Kutang
Atin kang kapatawaran? Makananu ku makatanggap kapatawaran ibat keng Dios?
Sagot
Ngana ning Ding Dapat 13:38, “Ikayu ngan, kapatad ku, sukat yung abalung malino king mipanaral kekayu ing amanu tungkul king pangapatawad da ring kasalanan uli nang Jesus.”
Nanu ing kapatawaran at bakit ke kailangan iti?
Ing buri nang sabian ning salitang “patawad,” iti ing kalingwan na ing milabas, magpasensya, ilako na ing utang. Patse atin tamung agawang mali kareng aliwang tau, anyaran tamu ing kapatawaran da ban mibalik ing dating pamikalugud. Ali ya babie ing kapatawaran uling karapat-dapat yang mipatawad ing metung a tau. Alang taung karapat-dapat mipatawad. Dapat ne ning lugud, lunus, ampo ning grasya ing magpatawad. Disisyun ya ing pamagpatawad a ena magtanam mua kareng aliwa, agyang nanu man ing gewa da keka.
Sasabian na ning Bibliya a kailangan tamu ngan ing pamagpatawad na ning Dios. Mikasala tamu ngan. Ngana ning Ecclesiastes 7:20, “une alang taung sakdal a darapat mayap king sablang panaun o e bitasang magkamali.” Ngana naman ning 1 Juan 1:8, “Nung sasabian tamung ala tamung kasalanan, pipiraitnan tamu ing kekatamung sarili at ala yu kekatamu ing katutuan.” Ing egana-ganang kasalanan bandang tauli, pamagrebeldi ya laban keng Dios (Ding Dalit 51:4). Uli na niti, lubus tayang kailangan ing pamagpatawad na ning Dios. Kung ali la mipatawaran deng kekatamung kasalanan, magdusa tamung alang-angga kareng bunga na ning pamagkasala tamu (Mateo 25:46; Juan 3:36).
Pamagpatawad-Makananu ke atanggap?
Mayap namu, malugud at malunus ya ing Dios – makaiadia yang magpatawad kareng kasalanan tamu! Ngana ning 2 Pedro 3:9, “Dirinan na la mung panaun ding sabla ba lang sumisi, uling e na buri ning Dios ing mipahamak ya ing ninuman.” Buri na ning Dios ing patawaran na katamu, kaya Iya ing memie paralan keng pamagpatawad tamu.
Kamatayan ing ustung parusa keng kasalanan tamu. Sasabian na ning mumunang parti na ning Roma 6:23, “Ing bayad na ning kasalanan, kamatayan…” Alang-anggang kamatayan ing masingil kekatamu uli na ning pamagkasala tamu. Ing Dios, king Keyang perpektung planu, meging tau ya – i Jesu-Cristo (Juan 1:1,14). Mete ya i Jesus, pinusan ne ing parusang dapat ketamu – kamatayan. Tuturu na ning 2 Corinto 5:21, “E ya mikasala i Cristo, oneng alang-alang king kekatamung ikakayap, tinuring neng makasalanan ning Dios ban kayabe na maging banal tamu arap ning Dios king kapamilatan na.” Mete ya i Cristo keng krus, tinggap ne ing parusang dapat kekatamu! Uling Dios ya, agawa nang mamie kapatawaran ing kamatayan nang Jesus para king sablang tau. Ngana ning 1 Juan 2:2, “Uling i Jesu-Cristo mismu ya ing menatbus karing kasalanan tamu at aliwa mu karing kasalanan tamu, nune pati na karing kasalanan da ring sablang tau.” Sinubli yang mebie i Jesus, iti ing migsilbing tagumpe na laban king kasalanan ampo king kamatayan (1 Corinto 15:1-28). Purian ya ing Dios, uli na ning kamatayan ampong pamisubling mebie nang Jesu-Cristo, tutu ya ing sasabian na ning tauling parti na ning Roma 6:23, ”…neng ing regalung kusa nang babie ning Dios ya ing bie alang angga kayabe nang Cristo Jesus a Ginu tamu.”
Buri mu la bang mipatawad deng kasalanan mo? Atin bang gugulung panamdam na ning pamagkasala keka a emu alako-lako? Atanggap me ing pamagpatawad na ning kasalanan kung ibie me ing pamanialpantaya mu kang Jesu-Cristo bilang kekang Talapagligtas. Ngana ning Efeso 1:7, “Inatbus na katamung Cristo king kapamilatan na ning kamatayan na. Uli na niti, mipatawaran ing kekatamung kasalanan! Kasagid na ning lugud a binie ning Dios kekatamu.” Pemayad na katamung utang Jesus, ban mipatawad tamu. Ing kailangan mu namung gawan anyaran mu keng Dios a patawaran naka king kapamilatan nang Jesus, panwalan mung mete ya i Jesus ban bayaran ing kekang kapatawaran – at patawaran na ka pin man! Sasabian na ning Juan 3:16-17 iting masanting a mensahi, “Uli na ning maragul nang lugud ning Dios king yatu binie ne ing bugtung nang Anak ban ing ninumang maniwala keya e ya mate nune mirinan yang bie alang angga. Uling tinubud ne ning Dios ing Anak na king yatu e ban atulan ne at parusan ing yatu, nune ban miligtas ya ing yatu king kapamilatan na.”
Pamagpatawad – makanita ya mu ba kasagli?
Wa makanita ya mu kasagli! Ali me akwa ing pamagpatawad na ning Diyos keng sarili mung sikap. Ala kang abie nanu mang bayad para patawaran naka ning Dios. Ing agawa mu kabud, tanggapan iti, king kapamilatan na ning grasya ampo ning lunus ning Dios. Kung buri meng tanggapan i Jesu-Cristo bilang kekang Talapagligtas ampo tumanggap king pamagpatawad na ning Dios, malyari meng pangadi iti. Aliwa ing pangading iti o nanu mang pangadi ing magligtas keka. Ing pamagtiwala mu kabud kang Jesu-Cristo ing mamie kapatawaran kareng kasalanan mu. Paralan yamu ing pangading iti ban apakit me keng Dios ing pamanialpantaya mu Keya ampo ban apasalamatan me keng binie nang pamagpatawad keka. “O Dios, balu kung mikasala ku laban keka at uli na niti, ustu mu ing miparusan ku. Oneng I Jesu-Cristo ing pinusan king kaparusan a dapat kanaku kaya king kapamilatan na ning pamanialpantaya Keya mapatawad ku. Babie ke ing tiwala ku Keka para king kanakung kaligtasan. Salamat pu king Kekayung grasya at kayupayan! Amen!
Mekapagdesisyun na ka ba tungkol kang Cristo uli na ning abasa mu keni? Nung makanta man, i-click me itang "tinggap ke I Cristo ngeni" kening lalam. English
Atin ka bang kutang?