Bia halnak
Jesuh Khrih Hi Pathian A Si Ko Tiah Bible Nih A Chim Maw?
Bia lehnak
Jesuh Khrih nih keimah hi Pathian ka si tiah a ti bal lo. Asinain Pathian a sinak fiang tein a langhter peng, a zultu hna zong nih Jesuh Khrih Pathian a sinak hi fiang tein an theih dih. Jesuh Khrih nih sualnak a ngaihthiam khawh timi an zumh—sual ngaihthiamnak hi Pathian lawng nih a tuah khawhmi a si—Pathian thin a huntertu hi sualnak a si (Lamkaltu 5:31; Colosa 3:13; Salm 130:4; Jeremiah 31:34). Jesuh Khrih hi Pathian a si bantuk in mithimi hna le a nungmi hna bia a ceih hna lai (2Tim 4: 1). Thomas nih Jesuh cu, “Ka Bawipa le ka Pathian,” tiah khupbil in a hmai ah a kun (John 20: 28). Paul nih Jesuh Khrih cu, “A liannganmi Pathian le khamhtu,” a ti (Titus 2: 13). Jesuh Khrih hi vawlei ah a rat hlan ah, “Pathian muisam” a ngeimi a si (Philip 2: 5-8). Pa Pathian nih Jesuh Khrih a timi cu “Maw Pathian, na `hutdan cu a zungzal in a hmun lai,” a ti (Hebrew 1: 8). Johan nih a chimmi cu, “A hramthawk ah bia cu a um i, Bia cu Pathian he an um i, Bia cu Pathian kha a si,” a ti (Johan 1: 1). Jesuh Khrih Pathian a sinak Bible caang tampi a um (Biathlam 1:17, 2:8, 22:13; 1 Korin 10:4; 1 Peter 2:6-8; Psalm 18:2, 95:1; 1 Peter 5:4; Hebrews 13:20).
Biakam Hlun ah Pathian lawng nih aa tlakmi min zong Jesuh Khrih cu pek a si ve. “Khamhtu” timi hi Pathian ca lawng ah Biakam Hlun ah hman a si (Psalm 130:7; Hosea 13:14), asinain Biakam Thar ah Jesuh Khrih zong khamhtu tiah min pek a si ve (Titus 2: 13, Biathlam 5: 9). Jesuh Khrih hi Emmanuel tiah auh a si, a sullam cu “Pathian kan sin ah a um” ti a si (Matthew 1). Zechariah 12: 10 ah Pathian nih a chimmi cu, “Fei in an chunhmi keimah kha an ka zoh te lai,” tiah a chim. Biakam Thar ah Jesuh Khrih vailam an tahnak i a hnak fei in an chunhnak kha a hmuhsakmi a si (Johan 19:37; Biathlam 1:7). A hnak fei in an chunhmi YHWH Pathian a si. Isaiah 45: 22-23 ah chimmi kha Paul nih Philipi 2: 10-11 ah a chim `han. Cu pin ah Jesuh Khrih a min hi Pathian min he hman`i a si, “Kan Pa Pathian le kan Bawipa Jesuh Khrih vel le daihnak cu nan sin ah um ko seh” (Gala 1: 3; Ephe 1: 2). Jesuh Khrih hi Pathian taktak si hlah seh law, serhsatnak bia menmen ah kan ruah khawh asinain Paul nih a chim duhmi cu Jesuh Khrih Pathian a sinak kha a si. Jesuh Khrih nih a zultu hna nawl a pek hna ah khan, “Pa le Fapa le Thiang Thlarau min in” tiin a chim. “Min” tinak zawn ah hin Lai Holh cun a tlawm a tam aa hngal lo nain mirang in cun hngalh khawh a si. Cu tikah a tlawm in Jesuh nih a hman. Asullam cu Thumkomh Pathian kan timi hna hi Pathian pakhat kha a si ko (Matthew 28: 19; 2 Korin 13: 14).
Pathian lawnglawng nih a tuah khawhmi thil ah Jesuh Khrih zong thiamcoter a si ve. Jesuh Khrih nih mithi lawng thawhter loin (Johan 5:21, 11:38-44), sualnak zong a ngaihthiam hna (Lamkaltu 5:31, 13:38), Jesuh Khrih hi vawlei sertu le a dawmhtlaitu zong a si (Johan 1: 2; Colosa 1: 16-17). Pathian nih vawlei ser ah hin keimah lawng ka si a timi zawn ah hin a fiang chin rih (Isaiah 44: 24). Jesuh Khrih hi vawlei sertu le a dawmhtlaitu a si ahcun Pathian a si tinak a si ko. Cu pin ah Jesuh Khrih nih Pathian a ngeihmi paoh a ngeih ve: zungzal nunnak (Johan 8:58), khawika paoh ah umnak (Matthew 18:20, 28:20), zeizong vialte a hngal dihmi (Matthew 16:21), cun zeizong vialte a tuah khomi (Johan 11:38-44).
Cun Jesuh Khrih nih Pathian a sinak langhternak caah khuaruahhar thil tampi a tuah. Khuaruahhar thil a tuahmi tlawmpal in kan chim ahcun: ti kha misurzu ah a canter (Johan 2: 7); ti cungah a kal (Matthew 14: 25); changreu le nga a karhter (Johan 6: 11); mit caw a damter (Johan 9: 7); kebei a damter (Mark 2: 3); mizaw a damter (Matthew 9: 35; Mark 1: 40- 42); cun mithi a thawhter (Johan 11: 43-44; Luke 7: 11-15; Mark 5: 35). Jesuh Khrih hrimhrim kha thihnak in a tho `han.
Khrihfa a si lomi hmanh nih Jesuh Khrih kong an zumhnak lam 12 a um:
1. Jesuh Khrih vailam an tahnak
2. An vuinak
3. A thihnak nih a zultu hna zumhnak lung a donghternak
4. A thih hnu ni thlawmpal a thlankhor a lawnnak.
5. Jesuh Khrih a thawh `han hnu ah a zultu nih an hmuh.
6. A thawh`hanmi an hmuh tikah ral`hatnak in an khat.
7. A thawh`hannak hi biatak tein `uan lio Khrihmi nih an phuanmi a si.
8. Jerusalem in an thawk hmasa.
9. Thawng`ha an chimnak thawng in Khrihfabu aa sem i a karh chinchin.
10. Thawh`hannak ni (Bawipa Ni) nih Jew Sabbath (Niruk ni) a thlenpiak hna.
11. Jesuh Khrih a thawh`hannak James nih a hmuh tikah Khrihfa ah a cang.
12. Khrihfa ral taktak a simi Paul zong Khrihfa ah thlen a si. Jesuh Khrih a hmumi ah aa tel ve.
Cheukhat nih Jesuh Khrih Pathian a sinak, a thawh`hannak, aa langhnak an zum lo. Asinain minung nunnak a thlenmi hna hi philh awk a `ha lo. Jesuh Khrih hi Pathian si hlah seh law, nunnak a thlen ding hi a si kho lomi a si. Cun Jesuh Khrih hi Pathian a si taktak hi a zultu hna nih hngal hna hlah seh law an nunnak an pe siang lai lo. A zultu nunnak tuanbia kan zoh tik hna ah an zumhnak ruang ah a thimi lawngte an si hna. Amah thih in a thimi cu mi tlawmte an si. Cucaah Jesuh Khrih hi Pathian a si lo ti awk a `ha lo.
A donghnak ah, Jesuh Khrih nih Pathian a sinak hi fiang tein a chim. A dikmi Pathian a si; A zultu hna nih Pathian a si kha an hngalh i nunnak pek in an zumhmi a si. Khuaruahhar thil a tuahnak in Pathian a sinak a langhter, a thawh`hannak in Pathian a sinak a langhter. Jesuh Khrih hi Pathian a si lo tiah al awk a `ha lomi a si. Bible nih Pathian a si, a ti.
English
Jesuh Khrih Hi Pathian A Si Ko Tiah Bible Nih A Chim Maw?