Thih Hnu Ah Nunnak A Um Maw?


Bia halnak: "Thih Hnu Ah Nunnak A Um Maw?"

Bia lehnak:
Thih hnu ah nunnak a um ti maw timi hi thihnak a tongmi chungkhar hna nih atu le atu an halmi bia a si. Vawlei cung minung kip nih an hal pengmi bia a si. Job nih hitihin a chim, “Nu hrinmi minung cu ni tlawmte lawng a nung i, a nunnak ah harsatnak in a khat. Pangpar bantuk in a par i a uai `han zau, a lo zaumi thladem bantuk a si… minung a thih tikah, a nung `han ti lai maw,” tiah lungaw`awm pah, thinphang pah in biahalnak a tuah ve (Job 14:1-2, 14). Job bantukin, kanmah cio zong hi biahalnak nih a kan ton cio ve. Kan thih tikah zei tin dah kan um cioning a si lai? Thihnak hi kan nunnak a donghnak maw a si ko hnga? Vancung timi le Hell timi hi a um taktak maw? Zei bantuk lam lei ah dah kan kal hna lai? Kan kal nakding lam aa khat lai maw, aa dang cio lai dah?

Bible nih a kan chimhmi cu thih hnu ah nunnak hi a um lawng si loin a sunglawi tukmi zungzal nunnak zong a um tiah a chim. Cu a sunglawi tukmi nunnak cu “Mit zong nih a hmuh bal rih lomi a si, hna zong nih a theih bal rih lomi a si, ruahnak zong nih a purhdah khawh rih lomi a si, cucu Pathian nih amah a dawmi hna ca ah a timh piakmi hna hmun a si,” a ti (1 Korin 2:9). Jesuh Khrih, Pathian bak a simi kha taksa in aa langh i zungzal nunnak pek awk ah vawlei ah a rak ra. “Asinain kan sual ruang ah fei in an chunh, kan sualnak ruang ah tukdennak a tong i, a hma in kanmah cu damter kan si” (Isaiah 53:5). Kanmah nih kan sual ruang ah kan in dingmi kha Jesuh Khrih nih amah cung ah aa khinh hna i a kan inpiak. Thihnak thlankhor chung tiang in kan sual ruang ah a phan, sihmanhsehlaw ni thum hnu ah thawh`hannak in thihnak a teinak cu a langhter. Thihnak in a thawh`han hnu ah ni sawmli chung vawlei ah khua a sa rih i vancung a kai hlan tiang minung thong tampi nih an hmuh, an ton, bia an ruah. Rom 4:25 nih a chimmi cu, “Kan sual ruang ah Jesuh Khrih cu thihnak ah pek a si i kanmah thiamcoter awk ah thawhter `han a si,” a ti.

Jesuh Khrih a thawh`hannak hi `ha tein cauk in `ial a si. Tehte tampi langhter awk a um. Jesuh Khrih a thawh`hannak hi Khrihfa mi hna kan zumhnak hrampi a si. Jesuh Khrih nih thihnak a tei ruang le a thawh`han caah zumh ngamnak kan ngei kho. Kan tho `han ve hrimhrim hna lai. Jesuh Khrih a thawh`hannak hi thih hnu ah nunnak a um hrimhrim ko timi a langhtertu a si. “Sihmanhsehlaw biatak cu hihi a si: Khrih cu thihnak in thawhter a si i cucu thihnak chung i aa hngilhmi hna zong kha thawhter an si ve lai tinak aamahkhan a si. Thihnak cu mi pakhat thawng in a tlun bantuk in thihnak in thawhṭhannak zong cu mi pakhat thawng in a tlung ve. Adam he an i pehtlaihnak thawng in mi vialte cu an thih bantuk in, Khrih he an i pehtlaihnak thawng in mi vialte cu nunnak ah thawhter an si lai,” a ti (1 Korin 15:20-22). Pathian nih Jesuh Khrih pum cu a thawhter bantuk tein Jesuh Khrih a rat `han tikah thawhter an si ve lai (1 Korin 6:14).

A donghnak ni ah cun kan dihlak tein thawhter kan si dih hna lai nain vancung ah mi kip kal khawh a si lai lo. Kan thih hlan ah thimnak kan ngeih hmasa a hau. Thimnak kan ngeihmi hi zei lam dah kan panh lai timi cung ah aa hngatmi a si. Bible nih a chimmi cu voikhat cu a thih dih ding in timhmi kan si hna i, cu hnu ah cun biaceihnak nih a zulh lai a ti (Hebrews 9:27). Jesuh Khrih an zumhnak thawng in thiamcoter a si cangmi hna cu vancung ah zungzal nunnak an ngei lai, asinain Jesuh Khrih hi khamhtu a si tiah a pom duh lomi hna cu Hell ah zungzal in chiah an si lai (Ma`hew 25:46). Vancung a um bantuk in Hell hi a um taktakmi a si. Hell cu misual mi hna ca ah chiahmi a si. Hell hi donghnak a ngei lo khor a si (Luke 8:31; Biaphuan 9:1). Cun mei ti bual a si, chun zan in a zungzal in teminnak hmun a si (Biaphuan 20:10). Hell ah cun `ahnak le hacang rialnak lawng tein a khat, asullam cu teminnak fak tuk a um tinak a si (Ma`hew 13:42).

Pathian hi mi`halo hna an thih ah aa lawmmi a si lo, asinain nunnak an hmuh nakding an sualnak in i mer hna seh ti a duhmi Pathian a si (Ezekiel 33:11). Sihmanhsehlaw, Pathian cu mi hnek a duhmi a si lo. Kan duh ahcun hnulei ah kan mertak khawh, vawleicung kan nun hi hneksaknak ca ah a si, a ra laimi ton awk ah kan i tlak maw tlak lo tiah hneksaknak chung ah a ummi kan si. Zumtu hna cu thih hnu ah Pathian he vancung ah kan um lai. Zumlotu hna cu thih hnu ah hell ah an kal lai. Cucaah Hell kan hrial khawh nakding ah lam pakhat lawng a um, Jesuh Khrih zumhnak lawng in a si. Jesuh Khrih nih a chimmi cu, “Keimah cu nunnak le thawh`hannak ka si. A ka zummi paoh cu an nung lai, an thih hmanh ah, a ka zummi paoh cu an thi bal ti lai lo,” a ti (John 11:25-26).

Pathian nih a lak tein a kan pekmi laksawng hi aho ca paoh ah a um ko. “Jesuh Khrih a zummi paoh cu nunnak an ngei lai, sihmanhsehlaw Jesuh Khrih a cohlang lomi paoh cu nunnak an hmu lai lo. Pathian thinhunnak a nunnak ah a tang,” a ti (John 3:36). Kan thih hnu ah Jesuh Khrih zumhnak ding in caan pek kan si ti lai lo. Vawlei kan nun chung ah hin kan donghnak lam cu a fiang cang. Vawlei ah biakamnak kan ngeih cangmi kha kan thih tikah kan zulh ding lam cu a si cang. “Pathian nih, ‘Nanmah cu zaangfah kan duh hna caah kha caan ah khan nan bia cu ka rak in theihpiak hna i khamh kan duh hna caah kha ni ah khan ka rak in bawmh hna,’ tiah a rak chim. Ngaihmanh u! Pathian zaangfahnak hmuh caan cu atu hi a si i khamhnak hmuh ni cu nihin hi a si!” a ti (2 Corinthians 6:2).

Jesuh Khrih a thihnak le a thawh`hannak hi keimah ca ah a si ko tiah kan zumh ahcun vawleicung kan um chung zong ah nun duhdim kan ngei lai, cu pin ah Jesuh Khrih hmai ah a sunglawi tukmi nunnak zong kan ngei lai ti in ka bia ka donghter.

GotQuestions.org ah Pathian thawng`ha na relnak thawngin Jesuh Khrih na zum maw? Na zumh ahcun, a tang ah aa `ial mi “Nihin in Jesuh Khrih ka zumh cang” timi kha hmet ko.


Hakha holh in leh mi ahramthawk ah vazoh than

Thih Hnu Ah Nunnak A Um Maw?