Pangutana
Unsay gisulti sa Biblia mahitungod sa pagpa plastic/kosmetik nga surihiya?
Tubag
Ang Biblia wala espisipikong nagtubag sa pagpa plastik nga surihiya o pang-arte nga surihiya sa usa ka Cristohanon. Wala gipakita sa Biblia nga ang plastik nga surihiya, sa iyang kaugalingon, sayop. Apan, adunay pipila ka mga butang nga kinahanglang ikonsiderar sa usa ka tawo sa dili pa modesisyon kon mopailalom ba o dili niini nga mga pamaagi sa operasyon. Ang pag-usab sa lawas sa usa ka tawo dili natural, ug kanunay nga adunay mga risgo sa potensyal nga mga epekto, sa pisikal ug sa sikolohikal. Kinahanglan nga walay motugot sa iyang kaugalingon nga “mopailalum sa kutsilyo” hangtod nga dili usa hingpit nga magpaniksik sa tanang mga alternatibo, mga risgo, ug mga dili maayo nga epekto nga nalangkit sa maong surihiya. Ang usa ka tawo usab kinahanglan nga bug-os nga ilhon ang iyang motibasyon sa pagpangandoy ug surihiya. Sa kadaghanan nga adunay linawas nga pagkahiwi – napanunod man o nakuha – natural nga gustohon nga mahaom sa katilingban ug bation nga “normal.” Aduna usab mga kahimtang sa gamay nga abnormalidad nga makapabati sa usa ka tawo ug dili komportable sa iyang kaugalingon, sama sa hilabihan kadako o nalusngo nga ilong. Apan daghan, kon dili tanan, nga mga palstik nga surihiya mga pagsulay aron mapuno ang emosyonal nga mga haw-ang sa pisikal nga mga paagi, aron mapansin, o makakuha ug pagdayeg gikan sa uban.
Ang labing sagad nga ginahimong pang-arte nga operasyon naglangkip sa pagpadako/pag-alsa sa dughan, liposuction, pagpasaka sa tabontabon sa mata, pagpasaka sa sampot ug uban pang pagpasaka sa bahin sa lawas, pagtambal sa ugat sa batiis, botox o mga pagturok sa tambok, ug pag-usab sa porma sa ilong ug nawong. Gibanabana nga duha ka milyon ka tawo ang nagpailalom sa ilang mga kaugalingon niini nga mga matang sa operasyon kada tuig, nagkubkob sa salapi ug nagsakripisyo sa panahon ug kaharuhay. Kung ang kakawangan maoy nakapa-aghat sa usa ka tawo nga magpa-opera, siya nahimong iyang kaugalinong diyosdiyos. Gipasidan-an kita sa Biblia nga dili mahimong asyoso (Filipos 2:3 – 4) ug dili magpapansin pinaagi sa atong porma (Unang Timoteo 2:9). Lain pang kabalaka mao ang gasto. Usa kini ka dakong konsiderasyon tungod kay kadaghanan sa mga tawo adunay pamilya, ug ang gastos sa plastik nga suruhiya dili kinahanglan nga mag-una sa mga panginahanglanon sa pamilya. Gisultian usab kita sa Biblia nga angay natong gamiton sa maalamon ang salapi nga gitugyan kanato sa Diyos (Panultihon 11:24 – 25; Lucas 16:1- - 12).
Ang labing mahinungdanong butang nga himoon sa dili pa mudesisyon magpa opera mao ang pagkonsulta sa Diyos mahitungod ani nga butang. Gisultian kita sa Biblia nga ang Diyos nagpakabana sa matag kabalaka ug sigamno nga anaa kanato, busa atong dad-on ang atong suliran ngadto Kaniya (Unang Pedro 5:7). Pinaagi sa kaalam ug paggiya sa Balaang Espiritu ug sa Pulong sa Diyos, makabaton kitag kakayahan pagdesisyon nga makapahimuot ug makapasidungog Kaniya. “Ang kaanyag malimbongon, ug ang katahom lumalabay; apan ang babaye nga nahadlok sa GINOO pagadayegon” (Panultihon 31:30). Bisan ang labing hanas nga siruhano dili makapugong sa dagan sa panahon, ug ang tanang pang-arte nga mga suruhiya sa kadugayan moabot sa samang sangpotanan – ang pagkatigulang. Kadtong gipaalsa nga mga bahin sa lawas mu-yatyat ug balik, ug kadtong mga bahin sa nawong nga gibag-o sa kosmetiko sa kadugayan makunot. Mas labing maayo nga pauswagon ang pagpaanyag sa kinasulorang pagkatawo, “aron nga ang inyong kinasulorang kaugalingon, ang walay paglubad nga katahom sa usa ka malumo ug malinawon nga espiritu, nga dako kaayog bili sa panan-aw sa Diyos” (Unang Pedro 3:4).
English
Unsay gisulti sa Biblia mahitungod sa pagpa plastic/kosmetik nga surihiya?