settings icon
share icon
Pergunta

Atu simu Jesus nudár ita-nia Salvadór pesoál ne’e signifika saida?

Hatán


Ita simu ona Jesus Kristu nudár ita-nia Salvador pesoál? Atu komprende didi'ak pergunta ne'e, ita tenke komprende uluk termu sira “Jesus Kristu," “Salvadór" no “pesoál".

Sé mak Jesus Kristu? Ema barak sei rekoñese Jesus Kristu nu'udar ema ne'ebé di'ak, mestre boot ida, ka Maromak nia profeta ida. Buat sira-ne'e loos tebes duni kona-ba Jesus, maibé buat sira ne’e la defini loloos sé mak Nia. Bíblia fó-hatene mai ita katak Jesus mak Maromak iha isin, Maromak ho forma ema (haree João 1:1, 14). Maromak mai iha rai atu hanorin ita, kura ita, korrije ita, perdua ita–no mate tanba ita! Jesus Kristu mak Maromak, Kriadór, Na'i soberanu. Ita simu ona Jesus ka lae?

Saida mak Salvadór, no tansá mak ita presiza Salvadór? Bíblia fó-hatene mai ita katak ita hotu halo ona sala. Ita hotu halo ona hahalok aat (Roma 3:10-18). Rezultadu husi ita-nia sala ne'e mak ita hetan Maromak nia hirus no julgamentu. Kastigu úniku ba sala sira halo kontra Maromak ne'ebé infinitu no rohan-laek mak kastigu ne’ebé laiha rohan (Roma 6:23; Revelasaun 20:11-15). Tanba ne'e mak ita presiza Salvadór!

Jesus Kristu mai iha rai no mate hodi ita-nia fatin. Jesus nia mate mak pagamentu infinitu ida ba ita-nia sala sira (2 Korintu 5:21). Jesus mate hodi selu kastigu ba ita-nia sala sira (Roma 5:8). Jesus selu folin ne'e atu nune'e ita labele selu. Jesus nia moris-hi 'as husi mate hatudu katak Ninia mate natoon ona atu selu kastigu ba ita-nia sala sira. Tan ne'e Jesus mak úniku Salvadór (João 14:6; Apóstolu 4:12)! Ita tau fiar ba Jesus nu’udar Ita-nia Salvadór ka?

Jesus mak ita-nia Salvadór “pesoál” ka? Ema barak haree Kristianizmu hanesan ba igreja, hala’o ritual, no/ka la halo sala ruma. Ne'e la’ós Kristianizmu. Kristianizmu ne'ebé loloos mak relasaun pesoál ho Jesus Kristu. Simu Jesus nu'udar ita-nia Salvadór pesoál, ne'e katak tau ita-nia fiar pesoál rasik no fiar ba Nia. La iha ema ida mak hetan salvasaun liuhusi ema seluk nia fiar. La iha ema ida mak hetan perdua liuhusi halo hahalok ruma. Úniku dalan atu hetan salvasaun mak atu simu Jesus nu'udar ita-nia Salvadór, tau fiar ba Ninia nia mate nu'udar kolen ba ita-nia sala sira no Ninia moris-hi'as nu'udar garantia ba moris rohan-laek (João 3:16). Jesus rasik mak ita-nia Salvadór ka?

Se ita hakarak simu Jesus Kristu nu'udar ita-nia Salvadór pesoál, hatete liafuan tuirmai ne'e ba Maromak. Hanoin bá, halo orasaun ne'e ka orasaun seluk sei la salva ita. Fiar de'it ba Jesus Kristu no ninia obra hotu ne'ebé remata ona iha krús tanba ita mak bele salva ita husi sala. Orasaun ne'e simplesmente hanesan dalan ida atu hatudu ba Maromak ita-nia fiar ba Nia no fó agradese ba Nia tanba fó ona salvasaun ba ita. “Maromak, ha'u hatene katak ha'u halo ona sala hasoru Ita no merese simu kastigu. Maibé ha'u fiar katak Jesus Kristu simu kastigu ne'ebé ha'u merese simu atu nune'e liuhusi fiar ba Nia, ha'u bele hetan perdua. Ha'u simu Ita-nia oferta perdaun nian no tau ha’u-nia fiar ba Ita hodi salva ha'u. Ha'u simu Jesus nu'udar ha'u-nia Salvadór pesoál! Obrigadu ba Ita-nia grasa furak no perdaun - prezente moris rohan-laek nian! Amen!”

Ita halo ona desizaun ida ba Kristu tanba buat ne'ebé Ita lee ona iha ne'e? Se nune'e, favór klik iha botaun "Ha'u simu ona Kristu ohin" iha kraik.

English



Fila-fali ba pájina inisiál Tetun

Atu simu Jesus nudár ita-nia Salvadór pesoál ne’e signifika saida?
© Copyright Got Questions Ministries