Kutang
Ninu i Jesu-Cristo?
Sagot
Ali na kalupa ning kutang a “Atin bang Dios?”, malagad ya mung makutang nung tutung mebie ya ba i Jesu-Cristo. Keraklan kareng tau tatanggapan dang tutu yang tau a mebie i Jesus king Israel 2,000 banua na ing milabas. Ing debati magumpisa ya patse ing pisasabian ing tune nang pagkakakilanlan Jesus. Keraklan kareng relihiyun tuturu dang propeta ya i Jesus, metung yang mayap a mestru, o metung yang maka-Dios a tau. Oneng sasabian na ning Bibliang maigit ya pa keng metung a propeta, mayap a mestru, o maka-Dios a tau i Jesus uling ala yang angga ing tune nang pagkakakilanlan.
Aini ing sinulat nang C.S. Lewis ketang libru nang, Mere Christianity: “Susulat ke iti ban patuknangan kula reng ninumang sasabi ketang metung a kalokuang bage tungkul Keya (Jesu-Cristo): ‘Makaiadya keng tanggapan i Jesu-Cristo bilang metung a dakilang mestru ning moralidad, oneng ali ke tatanggapan ing sasabian nang Dios ya.’ Iyan ing metung a bage a ali tamu dapat sabian. Ing metung a taung kabud mu tau, kayi memagsabi yang bage kalupa na ning sinabi nang Jesus, ali ya malyaring mayaus a dakilang mestru na ning moralidad. Malyaring sira ya buntuk—kaparewu na ning taung sasabing ebun ya—o nung ali man apin iya ing Diablu ning impierno. Mamili ka. I Jesus manibat king ibat apin iya ing Anak nang Dios, o sira ya buntuk, o metung a mas marok pa. Malyari meng baran uling sira ya buntuk, o pamakarine me ampong paten me uling demonyu ya; o kaya siklod ka king Keyang arapan atsaka me ausang Ginu ampong Dios. Oneng ali tana magpalusut a balamu tatas taya patse sasabian tamung dakila yang mestrung tau. Ali ne binie kekatamung pilian ing makanitang sagut. Ala yang makanitang intensyun” (Macmillan, 1952, p. 55–56).
Kaya, nanu ing inangkin nang Jesus nung ninu Iya? Nanu ing sasabian na ning Biblia nung ninu Iya? Mumuna, apin Iya ing Dios a migkatawang tau. Sinabi nang Jesus king Juan 10:30, “Aku at ing Ibpa metung kami mu.” King mumunang lawe, lupang ali na ne man daretsung aangkinang Diyos ya. Oneng lawen taya ing meging reaksyun da reng Judio ketang sinabi na. Sibuknan deng basibasan batu. Sabi ra, “Babasibasan da ka e uli na ning mayap mung dapat, nune uli na ning pamaglapastangan mu king Dios! Uling magbansag kang Dios kabang metung ka mung tau!” (Juan 10:33). Aintindian deng masalese reng Judio a pamag-angkin yang Dios ya itang sinabi nang Jesus. Ketang tutuking bersikulu, ali na sinabing Jesus a mali la reng Judio keng pangaintindi da keng sinabi na. Ali na sinabing, “Ali ku sasabiang Dios ku.” Kaya anyang sinabi nang “Aku at ing Ibpa metung kami mu.” (Juan 10:30), tutu nang aangkinan ing pangapante na keng Dios.
King Juan 8:58, aangkinan nang Jesus a ala yang angga ing pibatan na, metung a bageng keng Dios mu kabud akit: “Mekibat ya i Jesus, Ing katutuan sasabian ku kekayu: atyu na ku bayu ya mibait i Abraham.” Uli na ning sinabi na, sibuknan de pasibayung pamasibasan batu i Jesus deng Judio (Juan 8:59). King pamag-angkin nang ala yang angga ing penibatan na, ginamit neng Jesus ing lagyu na ning Dios king Keyang sarili—Aku ing Aku (lawen ing Exodo 3:14). Tinanggian de reng Judio ing pagkakakilanlan nang Jesus bilang Dios a migkatawang tau, pero malino reng aintindian nung nanu ing buri Nang sabian.
Atin pang mialiwang paiwatig keng Biblia a magpakit a Dios ya i Jesus a migkatawang tau. Sinabi keng Juan 1:1, “nung nanu ya ing Dios makanyan ya naman ing Amanu,” ampo keng Juan 1:14, “Meging tau ya ing Amanu.” I Tomas, metung kareng alagad, pinasiag na kang Jesus, “Ginu ko at Dios ko” (Juan 20:28), ali na sinabing Jesus a mali ya. Sinabi na muring Apostol Pablo a i Jesus ing “Dios at Talapagligtas tamung i Jesu- Cristo” (Tito 2:13). Ita mu rin ing sinabi nang Apostol Pedro, inaus ne i Jesus “kekatamung Dios at Talapagligtas” (2 Pedro 1:1).
Maski ing Dios Ibpa Iya mismu ing papatune king pagkakakilanlan nang Jesus: “Oneng tungkul king Anak, nganang sinabi ning Dios, Ing kekang tronu, O Dios, manatili ya kapilan pa man! Sumakup ka bilang Aring makatuliran.” (Hebreo 1:8; cf. Ding Dalit 45:6). Maski keng Lumang Tipan, mideklara ne ing panga-Dios nang Cristo. Ngana ning Isaias 9:6: “Uling mibait ya ing anak para kekatamu! Ing metung a anak a lalaki miyabie ya kekatamu! At ya ing maging pamuntuk tamu! Mayaus yang Makapagmulalang Tagapayu, Mayupayang Dios, Alang anggang Ibpa, Prinsipi ning Kapayapan.”
Bakit maulaga ya ing kutang tungkul keng pagkakakilanlan nang Jesus? Bakit ya importanti nung Dios ya i Jesus? Atin miyaliwang rason:
- Sabi na ping C.S. Lewis, nung ali ya Dios i Jesus, Iya ing pekamalaram dili ampong ali ya malyaring pagkatiwalan kareng nanu mang bage.
- Nung ali ya Dios i Jesus, kaparewu nala mu ring malaram deng apostol.
- Kailangan Dios ya i Jesus uling inaus deng “Banal” ing mepangakung Mesias (Ding Dalit 16:5). Uling ala namang ganap a matulid keti yatu king arap na ning Dios (Ding Dalit 53:1; 143:2), ing Dios dapat mismu ing tipa keti yatu bilang tau.
- Nung ali ya Dios i Jesus, ali ya maging sapat ing kamatayan na ban bayaran ing parusa na ning kasalanan na ning buung yatu (1 Juan 2:2). Ing Dios mu kabud ing malyaring gawang sakripisyung alang angga ing ulaga na ampong sapat yang sapat karing sablang tau (Roma 5:8; 2 Corinto 5:21).
- Ing Dios mu kabud ing Talapagligtas (Hosea 13:4; cf. 1 Timoteo 2:3). Kaya nung Talapagligtas ya i Jesus, kailangan Dios ya.
Dios ya ampong tau i Jesus. Bilang Dios, i Jesus ing makapawi keng mua ning Dios. Bilang tau, malyari yang mate. Bilang Dios ampong tau keng metung a persona, i Jesus ing perpektung Talapamilatan na ning banua ampo sulip (1 Timoteo 2:5). Apaintun ya ing kaligtasan king kapamilatan na ning pamanialpantaya kang Jesu-Cristo mu kabud. Nganang pinasiag, “Aku ing dalan, ing katutuan, at ing bie. Alang malyaring miras king Ibpa nung e mu king kapamilatan ku” (Juan 14:6).
English
Atin ka bang kutang?