Ka’at chi:
Yesu ni Ruhanga? Hariho obu Yesu yaagizire ngu ni Ruhanga?
Núuc t’aan:
Abamwe abarikuhakana ngu Yesu ni Ruhanga nibagira ngu Yesu taragizire ngu ni Ruhanga. N'eky'amazima ngu Baiburi terikuhandiika ngu Yesu akagamba ebigambo ebi, "Niinye Ruhanga." Kwonka, eki tikirikumanyisa ngu Yesu taragizire ngu ni Ruhanga.
Yesu niwe Ruhanga? Yesu akagira ngu niwe Ruhanga.
Nk'eky'okureeberaho, ebigambo bya Yesu ebiri omuri Yohaana 10:30, "Nyowe na Taata turi bamwe." Nitwetenga kureeba oku Abayudaaya baatwarize kumanya ngu akaba naagamba ngu ni Ruhanga. Bakagyezaho kumuteera amabaare ahabw'enshonga egi: "Iwe, omuntu, orikugira ngu ori Ruhanga" (Yohaana 10:33, enshonga ekatirire). Abayudaaya baketeegyereza gye eki Yesu yaabaire naagamba. Obu Yesu yaagira ati, "Nyowe na Taata turi bamwe," akaba naagamba ngu We na Taata nibamwe kandi baine omutwarize gumwe. Yohaana 8:58 n'eky'okureeberaho ekindi. Yesu akagira ati, "Buzimazima nimbagambira... Aburahamu atakabaireho, nyowe nkaba ndiho!" Eki nikimanyisa okuruga omu Okuruga 3:14 obu Ruhanga yaayoreka ngu "Niinye." Abayudaaya abaahuriire ebigambo ebi bakagarukamu barikutwara amabaare kumwita ahabw'okujumirira, nk'oku eiteeka rya Musa ryabaire niriragiira (Abaleevi 24:16).
Mbwenu shi Yesu ni Ruhanga? Abakuratsi be bakagira ngu niwe Ruhanga.
Yohaana naagarukamu ekiteekateeko ky'obwaruhanga bwa Yesu ati: "Kigambo [Yesu] akaba ari Ruhanga" kandi "Kigambo yaaba omubiri" (Yohaana 1:1,14). Emishororongo egi neeyoreka butunu ngu Yesu ni Ruhanga omu mubiri. Ebyakozirwe 20:28 neetugira ngu, "Muriise ekanisa ya Ruhanga, ei yaaguzire n'eshagama ye." N'oha owaaguzire ekanisa n'eshagama ye? Yesu Kristo. Kandi omushororongo nigwo gumwe nigworeka ngu Ruhanga akagura ekanisa ye n'eshagama ye. N'ahabw'ekyo, Yesu ni Ruhanga.
Tomasi omukuratsi we akagamba ahari Yesu ati, "Mukama wangye kandi Ruhanga wangye" (Yohaana 20:28). Yesu taramuhabwire. Tito 2:13 neetuhwera kutegyereza okwija kwa Ruhanga waitu kandi Omujuni, Yesu Kristo (reeba kandi 2 Petero 1:1). Omu Abaheburaayo 1:8, Ishe arikugamba ahari Yesu ati, "Kwonka ahari Mwana naagira ati: Ekitebe kyawe ky'obukama, ai Ruhanga, n'eky'ebiro n'ebiro, kandi obutegyeki bwawe n'obw'okuhikiirira." Ishe naagamba ahari Yesu nka Ruhanga, ekirikworeka ngu buzimazima Yesu ni Ruhanga.
Omu Okushuuruurwa, maraika akaragiira entumwa Yohaana okuramya Ruhanga wenka (Okushuuruurwa 19:10). Emirundi mingi omu Byahandiikirwe Yesu naaramibwa (Matayo 2:11; 14:33; 28:9, 17; Luka 24:52; Yohaana 9:38). Tarikuhakanisa abantu ahabw'okumuramya. Ku ogire ngu Yesu akaba atari Ruhanga, akaagambiire abantu kutamuramya, nk'oku maraika omu Okushuuruurwa yaakozire. Oyihireho ebi, hariho emishororongo mingi omu Byahandiikirwe erikworeka ngu Yesu ni Ruhanga.
Yesu ni Ruhanga? Enshonga ahabw'enki Yesu ashemereire kuba ari Ruhanga.
Enshonga nkuru erikureetera Yesu kuba Ruhanga n'okugira ngu, ku araabe atari Ruhanga, okufa kwe kukaabaire kutarikubaasa kushashura eibanja ry'ebibi by'ensi (1 Yohaana 2:2). Ekihangirwe, eki Yesu yaabaire naabaasa kuba ku araabe atari Ruhanga, kikaba kitarikubaasa kushashura omushango ogutarikubaasa kuhika ogurikwetengyesa ahabw'okushiisha Ruhanga otarikubaasa kuhika. Ruhanga wenka niwe yaabaire naabaasa kushashura omushango ogutarikuhika nk'ogwo. Ruhanga wenka niwe yaabaire naabaasa kutwara ebibi by'ensi (2 Abakorinso 5:21), akafa, kandi akazooka, arikworeka obusinguzi bwe aha kibi n'okufa.
Yesu ni Ruhanga? Eego. Yesu akeegambaho nka Ruhanga. Abakuratsi be bakaba nibamwikiriza nka Ruhanga. Okujunwa nikukora Yesu yaaba ari Ruhanga. Yesu ni Ruhanga omu mubiri, Alifa na Omega ow'ebiro byoona (Okushuuruurwa 1: 8; 22: 13), kandi Ruhanga omujuni waitu (2 Petero 1: 1).
English
Oine ebibuuzo?