Saludsod
Ania ti mapasamak kalpasan ti ipapatay?
Sungbat
Iti Nakristianoan a pammati, adda adu a pakaallilawan no maipapan iti mapasamak kalpasan ti ipapatay. Ibaga dagiti dadduma a kalpasan ti ipapatay, “maturog” ti tunggal maysa agingga iti maudi a panangukom ken kalpasanna, isunto ti kanito a pannakayapanda idiay langit wenno impierno. Patien met dagiti dadduma a dagus a maukom dagiti tattao a matay ken kalpasanna, dagus met a mayapanda iti agnanayon a pagtungpalanda. Patien pay dagiti dadduma a mayapanto ti kararua/espiritu dagiti tattao a matay iti “temporario” a langit wenno impierno tapno urayenda sadiay ti maudi a panagungar, ti maudi a panangukom, ken ti kauddian nga agnanayon a pagtungpalanda. Ania ngarud ti eksakto nga ibaga ti Biblia maipapan iti mapasamak kalpasan ti ipapatay?
Umuna, para kadagiti namati ken ni Jesu-Cristo, ibaga ti Biblia kadatayo a mayapan ti kararua/espirituda idiay langit, agsipud ta napakawanen dagiti basbasolda babaen iti panangawatda ken ni Cristo kas Mangisalakanda (Juan 3:16, 18, 36). Para kadagiti namati, ti ipapatay ket ipapanaw manipud iti bagi ken ititipon iti Apo (2 Corinto 5:6-8; Filipos 1:23).Nupay kasta, iladawan dagiti bersikulo a kas iti 1 Corinto 15:50-54 ken 1 Tesalonica 4:13-17 dagiti namati kas napagungar ken naikkan iti bagi a saan nga agrupsa. No dagus a mapan dagiti namati iti denna ni Cristo kalpasan ti ipapatayda, ania ngarud ti panggep daytoy a panagungar? Kasla kabayatan nga agdiretso a dagus ti kararua/espiritu dagiti namati iti denna ni Cristo kalpasan ti ipapatayda, agtalinaed met a “matmaturog” ti bagida iti tanem. Inton panagungar dagiti namati, mapagungarto ti napisikalan a bagi, maikkan iti bagi a saan nga agrupsa ken maitipon manen iti kararua/espiritu. Agnanayon a tagikuanto dagiti namati daytoy napagtitipon manen ken addaan iti saan nga agrupsa a bagi-kararua-espiritu idiay baro a langlangit ken baro a daga (Paltiing 21-22).
Maikadua, para kadagiti saan a nangawat ken ni Jesu-Cristo kas Mangisalakanna, agnanayon a pannakadusa ti kaipapanan ti ipapatay. Nupay kasta, kas iti pagtungpalan dagiti namati, kasla dagus met laeng a mayapan dagiti saan a namati iti temporario a lugar, tapno urayenda ti maudi a panagungar, panangukom, ken agnanayon a panungpalan. Iladawan ti Lucas 16:22-23 ti maysa a nabaknang a tao a dagus a nagtutuok kalpasan ti ipapatayna. Inladawan ti Paltiing 20:11-15 dagiti amin a natay a saan a namati a napagungar, naukom iti ayan ti dakkel a puray a trono, ken naitappuak iti dan-aw ti apoy. Saan ngarud a dagus a mayapan dagiti saan a namati idiay impierno (ti dan-aw ti apoy) kalpasan ti ipapatayda, ngem mayapanda iti temporario a lugar a pakaukoman ken pakadusaanda. Nupay saan a dagus a mayapan dagiti saan a namati iti dan-aw ti apoy, saan a nasayaat ti dagus a gasatda kalpasan ti ipapatayda. Impukkaw ti nabaknang a tao, “kasta unay ti pannakatutuokko iti daytoy nga apuy” (Lucas 16:24).
Ngarud, kalpasan ti ipapatay, agtalinaed ti tao iti “temporario” a langit wenno impierno. Kalpasan daytoy a temporario a lugar, saanto a mabaliwan ti agnanayon a pagtungpalan ti maysa a tao iti maudi a panagungar. Ti laeng eksakto a “lugar” ti agnanayon a panungpalan ti mabaliwan. Naan-anay a maikkan dagiti namati iti wayawaya a sumrek idiay baro a langlangit ken baro a daga (Paltiing 21:1). Mayapanto met kamauddiananna dagiti saan a namati iti dan-aw ti apoy (Paltiing 20:11-15). Daytoy ti maudi ken agnanayon a panungpalan dagiti amin a tattao—naan-anay a naibasar iti panagtalek wenno saanda a panagtalek ken ni Jesu-Cristo para iti pannakaisalakan (Mateo 25:46; Juan 3:36).
English
Ania ti mapasamak kalpasan ti ipapatay?
