ප්‍රශ්නය
දෙවියන්වහන්සේට යටත් වීම යන්නෙන් අදහස් කරන්නේ කුමක්ද?
පිළිතුර
මේ ලෝකය යුද පිටියක්. ඒදන් උයනේ මිනිසා වැටීමෙන් (උත්පත්ති 3:17-19) දෙවියන්වහන්සේ මැවූ ලෝකය උන්වහන්සේ සමඟ ගැටෙමින් පැවතුනි (රෝම 8:20-22). සාතන්ව හැඳින්වෙන්නේ “මේ ලෝකයේ දෙවියා” (2 කොරින්ති 4:4) වන අතර ආදම්ගේ පාපය හේතුවෙන් අපි ඔහුගේ කණ්ඩායමේ උපත ලැබුවෙමු (රෝම 5:12).
සදාචාරමය තේරීම් කළ හැකි වයසට එළඹෙන විට, අපේම පව්කාර නැඹුරුවාවන් අනුගමනය කළ යුතුද නැත්නම් දෙවියන්වහන්සේ සෙවිය යුතුද යන්න අප තෝරා ගත යුතුය (යොෂුවා 24:15 බලන්න). දෙවියන්වහන්සේ පොරොන්දු වන්නේ අපි මුළු හදවතින්ම උන්වහන්සේව සොයන විට අපට උන් වහන්සේව සොයා ගත හැකි බවයි (යෙරමියා 29:13). අපි උන්වහන්සේව සොයාගත් විට, අපට තෝරා ගැනීමට විකල්පයක් ඇත: අපි දිගටම අපේම නැඹුරුවාවන් අනුගමනය කරන්නෙමුද, නැතහොත් උන්වහන්සේගේ කැමැත්තට යටත් වෙමුද?
යටත් වීම යනු සටන් පදයකි. එයින් අදහස් කරන්නේ ජයග්‍රාහකයාට සියළුම අයිතිවාසිකම් අත් හැරීමයි. විරුද්ධ හමුදාවක් යටත් වූ විට ඔවුන් ආයුධ තබන අතර ජයග්‍රාහකයින් එතැන් සිට පාලනය භාර ගනී. දෙවියන්වහන්සේට යටත් වීම ද එලෙසම ක්‍රියාත්මක වේ. දෙවියන්වහන්සේට අපේ ජීවිත ගැන සැලැස්මක් ඇති අතර උන්වහන්සේට යටත් වීම යන්නෙන් අදහස් කරන්නේ අපි අපේම සැලසුම් පසෙකලා උන්වහන්සේව සෙවීමට උනන්දු වීමයි. ශුභාරංචිය නම් බොහෝ විට විනාශයට තුඩු දෙන අපේම සැලසුම් මෙන් නොව දෙවියන්වහන්සේගේ සැලැස්ම සැමවිටම අපට යහපත උදෙසා වීමයි (යෙරෙමියා 29:11) (හිතෝපදේශ 14:12). අපේ ස්වාමින්වහන්සේ ඥානවන්ත හා යහපත් ජයග්‍රාහකයෙකි; අපට ආශීර්වාද කිරීම සඳහා උන්වහන්සේ අපව පරාජය කරයි.
යටත් වීමේ විවිධ මට්ටම් ඇත, ඒ සියල්ල දෙවියන්වහන්සේ සමඟ අපගේ සම්බන්ධතාවයට බලපායි. ශුද්ධාත්මයාණන්වහන්සේගේ ඇඳීමට මුලින් යටත් වීම ගැලවීමට මඟ පාදයි (යොහන් 6:44; ක්‍රියා 2:21). දෙවියන්වහන්සේගේ අනුග්‍රහය ලබා ගැනීමට අප ගත් උත්සාහයන් අතහැර අප වෙනුවෙන් යේසුස් ක්‍රිස්තුස්වහන්සේගේ නිම කළ වැඩ මත විශ්වාසය තැබූ විට අපි දෙවියන් වහන්සේගේ දරුවෙකු වන්නෙමු (යොහන් 1:12; 2 කොරින්ති 5:21). නමුත් කිතුනුවකුගේ ජීවිත කාලය තුළ දෙවියන්වහන්සේ සමඟ ගැඹුරු සමීප බවක් සහ සේවයේ වැඩි බලයක් ගෙන දෙන අවස්ථා බොහෝ ඇත. අපගේ ජීවිතයේ වැඩි වැඩියෙන් අපි උන්වහන්සේට යටත් වන තරමට, ශුද්ධාත්මයාණන් වහන්සේගේ පිරවීම සඳහා වැඩි ඉඩක් ඇත (එපීස 5:18). අපි ශුද්ධාත්මයාණන් වහන්සේගෙන් පිරී ගිය විට, අපි උන්වහන්සේගේ චරිත ලක්ෂණ විදහා දක්වන්නෙමු (ගලාති 5:22). අපි දෙවියන්වහන්සේට යටත් වන තරමට, අපගේ පැරණි ස්වයං-නමස්කාර කිරීමේ ස්වභාවය ක්‍රිස්තුස්වහන්සේට සමාන ය (2 කොරින්ති 5:17).
රෝම 6:13 පවසන්නේ දෙවියන්වහන්සේ ඉල්ලා සිටින්නේ අපේම මුළුමනින්ම යටත් වන ලෙසය; උන්වහන්සේට අවශ්‍ය වන්නේ කොටසක් නොව සමස්තය යි: “දුෂ්ටකමේ මෙවලමක් ලෙස පව් කිරීමට ඔබගෙන් කිසිවෙකු ඉදිරිපත් නොවී, මරණයෙන් ජීවනයට ගෙන ආ අය ලෙස ඔබ දෙවියන්වහන්සේට පූජා කරන්න; ඔබේ සෑම කොටසක්ම ධර්මිෂ්ඨකමේ උපකරණයක් ලෙස උන්වහන්සේට දෙන්න.” යේසුස්වහන්සේ පැවසුවේ උන්වහන්සේගේ අනුගාමිකයන් තමන්ව ප්‍රතික්ෂේප කළ යුතු බවයි (මාර්ක් 8:34) - යටත් වීම සඳහා තවත් කැඳවීමක්.
ක්‍රිස්තියානි ජීවිතයේ අරමුණ ගලාතියන් 2:20 මඟින් සම්පිණ්ඩනය කළ හැකිය: “මම ක්‍රිස්තුස් වහන්සේ සමඟ කුරුසියේ ඇණ ගසා ඇත. තවදුරටත් ජීවත් වන්නේ මා නොව ක්‍රිස්තුස් වහන්සේ ය. මම දැන් මාංසයේ ජීවත් වන ජීවිතය මම ජීවත් වන්නේ මට ප්‍රේම කළ සහ මා වෙනුවෙන්ම කැප කළ දේව පුත්‍රයා කෙරෙහි ඇදහිල්ලෙනි.” එවැනි යටත් වීමේ ජීවිතය දෙවියන්වහන්සේට ප්‍රිය කරන අතර එයින් මිනිසාගේ ශ්‍රේෂ්ඨතම ඉටුවීම සිදු වන අතර ස්වර්ගයේ අවසාන විපාක ලැබෙනු ඇත (ලූක් 6:22-23).
English
දෙවියන්වහන්සේට යටත් වීම යන්නෙන් අදහස් කරන්නේ කුමක්ද?
