Khrihfa Timi Hi Zei Dah A Si, Cun Zei Dah An Zumhmi A Si?


Bia halnak: "Khrihfa Timi Hi Zei Dah A Si, Cun Zei Dah An Zumhmi A Si?"

Bia lehnak:
Khrihfa kan zumhmi a hrampi cu 1 Korin 15:1-4 ah lamkaltu Paul nih a chim. Jesuh Khrih cu ka sualnak ca ah a thi, an vui, thawhter`han a si, cuticun a zummi paoh hna cu khamhnak a pek hna. Biaknak vialte nakin Khrihfa kan zumhnak aa dannak cu tuahsernak sawhsawh si loin pehtlaihnak hi a si. Pathian he pehtlaihnak kan ngei. Cucu tuah, cucu tuah hlah timi phunglam si loin Khrihfami hna cu Pathian he hawikomhnak ngeih peng hi thazaang pek kan si. Jesuh Khrih le Thiang Thlarau rian`uannak thawng in Khrihfami hna cu Pathian he pehtlaihnak ngeihter kan si.

Hi Khirhfami zumhnak pin ah hin, Khrihfami nih kan tuah ding tete an um rih hna. Khrihfami nih kan zumhmi cu Bible hi Pathian bia a si tiah kan zumh, “Pathian thawchuah hnawhmi a si.” Kan zumhnak le kan tuahsernak kip ca ah nawlngeitu a si (2 Timothy 3:16; 2 Peter 1:20-21). A sullam cu Bible nih tuah hlah a kan timi cu kan tuah lo ding a si, tuah a kan timi cu kan tuah awk a si, zei ca ah tiah Pathian bia a si. Bible zumh lo cu Pathian zumh lo he aa khat. Pathian hrimrim nih tuah u a kan timi a si tiin kan pom a hau. Pathian hrimhrim nih tuah hlah u a kan ti tiin kan pom a hau. Cun Khrihfami nih Pathian cu Thumkomh Pathian: Pa, Fapa le Thiang Thlaraua si tiah kan zumh.

Khrihfami nih kan zumhmi cu minung cu Pathian he pehtlaihnak ngei ding in sermi kan si ti a si. Asinain sualnak nih minung cu Pathian he `henter kan si (Rom 3:23; 5:12). Khrihfami nih kan cawnpiakmi cu Jesuh Khrih cu vawlei a tlon lioah khan Pathian-Minung a si kan ti (Philippians 2:6-11), a sullam cu Jesuh Khrih kha minung sinak tling a ngei i Pathian sinak tling zong a ngei. Cun vailam cung ah a thi i, a tho `han. Khrihfami nih kan zumhmi cu a thih hnu ah Jesuh Khrih cu vui a si, a tho `han i atu cu Pathian orhlei kam ah a `hu cang, zumtumi hna ca ah Pathian sin ah thla a kan campiak cang (Hebrew 7:25). Cun Khrihfami nih kan zumhmi cu Jesuh Khrih a thihnak nih hin kan sual man leiba tling tein a cham dih cang ti a si. Cuticun Pathian he pehtlaihnak a kan serpiak cang (Hebrew 9:11-14; 10:10; Roman 5:8; 6:23). Kanmah tein Pathian kan panh kho cang. Jesuh Khrih thawng in kannih cu tlangbawi kan si cang (1 Peter 2:9). Kan sualnak zong kanmah tein Pathian sin ah kan i chim khawh cang. Cucu Jesuh Khrih nih a kan serpiakmi a si.

Khrihfami nih kan cawnpiakmi cu kan thih tikah vancung kainak ding ah kan tuah awk a herhmi cu Jesuh Khrih le a tuahsernak vialte hna hi kan zumh hrimhrim an hau. Jesuh Khrih hi ka ca ah a thi tiah kan zumh, kan sual man a kan pekpiak tiah kan zumh, a tho `han tiah kan zumh ahcun khamh kan si lai. Khamhnak kan hmuh khawhnak ding ah kanmah tein kan tuah khawhmi a um lo. Kan thil `ha tuahmi nih Pathian lung a tong kho lo, zei ca ah tiah kannih cu misual kan si (Isaiah 53:6; 64:6-7). Kanmah tein kan khamhnak ca ah kan tuah ding zong a um lo, Jesuh Khrih nih tling tein a kan tuahpiak dih cang. Vailam cung ah a um lio ah khan, Jesuh Khrih nih a chimmi cu, “A dih cang,” a ti (Johan 19:30), a sullam cu kanmah khamhnak ca ah a tuahsernak vialte aa lim cang.

Khrihfami nih kan zumh rihmi cu khamhnak kan timi hi sualnak in kan luat i, zalong tein Pathian he pehtlaihnak ngeih khawh hi a si. Khamhnak kan hmuh hlan ah cun sualnak sal kan si i khamhnak kan hmuh hnu ah cun Jesuh Khrih sal kan si, a sullam cu Jesuh Khrih nawl kha kan ngaih awk a si cang (Romans 6:15-22). Hi kan pumsa in vawlei ah kan um chung paoh cu sualnak he hin kan i pai peng lai. Asinain Khrihfami nih sualnak kan teinak ding cu Pathian bia theih i kan nunnak hman peng a hau, cun Thiang Thlarau nih a kan uk zungzal awk a si. Thiang Thlarau hruainak hi Khrihfa kan sinak ah a biapi tukmi a si. Thiang Thlarau hruainak kan zulh khawhnak ding cu: “dawtnak, lawmhnak, daihnak, lungsaunak, zaangfahnak, ṭhatnak, zumhawktlakmi sinak, toidornak le mah le mah i tei khawhnak” te hna hi kan ngeih awk a si (Gala 5: 22-23).

Cucaah biaknak dang hna nih cun tuahsernak phunphun an i ser hna i cucu tuah khawh an i zuam, asinain Pathian nih cun a duhmi a si lo. Khrihfami hna cu Jesuh Khrih zumh i a nawl zulh hi fial kan si. Kan sual leiba cu cham a si cang, Pathian he hawikomhnak kan ngei kho cang. Thihnak kan tei cang, a sullam cu thihnak nih thlankhor chung ah a kan hreng kho ti lo. Zungzal nunnak in kan tho `han lai. Hihi Khrihfami nih kan zumhmi cu a si.

English
Hakha holh in leh mi ahramthawk ah vazoh than

Khrihfa Timi Hi Zei Dah A Si, Cun Zei Dah An Zumhmi A Si?