கேள்வி
ஆத்ம துணைகள் என்று ஒன்று இருக்கிறதா? நீங்கள் திருமணம் செய்துகொள்ள வேண்டும் என்று தேவன் ஒரு குறிப்பிட்ட நபரை வைத்திருக்கிறாரா?
பதில்
"ஆத்ம துணையின்" பொதுவான கருத்து என்னவென்றால், ஒவ்வொரு நபருக்கும், "சரியான பொருத்தம்" கொண்ட மற்றொரு நபர் இருக்கிறார், மேலும் இந்த ஆத்ம துணையைத் தவிர வேறு யாரையாவது நீங்கள் திருமணம் செய்து கொண்டால், நீங்கள் ஒருபோதும் மகிழ்ச்சியாக இருக்க மாட்டீர்கள். ஆத்ம துணையைப் பற்றிய இந்தக் கருத்து வேதாகமத்தின்படியானதா? இல்லை, நிச்சயம் இல்லை. ஆத்ம துணையின் கருத்து பெரும்பாலும் விவாகரத்துக்கான சாக்காகப் பயன்படுத்தப்படுகிறது. திருமணத்தில் மகிழ்ச்சியடையாதவர்கள் சில சமயங்களில் தங்கள் ஆத்ம துணையை திருமணம் செய்து கொள்ளவில்லை என்றும், எனவே விவாகரத்து செய்து தங்கள் உண்மையான ஆத்ம துணையை தேட ஆரம்பிக்க வேண்டும் என்றும் கூறுகின்றனர். இது ஒரு சாக்குபோக்கு, வேதாகமத்திற்கு எதிரான ஒரு அப்பட்டமான சாக்குபோக்கு. நீங்கள் திருமணமானவராக இருந்தால், நீங்கள் திருமணம் செய்துகொண்டவர் உங்கள் ஆத்ம துணை. மாற்கு 10:7-9 அறிவிக்கிறது, “இதினிமித்தம் புருஷனானவன் தன் தகப்பனையும் தாயையும் விட்டுத் தன் மனைவியோடே இசைந்திருப்பான்; அவர்கள் இருவரும் ஒரே மாம்சமாயிருப்பார்கள்; இவ்விதமாய் அவர்கள் இருவராயிராமல் ஒரே மாம்சமாயிருக்கிறார்கள். ஆகையால் தேவன் இணைத்ததை மனுஷன் பிரிக்காதிருக்கக்கடவன் என்றார்.” கணவனும் மனைவியும் “ஒன்றாகியுள்ளனர்,” “ஒரே மாம்சம்,” “இனி அவர்கள் இருவர் அல்ல, ஒன்று,” மற்றும் “ஒன்றாக இணைந்துள்ளனர்,” அதாவது ஆத்ம துணைகள்.
ஒரு தம்பதியர் விரும்புவது போல் திருமணம் ஒன்றுபட்டதாகவும் மகிழ்ச்சியாகவும் இருக்காது. கணவனும் மனைவியும் அவர்கள் விரும்பும் உடல், உணர்ச்சி மற்றும் ஆவிக்குரிய ஒற்றுமை இல்லாமல் இருக்கலாம். ஆனால் இந்த நிகழ்விலும் கூட, கணவனும் மனைவியும் இன்னும் ஆத்ம துணையாக இருக்கிறார்கள். அத்தகைய சூழ்நிலையில் ஒரு ஜோடி உண்மையான "ஆத்ம துணை" நெருக்கத்தை வளர்ப்பதில் வேலை செய்ய வேண்டும். திருமணத்தைக் குறித்து வேதாகமம் கற்பிப்பதற்கு (எபேசியர் 5:22-33) கீழ்ப்படிவதன் மூலம், ஒரு ஜோடி "ஒரே மாம்சமாக" ஆத்ம துணையாக இருப்பது போன்ற நெருக்கம், அன்பு மற்றும் அர்ப்பணிப்பு ஆகியவற்றை வளர்த்துக் கொள்ள முடியும். நீங்கள் திருமணமானவராக இருந்தால், உங்கள் ஆத்ம துணையை நீங்கள் திருமணம் செய்து கொண்டீர்கள். திருமணம் எவ்வளவு சீரற்றதாக இருந்தாலும், தேவன் குணப்படுத்துதல், மன்னிப்பு, மீட்டெடுத்தல் மற்றும் உண்மையான திருமண அன்பையும் நல்லிணக்கத்தையும் கொண்டு வர முடியும்.
தவறான நபரை திருமணம் செய்ய முடியுமா? நாம் தேவனுக்கு நம்மைக் கொடுத்து, அவருடைய வழிநடத்துதலை நாடினால், அவர் நம்மை வழிநடத்துவதாக வாக்குக் கொடுக்கிறார்: “உன் சுயபுத்தியின்மேல் சாயாமல், உன் முழு இருதயத்தோடும் கர்த்தரில் நம்பிக்கையாயிருந்து, உன் வழிகளிலெல்லாம் அவரை நினைத்துக்கொள்; அப்பொழுது அவர் உன் பாதைகளைச் செவ்வைப்படுத்துவார்” (நீதிமொழிகள் 3:5-6). நீதிமொழிகள் 3:5-6 இன் உட்குறிப்பு என்னவென்றால், நீங்கள் உங்கள் முழு இருதயத்தோடும் கர்த்தரை நம்பாமல், உங்கள் சொந்த புரிதலில் சாய்ந்திருந்தால், நீங்கள் தவறான திசையில் செல்லக்கூடும். ஆம், கீழ்ப்படியாமை மற்றும் தேவனுடன் நெருங்கிய கூட்டுறவு இல்லாத நேரத்தில், அவர் உங்களை திருமணம் செய்து கொள்ள விரும்பாத ஒருவரை திருமணம் செய்வது சாத்தியமாகும். அப்படிப்பட்ட ஒரு சந்தர்ப்பத்திலும் கூட, தேவனானவர் இறையாண்மை உள்ளவரும் சகலத்தையும் தமது கட்டுப்பாட்டிலும் வைத்திருக்கிறார்.
ஒரு திருமணம் தேவனுடைய சித்தமாக இல்லாவிட்டாலும், அது அவருடைய இறையாண்மை மற்றும் திட்டத்திற்கு உட்பட்டது. தேவன் தள்ளிவிடுதலை வெறுக்கிறார் (மல்கியா 2:16), மேலும் "தவறான நபரை திருமணம் செய்வது" விவாகரத்துக்கான காரணங்களாக வேதாகமத்தில் ஒருபோதும் முன்வைக்கப்படவில்லை. "நான் தவறான நபரை மணந்தேன், என் உண்மையான ஆத்ம துணையை நான் கண்டுபிடிக்கும் வரை மகிழ்ச்சியாக இருக்க மாட்டேன்" என்ற கூற்று இரண்டு விஷயங்களில் வேதாகமத்திற்கு எதிரானது. முதலாவதாக, உங்கள் தவறான முடிவு தேவனுடைய சித்தத்தை மீறி, அவருடைய திட்டத்தை அழித்துவிட்டது என்கிற கூற்று. இரண்டாவதாக, போராடுகின்ற திருமணத்தை மகிழ்ச்சியாகவும், ஒற்றுமையாகவும், வெற்றிகரமானதாகவும் ஆக்க தேவனால் முடியாது என்னும் கூற்றாகும். நாம் செய்யும் எதுவும் தேவனுடைய இறையாண்மையை சீர்குலைக்க முடியாது. தேவன் எந்த இரண்டு நபர்களையும், எவ்வளவு பொருத்தமற்றவர்களாக இருந்தாலும், அவர்களை ஒருவருக்கொருவர் சரியான இரு நபர்களாக வடிவமைக்க முடியும்.
நாம் தேவனுடன் நெருங்கிய ஐக்கியம் வைத்திருந்தால், அவர் நம்மை வழிநடத்துவார், வழிகாட்டுவார். ஒரு நபர் தேவனுடன் நடந்துகொண்டு, உண்மையாகவே அவருடைய சித்தத்தை நாடினால், தேவன் அந்த நபரை தாம் நினைக்கும் மனைவியிடம் அழைத்துச் செல்வார். நாம் அவருக்கு அடிபணிந்து அவரைப் பின்பற்றினால் தேவன் நம்மை நம் "ஆத்ம துணையிடம்" அழைத்துச் செல்வார். இருப்பினும், ஆத்ம துணையாக இருப்பது ஒரு நிலை மற்றும் ஒரு நடைமுறை. ஒரு கணவனும் மனைவியும் ஆத்ம துணையாக இருக்கிறார்கள், ஏனென்றால் அவர்கள் “ஒரே மாம்சமாக,” ஆவிக்குரிய ரீதியாகவும், உடல் ரீதியாகவும், உணர்ச்சி ரீதியிலும் ஒருவருக்கொருவர் ஒன்றுபட்டுள்ளனர். இருப்பினும், நடைமுறையில், ஒரு ஜோடி என்றால் என்ன, ஆத்ம துணையை எடுத்துக்கொள்வது மற்றும் அதை நாளுக்கு நாள் யதார்த்தமாக்குவது ஒரு செயல்முறை உள்ளது. திருமணத்தின் வேதாகம முறையை செயல்படுத்துவதன் மூலம் மட்டுமே உண்மையான ஆத்ம துணையுடன் ஒருங்கிணைந்து இருக்கமுடியும்.
English
ஆத்ம துணைகள் என்று ஒன்று இருக்கிறதா? நீங்கள் திருமணம் செய்துகொள்ள வேண்டும் என்று தேவன் ஒரு குறிப்பிட்ட நபரை வைத்திருக்கிறாரா?
