Ti pannakaisalakan kadi ket babaen laeng ti pammati wenno babaen ti pammati ken ti naimbag nga aramid?



Saludsod: Ti pannakaisalakan kadi ket babaen laeng ti pammati wenno babaen ti pammati ken ti naimbag nga aramid?

Sungbat:
Mabalin a daytoy ti kapatgan a saludsod iti amin a panagadal maipapan iti Dios ken iti Cristianismo. Daytoy a saludsod ti nakaigapuanan ti pannakapabaro – ti panagsisina ti Protestante ken Simbaan nga Katoliko. Ti sungbat pay iti daytoy a saludsod ti tulbek tapno maamuan ti Biblikal nga Cristianismo ken dagiti kulto wenno ti saan a pudno a pammati ti Cristianismo. Ti pannakaisalakan kadi ket babaen laeng ti pammati, wenno babaen ti pammati ken naimbag a aramid? Siak kadi ket naisalakan babaen laeng ti panamati kenni Jesus, wenno kasapulak ti mamati kenni Jesus ken agaramid pay ti sumagmamano a banag tapno naan-anay a maisalakanak? Ti sungbat ti saludsod no babaen laeng ti pammati wenno pammati ken dagiti naimbag nga aramid magun-ud ti pannakaisalakan ket nakarkaro pay a pinarigat ti sumagmamano a versiculo iti Biblia nga kasla nagrigat a pagtunosen. No iparis ti Taga-Roma 3:28 ken Taga-Galacia 3:24 iti Santiago 2:24, mapaliiw nga kasla adda pagdumaanna iti isursuro ni Pablo (pannakaisalakan babaen laeng ti pammati) ken ti isursuro ni Santiago (pannakaisalakan babaen ti pammati ken aramid).

Ti kinapudno, saan a agsungani ti isursuro ni Pablo kenni Santiago. Ti puntos nga saan a pagkikinnaawatan a pagarupen dagiti dadduma ket ti relasyon iti nagbaetan ti pammati ken aramid. Natibker ti pagtaktakderan ni Pablo nga ti pannakaisalakan ket babaen laeng ti pammati (Taga-Efeso 2:8-9) Idinto ta rumrumuar iti saritaan ni Santiago nga ti pannakaisalakan ket babaen ti pammati nga adda kadduana nga aramid. Daytoy a parikut ket naikkan ti sungbat babaen ti naananay a panagadal no anya nga talaga ti kayat a sawen ni Santiago. Supsupiaten ni Santiago ti pammati ti maysa a tao nga adda pammatina ngem awanmet ti bungana a naimbag nga aramid (Santiago 2:17-18). Impaganetget laeng ni Santiago ti pannangikalintegan nga ti pudno a namati kenni Cristo ket agbungbunga ti baro a biag ken naimbag nga aramid (Santiago 2:20-26). Saan a kunkunaen ni Santiago nga ti pannakaisalakan ket babaen ti pammati ken aramid, no diket no ti maysa a tao ket naisalakanen, sigurado a makita dagiti naimbag nga aramid iti panagbiagna. No ti maysa a tao ket tagikuaenna nga isu ket maysa a namati, ngem awanmet dagiti naimbag nga aramid nga makita iti panagbiagna – mabalin nga awanpay ti pudno a panamatina kenni Cristo (Santiago 2:14, 17, 20, 26).

Kasdiay met ti kunkunaen ni Pablo kadagiti suratna. Dagiti naimbag nga bunga a rumbeng nga makita iti biag ti maysa a namati ket nakasurat iti Taga-Galacia 5:22-23. Kalpasan ti panagkunana a datayo ket naisalakan babaen ti pammati ken saan a babaen ti aramid (Taga-Efeso 2:8-9), impakaammo kadatayo ni Pablo nga datayo ket pinarsua tapno agaramid ti naimbag (Taga-Efeso 2:10). Mangnamnama ni Pablo pada ni Santiago nga adda panagbalbaliw a napasamak iti biagtayo, “Maysa a baro a parsua ti siasinoman a mainaig ken ni Cristo. Naglabasen dagiti daan a banag ket dimtengen dagiti baro” (2 Taga-Corinto 5:17)!

Saan nga agsunagni ti isursuro da Pablo kenni Santiago maipapan iti pannakaisalakan. Kitkitaenda laeng ti maysa a pagsasaritaan iti agduduma a sirmata. Inyunay-unay laeng ni Pablo nga ti pannakaisalakan ket babaen laeng iti pammati kabayatan inyunay-unay met ni Santiago ti kinapudno nga ti panamati kenni Jesu-Cristo ket sigurado nga agbunga kadagiti naimbag nga aramid.



Agsubli iti kasangoan a panid ti Ilocano



Ti pannakaisalakan kadi ket babaen laeng ti pammati wenno babaen ti pammati ken ti naimbag nga aramid?