Khamhnak Hi Zeitin Dah Khanning A Si?


Bia halnak: "Khamhnak Hi Zeitin Dah Khanning A Si?"

Bia lehnak:
Taksa si loin Thlarau lei in na rawl a `am bal maw? Na nunnak ah “Hihi cu ka nunnak ah tling kho seh law,” tiah na hlam ngaimi a um bal maw? Na nunnak ah zei thil na tuah hmanh ah diriam kho lo in na um bal maw? Lungdong ngai le vansang au in khua na sa bal maw? Cu ti a si ahcun, Jesuh Khrih hi na herh! Jesuh Khrih nih, “Kei cu nunnak changreu ka si. Ka sin ah a rami cu an rawl a `am bal ti lai lo i a ka zummi paoh cu an ti a hal ti lai lo,” a ti (John 6:35).

Hnabeidong in na um bal maw? Ka nunnak hi sullam a ngei lo tiah lungdong in na um bal maw? San ka tlai lo tiah lungdong in na um bal maw? Khua tuaktan awk thei lo in na um bal maw? Jesuh Khrih nih hitihin a ti, “Kei cu vawlei ceunak ka si. A ka zulmi paoh cu muihnak ah an vakvai bal lai lo, nunnak petu ceunak tu an ngei lai,” a ti (John 8:12).

Na nunnak hi innhrenh chung i a ummi bantuk ah naa ruat bal maw? Nun zalonnak hmuh duh ah chuahnak kutka na kawl bal maw? Nun duhdimnak chung ah luh i nuam tein um ziar hi na hlam bal maw? Jesuh Khrih nih an hngah ko, “Keimah cu luhnak kutka ka si; keimah min in a lutmi paoh cu khamhnak an hmu lai. A lut a chuak kho lai i nun duhdimnak hmun a hmu lai,” tiah a ti (John 10:9).

Midang nih an in deuh bal maw? Midang nih an i hleng bal maw? Na hawikom nih bochan awktlak lo in na cung ah an um bal maw? Midang nih an i serhsat bal maw? Midang nih a miak kawlnak menmen ah an i hmang bal maw? Jesuh Khrih nih hitihin an ti, “Keimah cu tuukhal `ha ka si. Tuukhal `ha nih cun a tuu ca ah a nunnak a pek sian. Keimah cu tuukhal `ha ka si; ka tuu cu ka hngalh hna i anmah zong nih an ka hngalh ve,” a ti (John 10:11, 14).

Thih hnu ah zeitin dah kan um timi hi na ruat bal maw? Na nunnak hi a rawk khomi le a rop khomi thil sawhsawh ca ah nun peng hi na si a vang bal maw? Ka nunnak hi sullam a ngei taktak lo hlah maw tiah lungaw`awm in na um bal maw? Na thih hnu ah nun `han na duh maw? Jesuh Khrih nih zei dah a ka tuahpiak timi na hngal maw? “Keimah cu thawh`hannak le nunnak ka si. Keimah a ka zummi cu a nung lai, a thih hmanh ah a nung lai, a ka zummi paoh cu a thi bal ti lai lo,” tiah Jesuh nih a ti (John 11:25-26).

Na nunnak ah Thlarau rawl na `am tawn men lai. Na hngalh lo in thil dang hna in khimter naa zuam tawn men lai, asinain na khim kho bal lai lo. Jesuh Khrih lawng nih na Thlarau rawl`amnak cu an khimter khawh lai. Jesuh Khrih lawng hi kan harsatnak chung in luatnak ah a kan luatertu a si. Jesuh Khrih lawng hi kan duh a tlintertu a si. Jesuh Khrih lawng hi kan hawi `ha le tukhal `ha taktak cu a si. Jesuh Khrih hi khamhnak lam kan hmuhnak taktak cu a si.

Na Thlarau rawl a `amnak, hnabeidong in na umnak, na nunnak ah lungdong in na umnak vialte hna a ruang hi Pathian he pehtlaihnak na rak ngeih lo caah a si kho men. Bible nih a chimmi cu kan zapi in kan sual dih cio ko hna i, Pathian he pehtlaihnak a ngei lomi kan si,” tiah a ti (Phungchimtu 7:20; Rom 3:23). Ka nunnak a lawng tuk na timi hi na nunnak ah Pathian a um lo caah a si. Minung cu Pathian he pehtlaihnak ngei ding in sermi kan si. Kan sual ruang ah Pathian he pehtlaihnak kan ngeihmi hrawh a si. Kan sualnak nih zungzal hmanh in Pathian he `hen ding kan si (Rom 6:23; John 3:36).

Minung kan nunnak ah duhdim nunnak ngeih kan duh ahcun Jesuh Khrih lawnglawng hi lam `ha taktak cu a si. Kan sualnak man cu kanmah tuarter lo in amah tu nih a kan tuarpiak (2 Korin 5:21). Kanmah thihnak ding ah a kan thihpiak (Rom 5:8), kan sual ruang ah kan hmuh dingmi dantatnak zong amah nih a kan inpiak. Ni thum hnu ah Jesuh Khrih cu a tho `han, thihnak le sualnak a teinak cu a thawh`hannak nih a langhter (Rom 6:4-5). Jesuh Khrih nih zei ca ah dah hihi a tuah? Jesuh Khrih nih a chimmi cu, “Aho hmanh nih hi nakin a ngan deuhmi dawtnak an ngei ti lo, cucu a hawile ca ah a nunnak a thappiak hna,” a ti (John 15:13). Kan nun khawh nakding ah Jesuh Khrih nih a kan thihpiak. Jesuh Khrih ah kan zumhnak kan chiah, kan sual man a kan thihpiak tiah kan zumh, kan sualnak vialte ngaihthiam a si cang tiah kan zumh ahcun khamh kan si. Kan sualnak `awl dih a si cang. Pathian he pehtlaihnak `ha tein kan ngei kho cang. Kan nunnak ah duhdim nunnak a um cang. Thawh`hannak nun kan ngei cang. “Pathian nih vawlei hi a dawt hringhren caah a Fapa ngeihchunte kha a pek, a zummi paoh cu an thi bal ti lai lo, zungzal nunnak an ngei cang lai,” a ti (John 3:16).

GotQuestions.org ah Pathian thawng`ha na relnak thawngin Jesuh Khrih na zum maw? Na zumh ahcun, a tang ah aa `ial mi “Nihin in Jesuh Khrih ka zumh cang” timi kha hmet ko.



English
Hakha holh in leh mi ahramthawk ah vazoh than

Khamhnak Hi Zeitin Dah Khanning A Si?