Anya ti kararag iti maysa a managbasol?



Saludsod: Anya ti kararag iti maysa a managbasol?

Sungbat:
Ti kararag ti maysa a managbasol ket kararag iti maysa a tao iti Dios kalpasan nga maawatanna nga isu ket maysa a managbasol ket agkasapulan iti mangisalakan. Ti panangsarita daytoy nga kararag ket awan kapaypay-anna no basta laeng saritaen iti bibig ngem saan a matarusan. Daytoy ket agbalin laeng a nabileg no baliksen nga agtaud iti puso, nga matarusan ken inawat iti maysa a tao ti kinapudno nga isu ket maysa a managbasol ket agkasapulan iti pannakaisalakan.

Umana iti amin, rumbeng nga maawatantayo a datayo amin ket managbasol. Kunkuna iti Taga-Roma 3:10, “Awan ti uray maysa a nalinteg a tao.” Ipatpataros iti Biblia nga datayo amin ket nagbasol. Datayo amin ket managbasol ken agkasapulan iti asi ken pammakawan iti Dios (Tito 3:5-7). Gapu kadagiti basoltayo, rumbeng laeng nga madusatayo nga awan patinggana idiay impiyerno (Mateo 25:46). Ti kararag iti maysa a managbasol ket ti panangdawat iti parabur saan ketdi a pannakaukom. Daytoy ket panangdawat ti asi saan ketdi a pungtot.

Rumbeng pay nga maammoan tayo ti inaramid iti Dios para kadatayo tapno isalakannatayo iti didgra gapu ti kinamanagbasoltayo. Ti Dios ket naglasag babaen kenni Jesu-Cristo (Juan 1:1, 14). Insuro ni Jesus kadatayo iti kinapudno maipapan iti Dios ket nagbiag Isuna nga maysa a nalinteg ken nasantoan nga panagbiag (Juan 8:46; 2 Taga-Corinto 5:21). Kalpasan, Isu ket natay idiay krus maigapu kadatayo. Inanusanna ti dusa a para kadatayo (Taga-Roma 5:8). Nagungar ni Jesus tapno paneknekanna nga inabakna ti basol, pannakatay ken impiyerno (Taga-Colosas 2:15; 1Taga-Corinto 15). Agsipud iti daytoy amin, mabalinen a mapakawan dagiti basbasoltayo ken matagikua ti biag nga agnanayon ken pagtaengan idiay langit nga inkarina no laeng ikabiltayo ti pammati ken panagtalek kenni Jesu-Cristo. Ti laeng rumbeng nga aramidentayo ket ti panamati nga ni Jesus ket natay gapu kadatayo ken nagungar manipud kadagiti natay (Taga-Roma 10:9-10). Datayo ket maisalakan gapu laeng iti parabur, babaen iti panamati kenni Jesu-Cristo. Kunkuna iti Taga-Efeso 2:8 “Ta gapu iti parabur iti Dios, naisalakantayo babaen iti pammati. Saanyo nga insalakan ti bagiyo gapu iti inaramidyo. Insagut kadakayo iti Dios ti pannakaisalakanyo tapno awan iti mangipasindayag iti daytoy.”

Ti kararag ti maysa a managbasol ket maysa a kadawyan nga panangipaduyakyak iti pammati iti maysa a tao iti Dios ken panagyaman iti pannakaisalakan nga naited kenkuana. Lagipem laeng nga daytoy a kararag ket saan a mangisalakan kenka. Ti Dios laeng ti makaisalakan kenka babaen iti Santo nga Espiritu. Ibagam kenkuana nga agtaud dita pusom, “O Dios, aminek a nagbasolak maibusor kenka ket rebbeng laeng a siak ket madusa. Ngem innala ni Jesus ti basol ko ken sinagabana ti dusa nga siak iti rumbeng nga umawat. Agbabbabawi ken paglikudakon dagiti basbasolko ken agtalekak kenni Jesus maipapan iti pannakaisalakanko. Agyamanak iti nakaskasdaaw nga paraburmo ken pammakawan. Agyamanak met iti biag nga agnanayon. Amen!

Gapu kadagiiti nabasam ditoy, Sika kadi ket agbabbabawin kadagiti basolmo ken nangaramidka iti keddeng nga ikabil ti pammati ken panagtalekmo kenni Cristo? No wen, i-klik mo ti "Inawat ko ni Cristo ita" iti kahon iti baba.

Nagdesisyon ka kadi para ken Cristo gapu iti nabasam ditoy? No kasta, maidawat a pindutem iti baba ti "Inawat ko ni Cristo ita nga aldaw".



Agsubli iti kasangoan a panid ti Ilocano



Anya ti kararag iti maysa a managbasol?