Kasanok a maammoan ti pagayatan ti Dios para iti biagko?



Saludsod: Kasanok a maammoan ti pagayatan ti Dios para iti biagko?

Sungbat:
Napateg a maammoantayo ti pagayatan ti Dios. Imbaga ni Jesus a dagiti makaammo ken mangaramid iti pagayatan ti Ama dagiti pudno a karelasionna: “Ta dagiti agaramid iti pagayatan ti Dios, isuda dagiti kakabsatko ken ti inak” (Marcos 3:35). Iti pangngarig maipapan iti dua nga annak, tinubngar ni Jesus dagiti panguloen a papadi ken panglakayen gapu iti pannakapaayda a mangaramid iti pagayatan ti Ama; kangrunaanna, saanda “latta nagbabawi ken namati Kenkuana” (Mateo 21:32). Kangrunaanna unay, ti pagayatan ti Dios ket ti panagbabawitayo iti basoltayo ken panagtalektayo ken ni Cristo. No saantayo nga inaramid ti umuna nga addang, saantayo pay met ngarud a naawat ti pagayatan ti Dios.

No inawattayon ni Cristo babaen iti pammati, nagbalintayo metten nga annak ti Dios (Juan 1:12), ket tarigagayanna nga iturongnatayo iti dalanna (Salmo 143:10). Saan nga ilemlemmeng ti Dios ti pagayatanna kadatayo; Kayatna nga iparang daytoy. Kinapudnona, inikkannatayon iti adu, adu a pannakaidalan manipud iti Saona. Nasken nga “Agyamankayo iti Dios, dakes man wenno nasayaat ti kasasaad. Daytoy ti kayat ti Dios a panagbiagyo a kas tattao ni Cristo Jesus” (1 Tesalonica 5:18). Agaramidtayo koma kadagiti naiimbag nga aramid (1 Pedro 2:15). Ken “Kayat ti Dios nga agbiagkayo a nasantoan ket adaywanyo ti immoralidad” (1 Tesalonica 4:3).

Mabalin a maammoan ken mapaneknekan ti pagayatan ti Dios. Ibaga ti Roma 12:2, “Saanyo a tultuladen dagiti ugali iti daytoy a lubong ngem palubosanyo a baliwannakayo ti Dios ket pabaroenyo a naan-anay ti panunotyo. Ket maammoanyonto ti pagayatan ti Dios—no ania ti naimbag, makaay-ayo kenkuana ken awan pagkuranganna.” Ipaay daytoy a bersikulo ti maysa a napateg a panagsasaruno: agkedked ti anak ti Dios nga umannamong iti lubong ngem itulokna ti bagina a balbaliwan ti Espiritu. Kas mapabpabaro ti panunotna kadagiti bambanag ti Dios, kalpasanna maammoannanton ti naan-anay a pagayatan ti Dios.

Kas sapsapulentayo ti pagayatan ti Dios, siguradoentayo koma a saan nga iparparit ti Biblia dagiti balaktayo. Kas pangarigan, iparit ti Biblia ti panagtakaw; agsipud ta nalawag ti panangibaga ti Dios iti daytoy a banag, ammotayon a saanna a pagayatan nga agbalintayo a mannanakaw—saanen a kasapulan nga ikararagtayo pay daytoy. Siguradoentayo met koma a ti balbalakentayo ket pakaidaydayawan ti Dios ken makatulong iti naespirituan a panagdakkeltayo ken dagiti dadduma.

Narigat met no maminsan ti panangammo iti pagayatan ti Dios ta kalikagumanna daytoy ti kinaanus. Gagangay a kayattayo a mammaminsan a maammoan dagiti amin a pagayatan ti Dios; ngem saan a kasta ti gagangay a panagtignayna. Ipakitana kadatayo ti saggaysa nga addang—a ti tunggal tignay ket addang ti pammati—ket ipalubosna nga agtultuloytayo nga agtalek Kenkuana. Ti napateg a banag kas agur-uraytayo iti sumaruno a direksion, naalibtaktayo koma a mangaramid iti ammotayon nga aramiden (Santiago 4:17).

Masansan a kayattayo nga ited ti Dios dagiti nalalawag a bilin—sadino ti pagtrabahoan, sadino ti pagnaedan, sinno ti asawaen, ania a lugan ti gatangen, kdp. Palubosannatayo ti Dios nga agpili, ken, no agpasakoptayo Kenkuana, adda dagiti wagasna tapno maliklikantayo dagiti kamali a pangngeddeng (kitaen Aramid 16:6-7).

Kas nasaysayaat ti pannakaam-ammotayo iti maysa a tao, dakdakkel met ti pannakaammotayo kadagiti bambanag a tartarigagayanna. Kas pangarigan, mabalin a tumalyaw ti maysa nga ubing iti dalan iti ayan ti bola a nagtulid sadiay ngem saan a mapan daytoy sadiay agsipud ta ammona a “saan a kayat ni tatangko nga aramidek dayta.” Saannan a kasapulan a saludsoden ti balakad ti amana para kadagitoy a situasion; ammonan no ania ti ibagana agsipud ta am-ammona ti amana. Kasta met laeng ti relasiontayo iti Dios. Kas makipagnatayo iti Apo, agtulnogtayo iti Saona ken agsanggirtayo iti Espirituna, makitatayo nga addan kadatayo ti panunot ni Cristo (1 Corinto 2:16). Am-ammotayo Isuna, ket makatulong dayta iti panangammotayo iti pagayatanna. Makitatayo nga adda a sidadaan ti panangidalan ti Dios. “Ti kinatakneng panam-ayenna ti biag ti nalinteg a tao, ngem matnag ti managdakdakes iti mismo a kinadakesna” (Proverbio 11:5).

No nasinged ti pannakipagnatayo iti Apo ken pudno a tarigagayantayo ti pagayatanna para iti biagtayo, Ikabilto ti Dios dagiti tarigagayna iti pusotayo. Ti tulbek para iti daytoy ket ti panangtarigagay iti pagayatan ti Dios, saan a ti bukodtayo a kaykayat. “Sapulem iti Apo ti pagragsakam, ket itednanto ti tartarigagayam” (Salmo 37:4).



Agsubli iti kasangoan a panid ti Ilocano



Kasanok a maammoan ti pagayatan ti Dios para iti biagko?