Jesuh Khrih Ah Ka Zumhnak Ka Chiah Cang… Cun Tah, Zeitin Dah Ka Si Rih Lai?


Lawmh na um tuk hringhran! Nun a thlengmi biakhiahnak na tuah cang! Zeitin dah ka si rih lai, zei dah a um rihmi a si, na ti `han khawh men. Pathian he zeitin dah kar ka hlanning a si lai? na ti men lai. A tanglei ah step panga hmang in Bible nih lam an hmuhsak lai. Cun Khrihfa na sinak ah bia hal ding le ruah ding tampi na ngei tawn lai, cu tikah www.GotQuestions.org/Hakha-Chin hi rak leng tawn.

1. Khamhnak hi naa fian hrimhrim a hau.

1 John 5:13 nih a kan chimhmi cu, “Pathian Fapa a zummi nih zungzal nunnak kan ngei ti kha nan i hngalh khawh nakhnga hi ca hi kan kuat hna,” a ti. Pathian nih khamhnak kong hi i fiang hna seh ti a kan duh. Khamhmi ka si timi zumh ngam taknak hi ngeih hna seh ti hi Pathian nih a kan duhpiak. Khamhnak kong he pehtlai in a biapimi hna tawite in vun zoh tuah hna usih:

(a) Kan dihlak tein kan sual dih hna. Kan dihlak tein Pathian duh lomi thil kan tuah cio dih hna (Rom 3:23).

(b) Kan sual ruang ah, Pathian he a zungzal `hen ding in dantatnak hmuh awk ah kan i tlak dih hna (Rom. 6:23).

(c) Kan sual man kan in dingmi dantatnak kha champiak awk ah Jesuh Khrih nih vailam cung ah a kan thihpiak (Rom 5:8; 2 Korin 5:21). Jesuh Khrih nih kan tuar hnga dingmi ah a kan tuarpiak, kanmah nih kan in dingmi kha amah nih a kan inpiak. Jesuh Khrih a thawh`hannak nih a langhtermi cu Jesuh Khrih a thihnak hi kan sual man champiak ding in a za.

(d) Jesuh Khrih a zummi paoh cu Pathian nih ngaihthiamnak le khamhnak a pek dih hna. Jesuh Khrih hi kan sual man cham awk ah a thi timi hi kan zumh awk a si (John 3:16; Rom 5:1; 8:1).

Hihi khamhnak thawng`ha kong cu a si. Jesuh Khrih hi a ka khamhtu le ka Bawipa a si tiah na zumh ahcun, khamhnak cu na hmu ko lai. Kan sualnak vialte cu ngeihthiam an si lai I Pathian nih kan kal tak hna lai lo, kan hlaw bal hna lai lo tiah bia a kan kamh (Rom 8:38-39; Ma`hew 28:20). Na theih awk a simi cu, Jesuh Khrih ah an zumhnak cu zungzal in a him cang (John 10:28-29). Jesuh Khrih lawnglawng ah na zumhnak na chiah ahcun Pathian he vancung ah zungzal in kan um `i lai tiah zumh ngamnak ngei ko!

2. Bible Cawnpiaknak dik a ngeimi Khrihfabu kawl.

Khrihfabu hi inn ah aa pum menmenmi an si tiin ruat hlah. Khrifabu timi cu minung hi an si. A biapi tukmi cu Jesuh Khrih a zummi paoh hna cu pakhat le pakhat hawikomhnak an ngeih peng awk a si. Hihi Khrihfabu nih a tuah awk a rian dik taktak cu a si. Atu cu Jesuh Khrih na zumh cang i, biatak tein fial kan in duhmi cu Bible a zummi Khrihfabu kawl hna. Pastor he pehtlaihnak tuah. Na zumhnak kha hngalhter.

Khrihfabu nih a tuah awk a pahnihnak cu Bible hi dik tein a cawnpiak lai. Pathian chimhrinnak le cawnpiaknak kha ka nunnak ah zeitin dah ka hman lai timi hi na hngalh lai. Bible cawnpiaknak hngalh le fian hi nunnak a hlawhtlinter tawh pakhat a si. 2 Timothy 3:16-17 nih a chimmi cu, “Cathiang hi a dihlak in Pathian thawchuahhnawhnak in pekmi a si i, cawnpiaknak ca ah siseh, sualphawtnak ca ah siseh, remhnak ca ah siseh, dingfelte in chimhrinnak ca ah siseh a ṭhahnemmi a si. Cucu Pathian mi kha mitling a si khawh nakhnga le rian ṭha kip ṭuannak ca ah tlingte in thuamh a si nakhnga ding ah a si,” a ti.

Khrihfabu nih a tuah awk a pathumnak cu pumh nun ngeih hi a si. Pumhnak tuah hi Pathian cung ah kan i lawmhnak langhternak le thang`hatnak peknak ca ah a si. Pathian nih a kan dawt. Pathian nih a kan khamh. Pathian nih kan duh-herhmi vialte a kan pek dih. Pathian nih a kan hruai i, lam a kan hmuhsak. Zeiruang ah kan lawmh khawh lai lo? Pathian cu a thiangmi a si, a dingmi a si, dawtnak ngeimi a si, velngeihnak a ngeimi a si, zaangfahnak in a khatmi a si. Biathlam 4:11 nih a chimmi cu, “Kan Bawipa le kan Pathian, Nangmah cu sunparnak le upatnak le lianngannak kha hmuh awk ah aa tlakmi na si. Zei ca ah tiah zeizong vialte kha nangmah nih na ser hna i Nangmah duhnak bang in annih cu ser an si i nunnak an ngei,” tiah a ti.

3. Ni fatin in Pathian he caan ngei `i lengmang.

Pathian kong ruahnak caan hi ni khat ah voikhat lengmang cu ngei kho ding in caan i chiah lengmang. Cheukhat nih cun hi caan hi “a daimi caan” an ti. A dang nih cun “pumpek caan” an ti, zei ca ah tiah hi caan hi Pathian sin ah kan i pumpek caan a si. Cheukhat cu zingkaa ah “pumpek caan” an hmang deuh tawn. Cheukhat cu zanlei ah an hmang tawn. Asinain zingkaa caan, zanlei caan ti a um lo. A biapimi cu Pathian he caan hmaan tein hman hi a si. Pathian he caan hman`i timi cu zei dah an si?

(a) Thlacamnak: Thlacam timi cu Pathian sin ah biachim khi a si. Kan herhmi le kan harsatnak Pathian sin ah chim khi a si. Pathan hi fimnak le lam hmuhsaknak dik hi kan hal peng ding a si. Kan herhmi hi Pathian nih a kan pek nakhnga hal lengmang ding a si. Zeitluk in dah Pathian hi kan dawt timi hi kan chim lengmang ding a si. Kan ca ah a tuahsermi vialte hi kan lawmh awk a si. Hihi thlacam timi cu a si ko.

(b) Bible Rel: Biakinn lawng ah Bible hi theih lo in, kanmah tein Bible hi kan rel lengmang ding a si. Khrihfa nunnak ah hlawhtling tein nun kan duh ahcun, Bible nih tling tein cawnpiaknak a ngei dih. Kan nunnak ah zei lam dah ka zulh lai timi kong ah biakhiah kan i herh tuk tawn hna, Bible nih nunnak i biakhiahnak tiang in lam a kan hmuhsak. Bible nih Pathian duhnak zei dah a si timi fiang tein a chim, midang sin ah umtu `hutdirning kong, pehtlaihnak kong, cun thlarau lei in `hannak kong zong a ngeih dih. Bible hi kan ca ah Pathian bia a si. Bible hi Pathian lung kan ton khawhnak ding ah lam hmuhsaktu a si i Bible hi kan lungchung saduhthah a tlintertu zong a si.

4. Thlarau leiin thazaang an pe khotu he pehtlaihnak tuah ding.

1 Korin 15:33 nih a chimmi cu, “Aho hmanh i hlenter hna hlah u. ‘Hawi `halo nih ziaza `ha a hrawh.’” Bible nih mi`halo he hawikomhnak ngeih hi a duh lo i ralrinnak kong tampi a chim. Sualnak a tuah lengmangmi hna he caan kan hman lengmang ahcun, kanmah zong sualnak kan tuah ve lai. Kan pawngkam ah a ummi hna ziaza nih kan ziaza zong cirik a kaiter khawh. Hi ruang ah hin pei Pathian a duhmi hna hi hawikomhnak ngeih hi a herh tuknak a si cu.

Na Khirhfabu ah hawikom a `hami kawl hna. Anmah nih an i bawmh lai, thazaang an i pek lai (Hebrews 3:13; 10:24). Na cawlcanghnak a si ah, Pathian he naa pehtlaihnak a si ah, dai tein caan na hmannak a si ah, na hawi kha chim law, daithlang in na um sual nakhnga lo in theihter lengmang seh. Cu bantuk cun nangmah zong nih tuahpiak ve. Cun na hawile zong nih Pathian he naa pehtlaihnak kha hnahnawhnak tuahter hna hlah, nangmah zong nih hnahnawhnak tuahpiak ve hna hlah. Jesuh Khrih nih na nunnak an thlenmi kha na hawile nih hmu peng hna seh.

5. Tipil Ing

Tipil innak kong hi mi tampi nih an theihpalh lengmang. “Tipil” timi biafang a sullam cu “a chunglei ah va pil” ti a si. Tipil in a sullam cu Bible phunglam tein zumhnak thar ka ngei cang ti mipi sin ah/theih in i phuannak a si. Cu pin ah Jesuh Khrih ka zulh cang lai tiah pumpeknak hmelchunhnak a si. Tipil kan in tikah khin ti chunglei ah kan pil i thawhter kan si `han, khi nih khin a langhtermi cu Jesuh Khrih thihnak ah ka thi ve i ka tho `han ve tinak a langhter (Romans 6:3-4).

Cun Tipil kan inmi hi a kan khamhtu a si lo. Tipil kan innak nih kan sualnak a thianter fawn lo. Tipil innak cu toidor nunnak kan ngeihnak step pakhat a si, Jesuh Khrih lawnglawng hi khamhnak a kan petu a si tiah kan zumhnak kan phuannak a si. Tipil innak hi a biapi tuk, zei ca ah tiah toidornak nun step pakhatnak a si, zapi sin ah Jesuh Khrih kan zumhnak kan langhternak a si. Tipil in na duh ahcun na Pastor kha `ha tein na chimh hmasa lai.

English
Hakha holh in leh mi ahramthawk ah vazoh than

Jesuh Khrih Ah Ka Zumhnak Ka Chiah Cang… Cun Tah, Zeitin Dah Ka Si Rih Lai?