Zeitindah Pathian Ngeihthiamnak Ka Hmuhning A Si Lai?


Bia halnak: "Zeitindah Pathian Ngeihthiamnak Ka Hmuhning A Si Lai?"

Bia lehnak:
Lamkaltu 13: 38, Cucaah u le nau hna, hi pa thawng hin sual ngaihthiamnak cu nan sin ah phuan a si cang ti kha hngalhter kan duh hna.

Ngaihthiamnak Hi Zeidah A Si I Zeiruang Ah Dah Kan Herh?

“Ngaihthiam” timi biafang a sullam cu leiba kan ngeih mi calung cung ah ca`ial in a um mi kha hloh/hnawh, letpiak, zaangfah tinak a si. Midang cung ah palhnak pakhatkhat kan tuah sual tikah, ngaihthiamnak kan hal tawn, zei caah tiah i ral le i rem lo in um kha kan duh lo. Ngaihthiamnak hmuh ding in kan i tlak ruang ah ngaihthiam kan si lo. A ngaingai ti ahcun aho hmanh ngaihthiam awk aa tlakmi kan um hna lo. Ngaihthiamnak hi dawtnak, velngeihnak, zaangfahnak in a tuah mi a si. Ngaihthiamnak kan ti mi cu midang cung ah zeihmanh remlonak, thinhunnak le `hatlonak ka ngei ti lai lo a ti a si. Midang nih kan cung ah zei bantuk thil hmanh an tuah tikah kan ngaihthiam cang hnu ahcun rualrem tein kan um awk a si cang.

Pathian ngaihthiamnak hi mi kip nih an herh dih tiah Bible nih a chim. Kan zapi in kan sual cio dih hna. Phungchimtu 7: 20 nih a chimmi cu, “Vawleicung ah thil dik a tuah i a sual bal lo ti mi miding an um lo” a ti. 1 Johan 1: 8 nih a chim mi cu, “Kan sual lo an ti ahcun, kanmah le kanmah kan i hlen a si i biatak kan sin ah a um lo tinak a si,” tiah a ti. Sual poahpoah cu Pathian ralchanh a si (Psalm 51:4). Cu ruang ah Pathian sual ngaihthiamnak kan herh dihnak hna hi a si. Kan sualnak hi Pathian nih a ngaihthiam lo ahcun zungzal teminnak hell ah kan um lai (Matthew 25:46; John 3:36).

Ngaihthiamnak Hi Zeitin Dah Kan Hmuhning A Si Lai?

Lawmh awk ngai a um mi cu Pathian hi dawtnak le velngeihnak a ngei tuk mi a si, kan sualnak vialte ngaihthiam ding in timhcia a si zungzal. 2 Peter 3:9 nih a chimmi cu, “Bawipa cu a biakam tlinter awk ah a khur a nuar ko ti in mi a cheu nih an ruah bang hin a si lo, nanmah cung i lungsaunak a ngeih ca tu ah hin a si deuh. Zeitin tiah pakhat tlau hmanh hi a duhmi a si lo i mi vialte hi sual ngaihchihnak ngei hna seh ti tu hi a duh mi a si,” a ti. Pathian nih ngaihthiam a kan duh dih caah ngaihthiamnak lam zong a kan serpiak.

Kan sual man ah dantatnak kan hmuh ding mi cu thihnak hi a si. Rom 6:23 nih a chim mi cu, “Zei caah tiah sual man cu thihnak a si…,” tiah a ti. Zungzal thihnak hi kan sualnak ruang ah a si. Kan sualnak hi ngaihthiam a si lo ahcun zungzal in a thi ding mi kan si. Pathian nih tling hirhiar tein a timh cang bantuk in, Pathian cu Jesuh Khrih ah minung ah a hung cang (Johan 1:1,14). Jesuh Khrih cu vailam cung ah a thi, thihnak kan in ding mi a kan inpiak. Pathian a si bantuk in, Jesuh Khrih a thih mi hi vawleicung minung sualnak vialte ca ah a si. 1 Johan 2:2 nih a chimmi cu, “Cun kan sualnak ngaihthiam kan sinak zong cu Khrih thawng cun a si i kanmah kanmah sualnak lawng si loin mi vialte zong an sualnak kha ngaihthiam an si lai,” tiah a ti. Jesuh Khrih cu a thi i a tho `han, sualnak le thihnak a teinak cu phuan a si (1 Korin 15:1-28). Pathian cu thang`hat si ko seh, Jesuh Khrih a thihnak thawng le a thawh`hannak thawng in kan hmuhmi cu, “Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.”

Na sualnak in ngaihthiam na duh maw? Kan thinlung a thurhnawm tuk tiin lungdong in na um maw? Hi thinlung thurhnawmhnak in ka luat kho lai lo tiah lungdong in na um bal maw? Thianter khotu a um. Jesuh Khrih hi a ka khamhtu le ka Bawipa a si na ti i na zumh ahcun khamhnak zong na hmu lai i na thinlung thurhnawmhnak zong an thianh lai. Ephesians 1:7 nih a chimmi cu, “Khrih thihnak nih kannih cu a kan luatter, cucu kan sualnak ngaihthiam kan si tinak a si. Pathian vel cu a va lianngan hringhran dah.” Ngaihthiam kan si khawhnak ding ah Jesuh Khrih nih a thihnak thawng in kan sual leiba cu champiak kan si cang. Kan tuah awk ding cu Jesuh Khrih min in Pathian sin ah sual ngaihthiamnak hal hi a si. Kan sual ngaihthiamnak ca ah Jesuh Khrih a thi ti mi hi kan zumh awk a si. Kan sualnak cu ngaihthiam loin a kan um hrimhrim lai lo. John 3:16-17 nih Pathian dawtnak sung kong hitihin a kan chimh, “Zei caah tiah Pathian nih vawlei hi a dawt hringhran caah a Fapa ngeihchun kha a pek. Cucaah amah a zummi paoh cu an rawk lai lo, sihmanhsehlaw zungzal nunnak an ngei lai,” a ti.

Sual Ngaihthiamnak Hmuh Hi A Fawi Tuk Ko Lo Maw?

Fawi tuk! Sualngaihthiamnak hi Pathian sin in cawk khawh a si lo. Nangmah tein ngaihthiamnak hmuh khawh zong a si lo. Zumhnak in a co lawng na cohlan khawhmi a si. Jesuh Khrih hi ka Bawipa le a ka khamhtu a si tiah na cohlan i Pathian sin in ngaihthiamnak hmuh na duh ahcun thlacam ding a si ko. Thlacamnak menmen in khamhnak na hmu kho fawn lai lo. Jesuh Khrih hrimhrim na zumhnak a hau. Kan sualnak a ka ngaihthiam tiah na zumh hrimhrim a hau. “Pathian, na cung ah sualnak ka tuah tiah ka hngalh, thihnak le dantatnak hmu ding in kaa tlak. Sihmanhsehlaw, Jesuh Khrih ka zumhnak thawng in keimah nih kan tuar ding mi vialte Jesuh Khrih nih a ka tuarpiak dih cang timi ka theih. Khamhnak ka cotin khawh ve nakhnga na cung ah ka zumhnak ka chiah. Na zaangfahnak le na velngeihnak ruang ah lawmhnak tampi ka ngei. Amen.

GotQuestions.org ah Pathian thawng`ha na relnak thawngin Jesuh Khrih na zum maw? Na zumh ahcun, a tang ah aa `ial mi “Nihin in Jesuh Khrih ka zumh cang” timi kha hmet ko.



English
Hakha holh in leh mi ahramthawk ah vazoh than

Zeitindah Pathian Ngeihthiamnak Ka Hmuhning A Si Lai?