamatay?
