Pathian Nih Zei Bantuk Sining Hna Dah A Ngeih: Pathian Hi Zei He Dah An I Lawh?


Bia halnak: "Pathian Nih Zei Bantuk Sining Hna Dah A Ngeih: Pathian Hi Zei He Dah An I Lawh?"

Bia lehnak:
Bible nih Pathian a sining le zei he dah aa lawh timi a kan chimh. Bible hi um hlah seh law, Pathian kong kan chimrelmi hna hi kan ruahnak menmen an si hnga i zumh awk taktak a tlak hnga lo. Asinain Pathian nih Bible ah a sining kan hngalh awk ah a herhmi vialte cu a kan pek dih. Pathian nih rak ka hngal hna seh ti hi a kan duhpiakmi a si. Pathian sining dik tein chimrel khawh hi Pathian nih a duhmi a si (Job 42:7). Pathian sining `ha tein thei huaha loin biak hi siasal biak he aa khat (Exodus 20:3-5).

Pathian nih amah kong aa phuanmi lawng hi kan hngalh khawh. Aa phuan lomi cu kan hngal kho lo i tuak zong a hau lo. A si loning hna in kan chim sual lai i Pathian a si lomi hna kha Pathian bantuk ah kan ruah lai. Pathian sining pakhat cu “ceunak” a si, asullam cu kan hngalh khawhnak ding ah amah tein aa phuangmi Pathian a si (Isaiah 60:19; James 1:17). Pathian nih aa phuannak biaphuan hna hi kan daithlanh ding an si lo. Vawlei ser hramthoknak, Bible, Bia kha taksa ah a cang ti bantuk hna nih hin Pathian hi zei he dah an i lawh timi a kan chim.

Pathian cu a kan sertu a si i kanmah cu a sermi kan si (Genesis 1:1; Psalm 24:1). Amah muisam keng in sermi kan si. Minung hi a sermi vialte lak ah a sang bikmi hmun ah chiah kan si, uktu le zohkhenhtu dirhmun pek zong kan si chih (Genesis 1:26-28). Sualnak nih sermi thil vialte hna cu a mawtter dih hna, asinain Pathian rian`uannak cu a hrawk kho dih lo (Genesis 3:17-18; Romans 1:19-20). Sermi thil an i dawhnak, khuaruahhar an sinak, an nganning le ningcang tein an umning zoh tikah Pathian thang`hat lo awk a `ha lo.

Pathian min hngalhnak nih Pathian hi zei dah a lawh timi tampi kan hngalh khawh lai. Cucu a tanglei bantuk in an si:

Elohim – a `hawngmi (Genesis 1:1)
Adonai – Bawipa, Bawi le sal pehtlaihnak (Exodus 4:10, 13)
El Elyon – A sang bikmi, a `hawng bikmi (Genesis 14:20)
El Roi – Zeizong vialte a hmu khotu (Genesis 16:13)
El Shaddai – Lianngan Pathian (Genesis 17:1)
El Olam – Zungzal a nungmi Pathian (Isaiah 40:28)
Yahweh – Keimah cu zungzal in a ummi ka si (Exodus 3:13, 14).

Pathian cu a hmun zungzalmi a si, a sullam cu hramthawknak le donghnak a ngei lo. A thi kho lomi a si i limit a ngei lomi a si (Deuteronomy 33:27; Psalm 90:2; 1 Timothy 1:17). Aa thleng bal lomi le bochan awk le zumh awk aa tlakmi a si (Malachi 3:6; Numbers 23:19; Psalm 102:26, 27). Pathian hi aho he hmanh in tahchun ding a ngei lo, a sining le a rian`uannak ah amah bantuk in thil a ti khomi an um. A tlingmi Pathian a si, a sullam cu chambaunak a ngei lo (2 Samuel 7:22; Psalm 86:8; Isaiah 40:25; Matthew 5:48). Kan hngalh awk ah a `ha lomi le kawl awk a `ha lomi Pathian a si (Isaiah 40:28; Psalm 145:3; Romans 11:33, 34).

Pathian cu a dingmi a si, a sullam cu a dik lomi thil tuah a duh lo. Thleidannak a ngei lo i aho hmanh upat deuhmi minung a ngei lomi a si (Deuteronomy 32:4; Psalm 18:30). Pathian nih tuah khawh lomi a ngei lo, cun amah a sining loin zei hmanh tuah a duh lo, asining hoih tein rian a `uanmi Pathian a si (Biaphuan 19:6; Jeremiah 32:17, 27). Pathian cu khawika paoh a ummi a si. Asinain Pathian hi zeizong vialte cu a si lo (Psalm 139:7-13; Jeremiah 23:23). Pathian cu zeizong vialte a hngalmi a si, a hngalh lomi a um lo, hmailei ah a um te dingmi zong a hngalh dih cia, cucaah zeizong vialte a khanmi le a tuahmi ah palhnak le tuahsualnak a ngei lomi Pathian a si (Psalm 139:1-5; Ptb. 5:21).

Pathian cu pakhat a si; Pathian pin ah a dang Pathian an um ti lo. Pathian lawnglawng hi minung kan sining a hngal dih tu le duhnak a tlinter khotu bik a si. Pathian lawnglawng hi biak awk aa tlakmi le pumpek aa tlakmi a si (Deuteronomy 6:4). Pathian cu a thianghlimmi a si, cucaah Pathian nih sualnak le palhnak dantat loin a um lo, zei ca ah tiah a sining he aa tlak lomi an si. Kan sualnak ngaihthiam awk Jesuh Khrih kan ca ah a thihternak a si. Kanmah nih kan sual dingmi kha kan tuar ding a si, zungzal in a thi dingmi kan si, hell ah a zungzal in a tla dingmi kan si, asinain Pathian nih a kan dawt caah kanmah kha dantat loin a Fapa Jesuh Khrih a kan pek (Exodus 9:27; Matthew 27:45-46; Rome 3:21-26).

Pathian cu zeizong vialte cung ah nawlngeitu bik a si. A sermi thil vialte hna nih Pathian khuakhannak kan thleng kho lo (Psalm 93:1; 95:3; Jeremiah 23:20). Pathian cu Thlarau a si, hmuh khawh a si lo (John 1:18; 4:24). Pathian cu Thumkomh Pathian a si: Pa, Fa Le Thiang Thlarau, an sining aa khat dih, an `hawnnak le sunparnak zong aa khat dih. Pathian cu biatak a si, thurhnomhter khawh a si lo, lih a chim kho lomi Pathian a si (Psalm 117:2; 1 Samuel 15:29).

Pathian cu a thianghlimmi a si, sualnak he aa ralkahmi a si. Pathian nih thil `halo a hmuh i a thin an hunter. Pathian cu a alhmi mei bantuk a si (Isaiah 6:3; Habakkuk 1:13; Exodus 3:2, 4-5; Hebrews 12:29). Pathian cu velngeihnak a ngeimi a si. Rak ka hngal hna seh ti a kan duhmi Pathian a si (Exodus 34:6; Psalm 31:19; 1 Peter 1:3; John 3:16, 17:3). Pathian cu hramthawknak le donghnak a ngei lomi a si bantukin minung nih Bible nih a chimmi pin ah kan hngal kho ti lo. Bible lawnglawng in Pathian hi aho dah a si, zei he dah an i lawh, zei bantuk ziaza dah a ngeih timi kan hngalh khawh. Asinain Bible nih Pathian kawl hi a kan fial lengmangmi a si. A zungzal in Pathian kawl hi ngol hna hlah usih (Jeremiah 29:13)!

English
Hakha holh in leh mi ahramthawk ah vazoh than

Pathian Nih Zei Bantuk Sining Hna Dah A Ngeih: Pathian Hi Zei He Dah An I Lawh?