Minung Nunnak A Sullam Hi Zei Dah A Si?


Bia halnak: "Minung Nunnak A Sullam Hi Zei Dah A Si?"

Bia lehnak:
Minung nunnak a sullam hi zeidah a si? Zeitin dah nunnak ah hin hlawhtlinnak, diriamhnak, sullam a ngeimi nunnak kan hmuh khawh lai? Zeitin dah minung kan nunnak ah min `hatnak ti bantuk kan hmuh khawh lai? Mi tampi nih hi bia halnak hna hi an nunnak ah an ruah zungzalmi hna an si. A luan cia an nunnak an zoh `han tikah zei ruang ah dah kha bantuk thil kha kan rak ton, zei ruang ah dah ka nunnak ah hin hnangamnak a um khawh hnga lo, zei ruang ah dah chawva lei in kan za ko nain kan nunnak ah lawmhnak hi a um khawh lo an ti cio hna. Tlik zuamnak ah a minthang ngaimi pa bia an rak hal i a lehmi hna cu, “Hlawhtlinnak sang bik hmun zong ah zei hmanh a um hlei lo timi hi mi pakhatkhat nih an rak ka chimh lo cu a poi tuk,” tiah a rak ti hna. A ruang cu hi pa hi minthang taktak ah aa chuah nain a chawva le a rumnak nih a nun an nuamhter deuh hlei lo. Aa ruahning bantuk in a hlawhtlinnak nih an rak lawmhter kho lo. Cu bantuk in chawva, hlawhtlinnak le rumnak an kawl hna i nunnak ah lawmhtertu an si lo zia kha minung nunnak tampi ah kan hmuh hna.

Atu kan chan ah hin cun minung nih kan kawlmi hi hnangamnak le lawmhnak lanwgte kan kawl cang. Hnangamnak le lawmhnak hi chawva, rumnak, nu le pa nuamhnak, hawikom, thil `ha tuah in kan hmuh khawh lai tiah kan ruah. Asinain minung nunnak kip ah kan hmuhmi cu vawlei chawva, nuamhnak le a phunphun an tuah dih i an hmuh ko hna nain an thinlung ah hngangamnak le lawmhnak a um hlei lo. Zei hmanh nih an nunnak ah lawmhnak a pe kho hlei hna lo.

Phungchimtu nih a chim, “Nunnak hi sullam ngei lo a si! sullam ngei lo a si!... sullam ngei lo taktak a si! zeihmanh hi sullam ngei lo an si,” a ti (Phungchimtu 1: 2). Phungchimtu a `ialtu Siangpahrang Solomon hi rel cawklo in rumnak a ngeimi a si. Amah chan lio a si ah, kanmah chan a si zong ah Solomon bantuk in a fimmi an um lo. A `ha bikmi zu le ti rawl ei cawklo in a ngei i nuamhnak a phunphun a ngei mi pa a si. A chimmi cu kan thinlung nih tuah a duhmi paoh cu ka tuah dih a ti. Asinain, “Pathian lo cun nunnak zong hi sullam ngei lo a si,” a ti. Zei ca ah dah nunnak hi sullam a ngeih lo? Pathian nih hin minung hi a ser sawhsawhmi kan si lo. Solomon nih a chimmi cu, “Pathian nih minung thinlung chung ah a hmun zungzalmi thil a chiah,” a ti (Phungchimtu 3: 11). Cucaah Pathian le minung hi pehtlaihnak an ngeih lo ahcun minung nunnak cu sullam ngei lo a si.

Genesis ah kan hmuhmi cu Pathian nih minung cu amah muisam ngei in sermi kan si (Gen 1: 26). A sullam cu minung hi Pathian he aa lo bikmi kan si. Kan hmuh `han khawhmi cu minung hi sualnak ah an tluk hlan le sualnak vawlei cung i a um hlan ah, thil a ummi hna cu: 1) Pathian nih minung hi hawikom ngei ding in a sermi kan si (Gen 2: 18-25), 2) Minung cu rian`uan ding in sermi kan si (Gen 2: 15), 3) Pathian nih minung cu a hawikom ah a sermi kan si (Gen 3: 8), cun 4) Pathian nih minung cu vawlei uktu ding ah chiahmi kan si (Gen 1: 26). Zei dah an sullam a si? Pathian nih hi vialte hna hi kan nunnak ah tlinter aa timhmi an si. Asinain sualnak nih a hrawh dih hna caah Pathian timhpiaknak tling kho loin a umnak an si. Cutikah minung nih kan tuarnak hi a si.

Biathlam ah kan hmuhmi cu Pathian nih atu kan vawlei hi ka hrawh lai i van le vawlei `har ka ser lai, a ti. Cutikah cun khamhnak a hmumi minung he i hawikomhnak thar ka ser lai, a ti. Khamhnak a hmu lomi hna cu biaceih an si lai i hell ah thlak an si lai, a ti (Biathlam 20: 11-15). Vawlei cung sualnak hi hrawh a si lai; sualnak, zawtnak, thihnak, ngaihchiatnak le fahnak an um ti lai lo (Biathlam 21: 4). Pathian fale kan si cang lai (Biathlam 21: 7). Zungzal in Pathian he hawikomhnak kan ngei cang lai. Khi tikah cun vawlei nunnak hi hna a ngam cang lai, duh a tling cang lai. Zeitin dah cucu kan hmuhning an si te lai?

Jesuh Khrih Thawng Nunnak Pek ~han Kan Si

A hmun zungzalmi nun nuamhnak cu Pathian he pehtlaihnak kan ngeihnak in kan hmuh khawh lai. Pathian loin khawika hmanh in kan nun hnawhchanmi nunnak hi kan hmu kho lai lo. Pathian he pehtlaihnak hi Jesuh Khrih thawng lawnglawng in a si kho (Lamkaltu 4:12; Johan 1:12; 14:6). Jesuh Khrih kan zumh i kan sualnak kan i ngaichih ah khin zungzal nunnak cu pek kan si. Cun Jesuh Khrih nih kan nunnak cu a kan thlen i, ser tharmi a kan siter, cuticun Jesuh Khrih cu a ka khamhtu a si tiah kan cohlan.

Nun nuamhnak taktak hi Jesuh Khrih kan zumhnak lawng in kan hmuhmi a si lo. Nun nuamhnak kan hmuh aa thawknak cu Jesuh Khrih kan zumh i kan zulh ah khin a si. Toidornak nun kan ngeih, thlacam nun kan ngeih, Bible kan relnak, a kong kan cawnnak ti bantuk in caan kan pek deuhdeuh ah hin nun nuamhnak hi kan hngalh kho deuhdeuh. Jesuh Khrih nih a chimmi cu, “Rethei le thilrit mi vialte hna, ka sin ah ra tuah u, dinhnak kan pek hna lai. Ka seihnam kha i bei u, kei cu nunnem le mitoidor ka si caah ka nawl hi i cawn ve u; cun dinhnak kha nan hmuh lai. Ka seihnam cu a bei a nuam i ka thil cu a zaang,” tiah a ti (Mathew 11: 28-30). “Nun duhdim an ngeih nakhnga ka ra,” tiah a ti (John 10: 10b). Cun Jesuh nih a zultu cu a thawh hna i, “Aho hmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh. Zei ca ah tiah aho hmanh, mah nunnak humhak a duhmi cu a nunnak kha a sung lai i keimah ruang ah a nunnak a sungmi cu a nunnak a hmumi a si lai,” a ti (Matthew 16: 24-25). Salm ca`ialtu nih a chimmi cu, “Pathian ah hin i lawm zungzal law na saduhtahhnak cu an pek ko lai,” a ti (Salm 37: 4).

Bible nih a kan cawnpiakmi vialte ah hin duhthimnak kan ngei. Kanmah duhning in kan nunnak hi kan hruai khawh i hnangamnak ngei loin kan um peng kho, asiloah Pathian hi kan kawl i amah kan zulh ahcun nun nuamhnak kan ngei kho lai. Pathian nih a kan duhpiakmi cu amah he i pehtlaihnak hi a kan duhpiak i nun nuamhnak in nung hna seh ti hi Pathian nih cun a kan duhpiakmi a si. Khrihfa kan nunnak hi puai nganpi zohnak bantuk a si. A man a fakmi `hutnak ticket cawk i naite ah `hut le a man niammi ticket cawk i a hlatnak ah khin va `hut bantuk a si. Naite ah a `humi cu rem tein an zoh khawh pin ah fiang tein an hmuh khawh i an i nuam, asinain a hlatnak ah a `humi hna cu rem tein an hmuh khawh lo pin an hmuhmi a fiang lo lo i re a thei khun. Cu bantuk in Pathian hi naite in pehtlaihnak kan ngeih ahcun kan nun hi a nuam hrimhrim ko lai. Pathian nih nun nuamhnak kan ngeih khawhnak ding ah a kan sawm lengmang, cucaah kan duhmi hmuh kan duh ahcun Pathian hi kan nunnak ah a biapi bikmi ah kan chiah awk a si. Lam dang a um lo!

English
Hakha holh in leh mi ahramthawk ah vazoh than

Minung Nunnak A Sullam Hi Zei Dah A Si?