Ania ti ibaga ti Biblia maipapan kadagiti tattoo / tebbeng iti bagi?



Saludsod: Ania ti ibaga ti Biblia maipapan kadagiti tattoo / tebbeng iti bagi?

Sungbat:
Imbilin ti linteg iti Daan a Tulag kadagiti Israelita, “Diyo markaan wenno sugaten ti bagiyo a mangipakita iti panangdung-awyo iti natay. Siak ni Yahweh” (Leviticus 19:28). Ngarud, uray no saan a sakop ti linteg iti Daan a Tulag dagiti namati iti agdama, mangpataud kadagiti saludsod ti kinapudno nga adda bilin a maibusor iti panagtattoo. Awan ti naibaga iti Baro a Tulag no mabalin ti maysa a namati ti agpa-tattoo wenno saan.

No mainaig iti panangtatto wenno panangtebbeng iti bagi, maysa a nasayaat a wagas a panangpadas ket ti napudno ken addaan nadalus a konsensia a panangdawat iti Dios a bendisionan ken usarenna ti maysa nga aramid para iti bukodna a panggep. “No adda aniaman nga aramidenyo, mangan man wenno uminumkayo, aramidenyo a pakaidayawan ti Dios” (1 Corinto 10:31). Awan ti mandar ti Baro a Tulag a maibusor iti panangtatto wenno panangtebbeng iti bagi, ngem saan met a mangted daytoy iti aniaman a rason tapno patientayo a pagayatan ti Dios nga ipatatto wenno ipatebbengtayo ti bagitayo.

No maipapan kadagiti bambanag a saan a nalawag a dinakamat ti Biblia, maysa a napateg a prinsipio a naibasar iti Biblia daytoy: no adda lugar ti panagduadua no makaay-ayo met laeng ti maysa a banag iti Dios wenno saan, nasaysayaaten a saanmo nga ar-aramiden dayta a banag. Ipalagip ti Roma 14:23 kadatayo a basol ti aniaman a banag a saan a nagtaud iti pammati. Nasken a laglagipentayo a sinubboten ken kukuan ti Dios ti bagi ken kararuatayo. Nupay saan a direkta a maipaay ti 1 Corinto 6:19-20 iti panangtatto ken panangtebbeng iti bagi, mangipaay daytoy iti prinsipio kadatayo: “Diyo kadi ammo a ti bagiyo ket templo ti Espiritu Santo? Diyo kadi ammo nga agtaeng kadakayo daytoy nga Espiritu nga inted ti Dios? Saanyo a kukua ti bagiyo, no di ket kukua ti Dios. Nangina ti inggatangna kadakayo. Ngarud, aramatenyo ti bagiyo a pakaidayawan ti Dios.” Adda koma bilegna daytoy a kinapudno maipaay iti panangaramattayo iti bagitayo ken iti pangiturongantayo iti daytoy. No kukua ti Dios ti bagitayo, siguradoentayo ngarud koma nga adda nalawag a “pammalubosna” sakbay a “markaantayo daytoy” babaen iti panangtatto ken panangtebbeng.



Agsubli iti kasangoan a panid ti Ilocano



Ania ti ibaga ti Biblia maipapan kadagiti tattoo / tebbeng iti bagi?