ప్రశ్న
దేవునితో సమాధానంగా ఉండటం అంటే ఏమిటి?
జవాబు
దేవునితో సమాధానంగా ఉండటం అంటే ఏమిటో మనం అర్థం చేసుకోవడానికి ముందు, మన సహజ స్థితిలో ఉన్న మనుషులు దేవునికి శత్రువులని మనం గుర్తించాలి. మన మొదటి తల్లిదండ్రులైన ఆదాము మరియు హవ్వ నుండి మనం పాప స్వభావాన్ని వారసత్వంగా పొందినందున (ఆదికాండము 3; రోమీయులకు 5:12), మనల్ని మనం సంతోషపరచుకోవడానికి మరియు మనమే దేవుళ్ళుగా ఉండటానికి ఒక స్వభావంతో మనం పుడతాము. ఆ తిరుగుబాటు స్వభావం మన పరిపూర్ణ సృష్టికర్తకు మనల్ని విరోధులుగా చేస్తుంది. ఆయన నీతి స్వభావం మన పాపాన్ని చూసీ చూడనట్లు ఉండలేదు; నీతి శిక్షను కోరుతుంది (రోమీయులు 3:23; 6:23). ఆయన పరిశుద్ధతతో పోలిస్తే, మన ఉత్తమమైన రోజున మనం చేసే ఉత్తమ ప్రయత్నాలు కూడా మురికిగుడ్డలవంటివి (యెషయా 64:6). కాబట్టి, మన పాపపు స్థితిలో, మనం ఎంత ప్రయత్నించినా, ఆయనతో సమాధానపడలేము, ఆయనతో శాంతిని పొందలేము.
దేవుడు తన కుమారుని భూమికి పంపడం ద్వారా మనతో సమాధానం కోసం చొరవ తీసుకున్నారు. యేసు పరిపూర్ణమైన జీవితాన్ని జీవించారు, ఆయన సిలువ మరణం ఆయనను నమ్మువారందరి పాపాలకు ప్రాయశ్చిత్తం చేసింది (హెబ్రీయులు 4:15; 2 కొరింథీయులు 5:21), మరియు ఆయన పునరుత్థానం దేవుని ముందు మన నీతిని హామీ ఇస్తుంది (రోమీయులు 4:25). యేసు సమాధాన ప్రియుడు (యెషయా 9:6), మరియు ఆయన మాత్రమే మనకు దేవునితో సమాధానాన్ని ఇస్తాడు. అందుకే క్రీస్తులోని రక్షణ సందేశం "సమాధాన సువార్త" అని పిలువబడుతుంది (ఎఫెసయులు 6:15).
ఆ మొదటి క్రిస్మస్ నాడు పశువుల కాపరులతో దేవదూతలు పలికిన మాటలు ఇవి: "–సర్వోన్నతమైన స్థలములలో దేవునికి మహిమయు ఆయన కిష్టులైన మనుష్యులకు భూమిమీద సమాధానమును కలుగునుగాక" (లూకా 2:14). దేవుడు ఎవరిని చూసి సంతోషిస్తాడు? దేవుని కుమారుని విశ్వాసము ద్వారా పొందిన వారి మీద దేవుని సంతోషము మరియు సమాధానము నిలుస్తాయి (యోహాను 1:12). "కాబట్టి విశ్వాసమూలమున మనము నీతిమంతులముగా తీర్చబడి, మన ప్రభువైన యేసుక్రీస్తుద్వారా దేవునితో సమాధానము కలిగియుందము" (రోమీయులకు 5:1). దేవునితో సమాధానము అంటే మన గొప్ప పాపపు అప్పు చెల్లించబడింది మరియు దేవుడు మనలను నీతిమంతులుగా చూస్తున్నాడు (కొలొస్సయులు 2:14; రోమా 3:22). మనం ఇకపై శత్రువులం కాదు, ప్రియమైన పిల్లలం (1 యోహాను 3:2). ఆయన తన పరిశుద్ధ స్వభావంతో మనతో సహవాసం చేయగలడు, ఎందుకంటే ఆయన మనలను "క్రీస్తులో" చూస్తున్నాడు.
దేవునితో సమాధానపడటం అంటే మన మనస్సాక్షి శుద్ధి చేయబడటం (హెబ్రీయులు 10:22; తీతు 3:5). మనందరినీ పీడించిన అపరాధభావం యొక్క భారమైన భారం పోయింది, అది సిలువ మీద యేసు మీద మోపబడింది (కొలొస్సయులు 2:14; 1 పేతురు 2:24). మనమి చేసిన చెడ్డ పనుల వలన మనం సరిగ్గా అనుభవించిన సిగ్గును యేసు మోశాడు. దేవుడు తండ్రి మనలను తన సొంత పిల్లలుగా స్వీకరిస్తాడు మరియు ఆయనతో సంబంధం కలిగి ఉండటానికి మరియు మనకు కావలసినవి అడగటానికి "కృప సింహాసనం ముందుకు ధైర్యంగా రావాలని" మనలను ఆహ్వానిస్తాడు (హెబ్రీయులు 4:16). ఒక క్రైస్తవునికి, దేవునితో సమాధాన భావాన్ని నిలుపుకోవడం అంటే మన నిరంతర పాపాలను మరియు వైఫల్యాలను ఒప్పుకుంటూ ఉండటం (1 యోహాను 1:9). దేవునితో సమాధానపడటానికి మనం నిరంతరం ఒప్పుకుంటూ ఉండనవసరం లేదు; మనం విశ్వసించినప్పుడు యేసు సిలువ మీద ఆ పనిని నెరవేర్చారు. నిజంగా పునర్జన్మ పొందిన వారు నిరంతర పశ్చాత్తాప వైఖరితో జీవిస్తారు, తద్వారా ఏ పాపమూ మళ్ళీ వారిలో వేరుపట్టి వారిని అపవిత్రపరచదు (యోహాను 3:3; రోమీయులు 6:1–4). ఒప్పుకోని పాపం దేవుని బిడ్డకు, అతని తండ్రికి మధ్య ఉన్న ఆనందకరమైన సహవాసాన్ని పాడుచేస్తుంది.
దేవునితో సమాధానం పొందిన క్రైస్తవుడు మరణం లేదా శాశ్వతత్వం గురించి భయం లేకుండా జీవించగలడు. మనల్ని దేవునితో సమాధానపరచడానికి యేసు అవసరమైనదంతా చేశాడనే జ్ఞానంలో మన నిరీక్షణ సురక్షితంగా ఉంది (మత్తయి 5:17; యోహాను 3:16–18). భూమిపై మన చివరి శ్వాస, స్వర్గంలో మన మొదటి శ్వాస అవుతుంది (2 కొరింథీయులకు 5:6–8; లూకా 16:22). ఒక గొప్ప సంఘటన తప్పకుండా జరగబోతోందనే నిశ్చయతగా, ఒక వాగ్దాన ఉంగరంలా పరిశుద్ధాత్మ మనకు ఇవ్వబడింది (2 కొరింథీయులకు 1:22; 5:5). ప్రస్తుతం, పరిశుద్ధాత్మ మనలో నివసించి, మనకు మార్గనిర్దేశం చేస్తూ, మన పాపాలను గద్దిస్తూ, ఓదార్పునిస్తూ, మన కొరకు యేసు చేసిన సంపూర్ణ త్యాగాన్ని మనకు గుర్తు చేస్తూ ఉంటాడు (యోహాను 14:16–17; 16:8–11; 1 కొరింథీయులు 3:16; 6:19; ఎఫెసయులు 1:13–14).
మానవులు దేవునితో సమాధానంగా జీవించడానికి సృష్టించబడ్డారు. పాపం ఆ సమాధానాన్ని నాశనం చేసింది మరియు యేసు యొక్క రక్షణ ప్రస్తావనను తిరస్కరించే ప్రతి ఒక్కరికీ ఇప్పటికీ నాశనం చేస్తూనే ఉంది. అయితే, ప్రభువు నామమును పిలిచి, యేసు దేవునియొద్దకు వెళ్ళుటకు ఏకైక మార్గమని హృదయములో నమ్మి, రక్షకునిగా మరియు ప్రభువుగా ఆయనకు లొంగిపోవడానికి సిద్ధపడిన ఎవడైనా దేవునితో సమాధానమును పొందగలడు (రోమీయులకు 10:9–10, 13; యోహాను 3:16, 36; అపొస్తలుల కార్యములు 2:21, 28).
English
దేవునితో సమాధానంగా ఉండటం అంటే ఏమిటి?
