ప్రశ్న
యేసును తెలుసుకోవడం అంటే ఏమిటి?
జవాబు
ప్రజలు యేసును "తెలుసుకోవడం" గురించి మాట్లాడినప్పుడు, వారు ఆయనతో సంబంధం కలిగి ఉండటాన్ని సూచిస్తారు. క్రైస్తవుడు కావడం అనేది యేసు గురించి తెలుసుకోవడం కంటే ఎక్కువ; క్రైస్తవుడు కావడం అనేది ఆయనను వ్యక్తిగతంగా తెలుసుకోవడం. యేసు ప్రార్థించినప్పుడు, రక్షకుడిని తెలుసుకోవలసిన అవసరాన్ని గురించి ఇలా చెప్పాడు, "అద్వితీయ సత్యదేవుడవైన నిన్నును, నీవు పంపిన యేసు క్రీస్తును ఎరుగుటయే నిత్య జీవము" (యోహాను 17:3).
ఒక క్రీడా హీరో గురించి తెలుసుకోవడం ఒక విషయం, ఆ అథ్లెట్కు స్నేహితుడిగా ఉండటం మరో విషయం. మీరు మీ హీరో గురించిన ప్రతి వార్తా కథనాన్ని చదవవచ్చు, ప్రతి గణాంకాన్ని కంఠస్థం చేయవచ్చు, మరియు ప్రతి జ్ఞాపికను సేకరించవచ్చు, అయినా మీరు ఆ అథ్లెట్ను అసలుగా ఎప్పటికీ తెలుసుకోలేరు. ఒక క్రీడా హీరోను నిజంగా తెలుసుకోవాలంటే, అతని ఆటను చూడటం కంటే మీరు ఎక్కువ చేయాలి. మీరు అతనితో కలిసి సమయం గడపడం మరియు క్రమం తప్పకుండా సంభాషించడంపై ఆధారపడి, అతనితో ఒక సంబంధాన్ని కలిగి ఉండాలి. ఒక వ్యక్తి యేసును నిజంగా తెలుసుకున్నప్పుడు, అది ఒక సంబంధం ఆధారంగానే జరుగుతుంది; వారు కలిసి సమయం గడుపుతారు మరియు క్రమం తప్పకుండా మాట్లాడుకుంటారు. మరియు, మనం యేసును తెలుసుకున్నప్పుడు, మనం దేవుణ్ణి కూడా తెలుసుకుంటాము. "మనము సత్యవంతుడైన వానిని ఎరుగవలెనని దేవుని కుమారుడు వచ్చి మనకు వివేక మనుగ్రహించియున్నాడని యెరుగుదుము" (1 యోహాను 5:20).
మీరు యేసును ఎలా తెలుసుకోగలరు? రోమా 10:9 ఇలా చెబుతోంది, "యేసు ప్రభువని నీ నోటితో ఒప్పుకొని, దేవుడు మృతులలోనుండి ఆయనను లేపెనని నీ హృదయమందు విశ్వసించినయెడల, నీవు రక్షింపబడుదువు." యేసు ప్రభువు అని, ఆయన మృతులలో నుండి తిరిగి లేచారని మీరు నమ్మాలి. ఆయన మరణానికి కారణం మీ పాపమునకు మూల్యం చెల్లించడానికే (1 పేతురు 2:24).
మీరు క్రీస్తును నమ్మినప్పుడు, మీరు యేసును స్వీకరించి ఆయన కుటుంబంలో భాగమవుతారు (యోహాను 1:12). అంతేకాకుండా, యోహాను 3:16 ప్రకారం మీకు నిత్యజీవం ఇవ్వబడింది: "దేవుడు లోకమును ఎంతగా ప్రేమించెనంటే, తన ఏకైక కుమారుని ఇచ్చెను, తద్వారా ఆయనను నమ్మిన ప్రతివాడు నశించక నిత్యజీవమును పొందును." ఈ జీవంలో పరలోకంలో క్రీస్తుతో గడిపే నిత్యత్వం కూడా ఉంది మరియు ఇది మీకు, క్రీస్తును నమ్మే ఎవరికైనా అందుబాటులో ఉంది.
ఎఫెసయులకు 2:8–9 రక్షణ దేవుని దయ ఫలితమని వివరిస్తుంది: "మీరు విశ్వాసముద్వారా కృపచేతనే రక్షింపబడియున్నారు; ఇది మీవలన కలిగినది కాదు, దేవుని వరమే. అది క్రియలవలన కలిగినదికాదు గనుక ఎవడును అతిశయపడ వీలులేదు."రక్షణలో యేసును ఎరుగడం మన చేతల మీద ఆధారపడి ఉండదు; యేసును ఎరుగడం ఆయనయందు విశ్వాసముతో ప్రారంభమవుతుంది, మరియు ఆయనతో మన నిరంతర సంబంధం ఎల్లప్పుడూ విశ్వాసములోనే వేరుపూని ఉంటుంది.
యేసును తెలుసుకోవడానికి మరియు ఆయనను విశ్వసించడానికి మీరు తప్పనిసరిగా ప్రార్థించవలసిన ప్రత్యేక ప్రార్థన ఏదీ లేదు. అయినప్పటికీ, మీ విశ్వాసాన్ని యేసు క్రీస్తులో ఉంచాలనే మీ నిర్ణయాన్ని వ్యక్తపరచడానికి, ఈ క్రింది ప్రార్థనను మీరు ఇప్పుడే ఉపయోగించవచ్చు:
ప్రియమైన దేవా, నేను ఒక పాపిని అని, నా సొంత సత్క్రియల ద్వారా స్వర్గం చేరుకోలేనని గ్రహిస్తున్నాను. నాకు నిత్యజీవాన్ని ఇవ్వడానికి మృతులలో నుండి తిరిగి లేచిన దేవుని కుమారుడైన యేసు క్రీస్తుపై నేను నా విశ్వాసాన్ని ఉంచుతున్నాను. దయచేసి నా పాపాలను క్షమించి, నీ కొరకు జీవించడానికి నాకు సహాయం చేయుము. నన్ను అంగీకరించి, నాకు నిత్యజీవాన్ని ఇచ్చినందుకు ధన్యవాదాలు.
English
యేసును తెలుసుకోవడం అంటే ఏమిటి?
