Ti kina-Dios kadi ni Cristo ket nakasurat iti Biblia?



Saludsod: Ti kina-Dios kadi ni Cristo ket nakasurat iti Biblia?

Sungbat:
Saan laeng a tinagikua ni Jesus ti kina-Diosna. Binigbig met dagiti adalanna ti kina-Diosna. Kinunada a ni Jesus ket adda karbenganna a mangpakawan ti basol, maysa a banag nga Dios laeng ti maka-aramid, daytoy ket gapu ta ti Dios met laeng ti masaksaktan no maka-aramidtayo ti basol (Dagiti-Aramid 5:31; Taga-Colosas 3:13; Dagiti Salmo 130:4; Jeremias 31:34). Ni Jesus met ti mangukum kadagiti sibibbiag ken natayen (2 Timoteo 4:1). Kinuna ni Tomas kenni Jesus: “Apok ken Diosko!” (Juan 20:28). Inawagan met ni Pablo ni Jesus “Naindaklan a Dios ken Mangisalakan” (Tito 2:13), ken inyunay-unay nga sakbay nga naipasngay ni Jesus ditoy lubong Isu ket sibibbiagen a kas Dios (Taga-Filipos 2:5-8). Daytoy ti kinuna ti nagsurat ti libro ti Hebreo maipapan kenni Jesus: “Ti tronom, O Dios, agnanayon nga awan patinggana” (Hebreo 1:8). Kinuna met ni Juan, “Idi punganay, addan ti Sao, ket ti Sao kadua ti Dios, ket ti Sao, Dios” (Juan 1:1).

Adu pay a dagiti pagtuladan iti Biblia nga mangpaneknek iti kina-Dios ni Cristo (Kitaen ti libro ti Paltiing 1:17; 2:8; 22:13; 1 Taga-Corinto 10:4; 1 Pedro 2:6-8; Dagiti Salmo 18:2; 95:1; 1 Pedro 5:4; Hebreo 13:20), ken uray anya kadagitoy ket naan-anayen tapno maipakita a ni Jesus ket utuben nga Dios dagiti adalanna.

Naikkan met ni Jesus ti paulo nga para laeng kenni Yahweh (pormal nga nagan ti Dios) iti Daan a Tulag. Ti paulo iti Daan a Tulag para kenni Yahweh nga “Ti Mannubot” (Dagiti Salmo 130:7; Oseas 13:14) ket inaramat met para kenni Jesus iti Baro a Tulag (Tito 2:13; Paltiing 5:9). Inawagan met nga Immanuel ni Jesus (“Ti Dios ket adda kadatayo” iti Mateo 1). Iti libro ti Zakarias 12:10, ni Yahweh ti nagkuna, “Kitaendanto iti natay gapu iti panangduyokda kenkuana.” Ngem iti Baro a Tulag maipapan daytoy iti pannakailansa ni Jesus idiay krus (Juan 19:37; Paltiing 1:7). No ti Dios ti nagkuna nga Isu ket dinuyokda ken binagkung ken kinita ken ni Jesus ket dinuyok ken binagkung ken kinita, nalawag ngarud nga ni Jesus ket Dios. Inlawlawag ni Pablo ti libro ti Isaias 45:22-23 nga maipapan kenni Jesus iti Taga-Filipos 2:10-11. Kasta met, ti nagan ni Jesus ket us-usaraen maigiddan ti nagan ti Dios kadagiti kararag, “parabur ken talna ti ited kadakayo ti Dios nga Amatayo kasta met ni Apo Jesu-Cristo” (Taga-Galacia 1:3; Taga-Efeso 1:2). Daytoy ket maibilang nga panangtabbaaw iti Dios no ni Jesus ket saan a Pudno a Dios.

Ti nagan ni Jesus ket sinarita met kagiddan ti nagan ti Dios Ama idi imbilin ni Jesus ti panagbunyag “Iti nagan (maysaan) ti Ama, ken ti Anak ken ti Espiritu Santo” Mateo 28:19). Kitaen met ti 2 Taga-Corinto 13:14. Iti libro ti Paltiing kinuna ni Juan nga dagiti amin a pinarsua ket agdaydayaw kenni Cristo (Ti Kordero). No kasta ngarud ni Jesus ket saan a maysa kadagiti pinarsua no diket Isu ti namarsua (5:13)

Dagiti milagro nga ti Dios laeng ti makaaramid ket naaramid met ni Jesus. Saan laeng a nagpagungar ni Jesus ti natay (Juan 5:21; 11:38-44), ken pinakawan dagiti basol (Dagiti Aramid 5:31; 13:38). Inaramidnamet ken agtultuloy nga an-annadanna ti sibubukel a pinarsua (Juan 1:2; Taga Colosas 1:16-17)! Ti daytoy a kinapudno ket nagruna a mangpatibker ti kina-Dios ni Cristo no patientayo ti kinuna ni Yahweh nga agmaymaysa laeng Isuna idi panawen ti panamarsua (Isaias 44:24). Ti kayatna a sawen ti Dios Ama kenni Jesus ket Dios. Ni Jesus ket addaan kadagiti kababalin nga ti Dios laeng ti addaan: Isu ket agnanayon (Juan8:58), Isu ket adda iti amin a disso iti amin a panawen (Mateo 18:20, 28:20), Ammona amin a banag (Mateo 16:21), ken mannakabalin amin (Juan 11:38-44).

Pinaneknekan ni Jesus ti kina-Diosna babaen kadagiti milagro nga inaramidna uray pay ti panagungarna manipud kadagiti natay. Ti dadduma kadagiti milagro nga inaramid ni Jesus ket: inaramidna nga arak ti danum (Juan2:7), nagna iti rabaw ti danum (Mateo 14:25), pinaaduna dagiti banag nga pisikal (Juan 6:11), nangagas ti bulag (Juan9:7), iti pilay (Marcos 2:3), ken kadagiti addaan ti sakit (Mateo 9:35; Marcos 1:40-42), ken uray ti panangpagungar kadagiti tao mainipud iti ipapatay (Juan11:43-44; Lucas 7:11-15; Marcos 5:35). Nangruna kadagitoy, Ni Jesus mismo ket nagungar manipud iti ipapatay. No iparis ti pangungar ni Cristo kadagiti kunkunada a natay ken nagungar a dios-diosan dagiti pagano, saan a maiparis daytoy iti panagungar ni Cristo nga pinaneknekan dagiti adu a nakaimatang ken ti Biblia. Kinuna pay ni Dr. Gary Habermas, adda sangapulo ket dua a kinapudno iti pakasaritaan dagiti pasamak nga aw-awaten uray dagiti saan a Cristiano nga napnuan iti adal.

1. Natay ni Jesus babaen ti pannakailansa iti Krus.
2. Isu ket naipunpon.
3. Ti ipapatayna ket nagbalin a makagapu tapno maawanan ti namnama ken maldaang dagiti adalanna.
4. Naduktalan ti tanem ni Jesus nga awan ti nagianna kalpasan ti sumagmamano nga aldaw manipud ti pannakaipunponna.
5. Naimatangan dagiti adalan ti panagparang ti nagungar nga Jesus.
6. Kalpasan daytoy, nagbalin a natibker ti pammati dagiti adalanna manipud iti panagduadua.
7. Daytoy a mensahe ket impaltiing kadagiti immuna a ragup ti namati.
8. Daytoy a mensahe ket impaltiing idiay Jerusalem.
9. Gapu ti daytoy a mensahe, ti Iglesia ket naipatakder ken immadu ti bilang dagiti namati.
10. Ti aldaw a panagungar ni Cristo, (aldaw ti Domingo) ket insukat iti aldaw ti panaginana (Sabado) kas aldaw ti panagdaydayaw.
11. Napabaro ti panagbiag ni Santiago idi nakitana ti nagungar a Jesus.
12. Ni Pablo nga kabusor ti Cristianismo, ket napabaro ti pangbiagna gapu iti panagparang kenkuana ti nagungar a Jesus.

Uray no saan a kayat ti mamati dagiti dadduma kadagitoy a pasamak, sumagmamano laeng ti kasapulan tapno paneknekan ti panagungar ni Jesus tapno bangonen ti evanghelio: ti ipapatay, panangipunpon, panagungar ken ti panagsubli ni Cristo (1 Taga-Corinto 15:1-5). Idinto ta adda ti sabali a pasarak nga mangipatarus iti maysa wenno dua iti kinapudno a nakasurat iti ngato, ti panagungar laeng ti makapaneknek kadakuada amin. Am-aminen dagiti kritiko nga naimatangan dagiti adalan ti panagungar ni Jesus. Saan a kabaelan a balbaliwan ti kina-ulbod ti biag dagiti tao iti pamuspusan nga inaramid ti panagungar. Umuna, anya kadi ti magungunada? Saan idi a nalatak ti Cristianismo ken saanda met a pabaknangen daytoy. Maikadua, dagiti naulbod ket saan a napatay nga awan basbasolda. Awanen ti nasaysayaat a panangipatarus iti panagungar ni Jesus no diket ti pannakasagana dagiti adalan nga matay para kadagiti pammatida. Wen, adu dagiti tao a natay gapu kadagiti kina-ulbod a pagarupda ket pudno, ngem awan matmatay gapu kadagiti naammuanda nga ammoda a maysa laeng a kina-ulbod.

Iti maudi, tinagikua ni Jesus nga Isu ken ti Dios Ama ket maymaysa. Isu ket pudno a Dios ken dagiti pasurot ket mamati kenkuana ken inawagan Isuna a Dios. Pinaneknekan ni Jesus ti kina-Diosna babaen kadagiti inaramidna a milagro ken ti panagungarna. Awan ti aniaman a panangikalintegan ti magsupiat kadagitoy a kinapudno.



Agsubli iti kasangoan a panid ti Ilocano



Ti kina-Dios kadi ni Cristo ket nakasurat iti Biblia?