Kutang
Atin kang bie alang angga?
Sagot
Papakit na ning Bibliya ing malino a dalan papunta keng bie alang angga. Mumuna, kailangan tanggapan tamu keng sarili tamu na migkasala tamu keng Dios: “ding sablang tau uling mikasala la ngan, at mirayu la king Dios a Talapagligtas da” (Roma 3:23). Ginawa tamu ngan bage a ali kalugud-lugud keng Dios, kaya marapat mu na miparusan tamu. Uling deng egana-ganang kasalanan tamu bandang talwi laban la ngan keng Dios, ing alang anggang kaparusan mu ing managyung kabayaran keni. “Ing bayad na ning kasalanan, kamatayan; oneng ing regalung kusa nang babie ning Dios ya ing bie alang angga kayabe nang Cristo Jesus a Ginu tamu” (Roma 6:23).
Dapot, i Cristo Jesus na maski minsan ali migkasala (1 Pedro 2:22), ing alang anggang Anak ning Dios mig-ari yang tau (Juan 1:1, 14) at mete ya ban bayaran ing parusa a para kekatamu. “Oneng mete ya i Cristo para kekatamu kanitang makasalanan tamu pa!” (Roma 5:8). Mete ya i Cristo Jesus keng krus (Juan 19:31-42), tinggap ne ing kaparusan na dapat kekatamu (2 Corinto 5:21). King ikatlung aldo kinabie yang pasibayu (1 Corinto 15:1-4), patune ning tagumpe na laban king kasalanan ampo kamatayan. “Uli na ning maragul nang lunus, dininan na katamung bayung bie king kapamilatan na ning pamanyubli nang mebie Jesu-Cristo” (1 Pedro 1:3).
King kasalpantayanan dapat yang mibayu ing kaisipan tamu tungkul kang Cristo—nung ninu Iya, nanu ing gewa Na, at ing rason Na—para king kaligtasan (Gawa 3:19). Nung sumalpantaya tamu Kaya, magtiwala king Keyang kamatayan keng krus ban pagbayaran ing kasalanan tamu, tutung mipatawaran tamu ampo atanggap taya ing pengaku na bie alang angga king banua. “Uli na ning maragul nang lugud ning Dios king yatu binie ne ing bugtung nang Anak ban ing ninumang maniwala keya e ya mate nune mirinan yang bie alang angga” (Juan 3:16). “Nung ipasiag mu karing kekang labi, I Jesus Ginu ya at paniwalan mu king kabubusalan na ning pusu mu king pepasublian neng mie ning Dios, miligtas ka” (Roma 10:9). Kasalpantayanan mu kabud ketang meyari na nang dapat Cristo keng krus iyang dili ampo tune a dalan king bie alang angga! “Uling king grasya na ning Dios miligtas kayu king kapamilatan na ning pamanialpantaya yu kang Cristo. At ing kaligtasan a iti binie na ning Dios at e ibat kekayu. Iti e uli na ning kekayung dapat, inya e ya kailangan magparangalan ing ninuman” (Efeso 2:8-9).
Nung buri meng tanggapan i Cristo Jesus bilang Talapagligtas, malyari meng pangadi ini. Dapot tandanan mu na ala kening pangading ini o ken nanu mang pangadi ing kaligtasan mu. Pamagtiwala mu kabud kang Cristo ing magligtas keka keng kasalanan. Paralan yamu ing pangading ini ban apakit mu keng Dios ing tiwala mu Kaya at ban pasalamatan Me keng gewa nang pamanabus keka. “Ginu, aminan kung tutung mikasala ku laban keka at dapat mu na miparusan ku. Dapot pinusan nang Cristo Jesus ing kaparusan na dapat kanaku ban keng kapamilatan na ning kasalpantayanan Keya mipatawad ing kasalanan ku. Ika mu ing pagkatiwalan ku ken kanakung kaligtasan. Dakal pung salamat keng Kekayung grasya at kayupayan—ing regalu na ning bie alang angga! Amen!”
Mekapagdesisyun na ka ba tungkol kang Cristo uli na ning abasa mu keni? Nung makanta man, i-click me itang "tinggap ke I Cristo ngeni" kening lalam. English
Atin ka bang kutang?