Ania dagiti uppat a naespirituan a linteg?



Saludsod: Ania dagiti uppat a naespirituan a linteg?

Sungbat:
Ti Uppat a Naespirituan a Linteg ket wagas iti panangibingay iti naimbag a damag ti pannakaisalakan a sidadaan babaen iti pammati ken ni Jesu-Cristo. Maysa daytoy a nasimple a wagas iti panangurnos iti napateg nga impormasion ti Ebanghelio iti uppat a puntos.

Ti umuna kadagiti Uppat a Naespirituan a Linteg ket, "Ay-ayatennaka ti Dios ken addaan Isuna iti nakaskasdaaw a plano para iti biagmo." Ibaga ti Juan 3:16 kadatayo a "Gapu iti kasta unay a panagayat ti Dios iti lubong, intedna ti Bugbugtong nga Anakna tapno ti siasinoman a mamati kenkuana saan a matay no di ket agbiag nga agnanayon." Ipaay ti Juan 10:10 kadatayo ti rason no apay nga immay ni Jesus, "Immayak tapno maaddaankay iti biag—biag nga awan pagkuranganna." Ania ti manglaplapped kadatayo manipud iti ayat ti Dios? Ania ti manglaplapped kadatayo manipud iti pananggun-od iti biag nga awan pagkuranganna?

Ti maikadua iti Uppat a Naespirituan a Linteg ket, "Namulitan iti basol ti sangkataoan ken naisina manipud iti Dios. Kas supapakna, saantayo a maammoan ti nakaskasdaaw a plano ti Dios para iti biagtayo." Pasingkedan ti Roma 3:23 daytoy nga impormasion, "Nagbasol amin a tattao ket agkurangda iti kinadayag ti Dios." Ited ti Roma 6:23 kadatayo ti supapak ti basol, "Ta patay ti supapak ti basol." Pinarsuanatayo ti Dios tapno makilangen Kenkuana. Nupay kasta, inyeg ti sangkataoan ti basol ditoy lubong, ket ngarud naisina daytoy manipud iti Dios. Dinadaeltayo ti inranta ti Dios kadatayo a relasion Kenkuana. Ania ti pamuspusan?

Ti maikatlo iti Uppat a Naespirituan a Linteg ket, "Ni Jesu-Cristo ti kakaisuna nga impaay ti Dios para iti basoltayo. Babaen ken Cristo, mabalin a mapakawan dagiti basoltayo ken mapasubli ti umno a relasiontayo iti Dios." Ibaga ti Roma 5:8 kadatayo, "Ngem impakita ti Dios ti ayatna kadatayo: Idi managbasoltayo pay laeng, natay ni Cristo gapu kadatayo!" Impakaammo ti 1 Corinto 15:3-4 kadatayo a kasapulantayo ti mangammo ken mamati tapno maisalakantayo, "...a natay ni Cristo gapu kadagiti basoltayo, kas nailanad iti Nasantoan a Surat; a naitanem ket napagungar iti maikatlo nga aldaw, kas nailanad iti Nasantoan a Surat..." Imbaga a mismo ni Jesus iti Juan 14:6 nga Isuna laeng ti dalan iti pannakaisalakan, "Siak ti dalan, ken ti pudno, ken ti biag; awan ti makapan iti Ama no di magna kaniak." Kasanok a maawat daytoy nakaskasdaaw a sagut a pannakaisalakan?

Ti maikapat iti Uppat a Naespirituan a Linteg ket, "Nasken nga ikabiltayo ti pammatitayo ken ni Jesu-Cristo kas Mangisalakan tapno maawattayo ti sagut a pannakaisalakan ken maammoantayo ti nakaskasdaaw a plano ti Dios para iti biagtayo." Inladawan ti Juan 1:12 daytoy para kadatayo, "Ngem adda met dagiti immawat ken namati kenkuana, isut' gapuna nga inikkanna ida iti kalintegan nga agbalin nga annak ti Dios." Nalawag ti panangibaga ti Aramid 16:31, "Mamatika ken ni Apo Jesus ket maisalakankanto." Mabalintayo ti maisalakan babaen laeng iti parabur, babaen laeng iti pammati, iti laeng nagan ni Jesu-Cristo (Efeso 2:8-9).

No kayatmo ti agtalek ken ni Jesu-Cristo kas Mangisalakanmo, ibagam dagiti sumaganad a sao iti Dios. Saannaka a maisalakan ti panangibagam kadagitoy a sasao, ngem ti panagtalekmo ken ni Cristo ti makaaramid iti daytoy! Daytoy a kararag ket maysa laeng a wagas tapno mayebkasmo ti pammatim Kenkuana ken makapagyamanka iti panangipaayna iti pannakaisalakanmo. "Apo Dios, ammok a nagbasolak Kenka ket maikariak a madusa. Ngem inala ni Cristo ti dusa a pakaikariak tapno babaen iti pammati Kenkuana mabalinko ti mapakawan. Agtalekak Kenka para iti pannakaisalakanko. Agyamanak iti nakaskasdaaw a parabur ken pammakawanmo—ti sagut a biag nga agnanayon! Amen!"

Nagdesisyon ka kadi para ken Cristo gapu iti nabasam ditoy? No kasta, maidawat a pindutem iti baba ti "Inawat ko ni Cristo ita nga aldaw".



Agsubli iti kasangoan a panid ti Ilocano



Ania dagiti uppat a naespirituan a linteg?