Ka Thih Tikah Vanram Ah Ka Kai Hrim Lai Timi Hi Zeitin Dah Kan Hngalh Khawhning A Si Lai?


Bia halnak: "Ka Thih Tikah Vanram Ah Ka Kai Hrim Lai Timi Hi Zeitin Dah Kan Hngalh Khawhning A Si Lai?"

Bia lehnak:
Ka thih tikah zungzal nunnak ka ngei hrimhrim lai ti mi naa zumh ngam maw? Ka thih tikah vanram ah ka kai hrim lai ti mi naa zumh ngam maw? Pathian nih i fiang seh ti an duh! Bible nih, “Zungzal nunnak kan ngei cang tiah nan theih khawhnak ding ah Pathian Fapa a zummi paoh nan sin ah hihi ka rak `ial,” tiah a ti (1 John 5:13). Tahchunnak ah atu bak ah hin Pathian hmai ah na hei dir hnga i an hal hnga, “Zei ruang ah dah vancung ah kan kaiter lai?” an ti hnga. Zeitin dah na leh hnga? Leh awk na hngal lo kho men. Na theih awk cu Pathian nih a kan dawt i lam a kan serpiak. “Pathian nih vawlei hi a dawt hringhran caah a Fapa ngeihchun kha a pek. Cucaah amah a zummi paoh cu an rawk lai lo, sihmanhsehlaw zungzal nunnak an ngei lai” (John 3: 16).

Kan hngalh awk ah a herh ngaimi cu zei nih dah vancung kai hi a kan donh timi hi a biapi ngai. Asiloah zei hi dah Pathian he a kan `hentu a si timi kan theih a herh ngai. Cucu kan sualnak hi Pathian he a kan `hentu a si, vancung kainak lam a kan phih piaktu a si. Minung cu duh thim te le kokek sinak in misual kan si. “Kan zapi tein kan sual dih cio ko i Pathian sunparnak kha kan chambau dih cio ko hna,” tiah Paul nih fiang tein Rom mi hna sin ah a `ial (Rom 3:23). Kanmah tein kan i khamh kho lo. “Zei ca ah tiah zumhnak le vel thawng in khamhmi nan si, nanmah thiltikhawhnak a si lo, Pathian laksawng a si. Tuahsernak zong in a si lo, cucaah phorhlawt ding nan ngei lo,” tiah Paul nih Efesa mi sin ah a chim (Ephesa 2:8-9). Thihnak le Hell lawnglawng hi aa tlakmi kan si. “Zei ca ah tiah sual man cu thihnak a si,” tiah Cathiang nih a ti (Rom 6:23).

Pathian hi a thiangmi le a dingmi a si caah sualnak cu dan a tat ko, asinain a kan dawt i kan sual man ca ah ngaihthiamnak lam a kan serpiak. Jesuh Khrih nih, “Keimah cu lam le biatak le nunnak ka si. Keimah in dah ti lo cu Pathian sin ah an phan kho lai lo,” tiah a ti (John 14:6). Kan ca ah Jesuh Khrih nih vailam cung ah a kan thihpiak. “Zei ca ah tiah Jesuh Khrih cu kan ca ah voikhat in za lak in a kan thihpiak cang, Pathian sin ah ratpi awk ah mi `halo ca ah mi`ha nih a kan thihpiak cang,” tiah Peter nih a ti (1 Peter 3:18). Jesuh Khrih cu thihnak in a tho `han: “Amah cu kan sual ruang ah thihter a si i Pathian he kan i rem nakhnga ding ah nunnak ah thawhter a si,” a ti (Rom 4:25).

Cucaah kan biahalmi ah khan—ka thih tikah vancung ah ka kai hrimhrim lai timi hi zeitin dah ka hngalh khawh lai? ti a si. Bialehnak cu, Jesuh Khrih kha zum law khamh na si ko lai (Acts 16:31). “Amah a cohlang i a min a zummi paohpaoh cu Pathian fa sinak nawl kha a pek hna.” timi kan hmuh (John 1:12). Zungzal nunnak hi a lak tein na hmuh khawhmi a si. Pathian laksawng cu Jesuh Khrih ah zungzal nunnak a si,” tiah Paul nih a ti (Romans 6:23). Atu hin nun duhdim nun na ngei kho colh ko. Jesuh Khrih nih cun, “Kei cu nunnak an ngeih i a liam in a liammi duhdim nunnak an ngeih khawh nakhnga ca ah ka ra,” a ti (John 10:10). Vancung ah Jesuh Khrih he zungzal in na nun`i kho, zei ca ah tiah bia a kan kamh: “Ka kal ahcun nan ca ah umnak hmun kan serpiak hna lai, ka rak ra `han lai i ka umnak hmun ah kan kalpi ve hna lai,” a kan ti (John 14:3).

Jesuh Khrih hi a ka khamhtu a si tiah na cohlan duh i Pathian sin in sual ngaihthiamnak hmuh na duh ahcun, hitihin thlacam khawh a si ko. Asinain thlacamnak menmen in khamhnak hi hmuh khawh a si ve lo. Jesuh Khrih hi ka sualnak a kan ngaithiamtu a si tiin na zumh hrimhrim a herh. Hi thlacamnak cu Pathian sin ah kan lawmhnak langhter khi a si. “Pathian, kei cu na hmai ah misual ka si i thih ding aa tlakmi ka si. Asinain Ngaihthiam ka si khawh nakding ah Jesuh Khrih nih ka ca ah a ka inpiak. Khamhnak na ka serpiakmi cung ah ka zumhnak ka chiah cang. Na dawtnak le na vel ruang ah kaa lawm. Amen.

GotQuestions.org ah Pathian thawng`ha na relnak thawngin Jesuh Khrih na zum maw? Na zumh ahcun, a tang ah aa `ial mi “Nihin in Jesuh Khrih ka zumh cang” timi kha hmet ko.



English
Hakha holh in leh mi ahramthawk ah vazoh than

Ka Thih Tikah Vanram Ah Ka Kai Hrim Lai Timi Hi Zeitin Dah Kan Hngalh Khawhning A Si Lai?