Khamhnak Hi Zumhnak Lawng In A Si Maw Asiloah Tuahsernak Aa Telchih Maw?


Bia halnak: "Khamhnak Hi Zumhnak Lawng In A Si Maw Asiloah Tuahsernak Aa Telchih Maw?"

Bia lehnak:
Khrihfami kan theology ah hihi a biapi bikmi bia halnak a si kho men. Hi bia halnak hi Biaknak sersiamnak (Reformation) a chuahpitu a si. Protestant le Roman Catholic `hennak a chuahpitu zong a si. Zumhnak a dik lomi Khrihfabu le a dikmi Khrihfabu a kan dantertu zong a si. Khamhnak hi zumhnak lawng in a si maw asiloah tuahsernak hi khamhnak ca ah a herh maw? Jesuh Khrih ka zumhnak lawng in khamhnak hi ka hmu maw asiloah Jesuh Khrih ka zumh pin ah tuahsernak hi a herh rih maw?

Zumhnak lawng in khamhnak timi le zumhnak le tuahsernak timi kong ah hin Bible nih a chim veve. Cucaah hihi fonhtonh awk ah an buaipi ciomi a si. Roman 3:28, 5:1 le Galatians 3:24 hi James 2:24 he tahchun hmanh. Cheukhat nih cun Paul le James hi an i dang tiah an ruah. Paul nih zumhnak lawng a chim i James nih zumhnak lawng a pom lo, tuahsernak zong a chimchih, cucaah an i dang tiah an chim. Hi an i dannak hi `ha tein James a chimmi kan zoh tikah i dannak a um lomi a si. James nih a chim duhmi cu zumhnak cu tuahsernak nih a zulh hrimhrim awk a si timi kha a si (James 2: 17-18). Jesuh Khrih a zum taktakmi a si ahcun nun thlennak a ngei lai, tuahsernak `ha a ngei lai ti kha a si (James 2: 20-26). Thiamcoter kan sinak hi zumhnak le tuahsernak a si ti kha James nih a chim duhmi a si lo. Zumhnak nih thiam a coter cangmi cu tuahsernak `ha nun a ngei lai ti tu kha a si. Mi pakhatkhat nih zumtu ka si a ti i tuahsernak `ha a ngeih `ung lo ahcun Jesuh Khrih ah zumhnak dik taktak a ngeih lo caah a si (James 2:14, 17, 20, 26).

Paul nih cu `hiam`hiam cu a chimmi a si. Zumtu nunnak ah theipar `ha a chuah awk a simi kha Paul nih fiang tein a chim. Thlarau theipar cu a si. Zumtu nih Thlarau theipar ngeih lo cu a si kho lomi a si. A ngeih lo ahcun James nih a chim bang khan a thimi zumhnak an ngeih caah a si khomi a si (Gala 5: 22-23). Khamhnak cu zumhnak in a si, tuahsernak in a si lo tiah a chim khawh ah khan (Ephe 2: 8-9), Paul nih a kan chimh `hanmi cu thil `ha tuah ding in sermi kan si tiah a chim colh (Ephe 2: 10). James nih a chim bantuk in Paul zong nih a chim ve. An i tinhmi zong aa khat veve ko. “Cucaah aho hmanh Jesuh Khrih ah an um cang ahcun ser tharmi an si cang; thil hlun kha an lo i thil thar aa thawk cang,” a ti (2 Korin 5: 17). Khamhnak kong ah an cawnpiaknak aa dang lo. Zumhnak an chimning tu ah khan an hmuhning dang veve in an chim caah a si. Paul nih khamhnak cu zumhnak lawng in a si a ti ah khan James nih cun zumhnak dik taktak nih cun tuahsernak `ha kha a chuahpi awk a si timi kha karhlei lam in a chimmi tu a si.

English
Hakha holh in leh mi ahramthawk ah vazoh than

Khamhnak Hi Zumhnak Lawng In A Si Maw Asiloah Tuahsernak Aa Telchih Maw?