Kutang
Nanu ya ing Cristianu?
Sagot
Madalas yang maiisplika agpang keng diksyunaryu ing Cristianu bilang “taung magpasiag pamanialpantaya kang Jesus bilang Cristo o metung a relihiung makabasi kareng turu nang Jesus.” Agyang masanting yang paunang isplika iti, kalupa da reng aliwang pamanisplikang akit keng diksyunaryu, ali ne lubus apapasiag ing katmung katutuan na ning Biblia tungkul king kabaldugan na ning tutung Cristianu. Atlu yang besis akit ing salitang “Cristianu” keng Bayung Tipan (Ding Dapat 11:26; 26:28; 1 Pedro 4:16). Minuna lang meaus “Cristianu” reng talatuki nang Jesu-Cristo king Antiokia (Ding Dapat 11:26) uling kaparewu nalang Cristo ding karelang gawa, gagawan, ampong pamanyabi. “Kayanib king panig nang Cristo” o “talatuki nang Cristo” ing kabaldugan na ning salitang “Cristianu.”
Ing makalungkut, maragul a parti ing melako keng tutu nang kabaldugan ning salitang “Cristianu.” Madalas ya mung magagamit iti patse ating taung relihiyosu o atin yang matas a moralidad pero ali ne man talaga tuneng talatuki nang Jesu-Cristo. Dakal taung ausan de ing sarili dang Cristianu agyang ali nala man tuneng sasalpantaya ampong magtiwala kang Jesus. Iisipan dang Cristianu la uli mung sisimba la o makatuknang la keng metung a bansang “Cristianu.” Oneng ali la sapat deng pamamuntang pisamban, pamaniaup kareng kalulu, o ing pamagpakabait a tau ban maaus Cristianu. Ali ka basta-basta maging Cristianu patse mumunta ka keng pisamban kalupa na mu ning ali ka basta-basta maging kotse patse minta ka keng talyer. Ali naka gagawang Cristianu ding pamagpamiembru keng metung a kapulungan, ing pane pamamunta kareng pigagawan, ampong ing pamamie keng obra na ning ministeryu.
Tuturu na ning Biblia na ali ya maging sapat ing pamagdapat tamung mayap ban tanggapan na katamu ning Dios. Ngana ning Tito 3:5, “linigtas na katamu, e uli na ning nanumang dapat a mayap a gewa tamu mismu, nune uli na ning sarili nang lunus. Linigtas na katamu king kapamilatan na ning danum a paglinis nung nu na katamu dirinan bayung pangabait at bayung bie a ibat king Banal a Espiritu.” Anya pin, ing metung a Cristianu apin iya itang taung mibait pasibayu ibat king Dios (Juan 3:3; Juan 3:7; 1 Pedro 1:23) ampong binie ne ing keyang pamanialpantaya ampong tiwala kang Jesu-Cristo bilang keyang Ginu ampong Talapagligtas. Ngana murin ning Efeso 2:8, “…Uling king grasya na ning Dios miligtas kayu king kapamilatan na ning pamanialpantaya yu kang Cristo. At ing kaligtasan a iti binie na ning Dios at e ibat kekayu.”
Ing tuneng Cristianu apin iya ing binie ne ing pamanialpantaya ampong tiwala na keng persona ampong gewa nang Jesu-Cristo, kayabe ing kamatayan Na keng krus bilang kabayaran kareng kasalanan ampo ing Keyang pamaniubling mebie king ikatlung aldo. Ngana ning Juan 1:12, “Makanyan man karetang tinanggap at meniwala keya binie na ing karapatan a maging anak na la ning Dios.” Ing lugud kareng aliwang tau ampo ing pamamintu keng Amanu ning Dios ding marka na ning tune a Cristianu (1 Juan 2:4,10). Anak ne ning Dios ing tune a Cristianu, parti ne ning pamilya na ning Dios, ampong medinan yang bayung bie kang Jesu-Cristo.
English
Atin ka bang kutang?