Ka’at chi:
Omukristaayo niki manyisa ki?
Núuc t’aan:
Enyetegyereza y'ekitabo ekirikushoboorora ebigambo ey'Omukristaayo neebaasa kuba neeshusha nka "omuntu orikwikiriza ngu Yesu niwe Kristo nari omu diini erikwegamira aha nyegyesa za Yesu." N'obu eki kirikuba kiri ekicweka kirungi ky'okutandikiramu, nk'oku enyetegyereza z'ekitabo ekirikushoboorora ebigambo nyingi zirikworeka, tikirikworeka amazima g'omu Baiburi agarikukwata aha kuba Omukristaayo. Ekigambo "Omukristaayo" nikikoresibwa emirundi eshatu omu Ndagaano Ensya (Ebyakozirwe 11:26; 26:28; 1 Petero 4:16). Abakuratsi ba Yesu Kristo bakabanza kwetwa "Abakristaayo" omuri Antiyokiya (Ebyakozirwe 11:26) ahabw'okugira ngu emitwarize yaabo, emirimo yaabo, n'ebigambo byabo bikaba biri nka Kristo. Ekigambo "Omukristaayo" nikimanyisa, "okuba ow'ekibiina kya Kristo" nari "omukuratsi wa Kristo."
Eky'obusaasi bwanyima y'obwire, ekigambo "Omukristaayo" kifeereirwe omugasho gwakyo, kandi nikikira kukoresibwa aha muntu orikwikiriza nari oine emicwe mirungi, kwonka orikubaasa kuba ari omukuratsi wa Yesu Kristo nari atariwe. Abantu baingi abatarikwikiriza kandi abatarikwesiga Yesu Kristo, nibeetwara nk'abakurasi ba Kristo ahabw'okugira ngu nibaza aha kanisa nari nibatuura omu ihanga "ry'Abakurasi ba Kristo". Kwonka okuza aha kanisa, okuheereza abo abatarikubaasa nkiwe, nari okuba omuntu murungi tikirikukuhindura Omukristaayo. Okuza aha kanisa tikirikukuhindura Omukristaayo, nk'oku okuza aha garagi kutakuhindura emotoka. Okuba memba w'ekanisa, okuza omu kushaba butoosha, n'okuhayo aha mirimo y'ekanisa tikirikukuhindura Omukristaayo.
Baiburi neegira ngu emirimo mirungi ei turikukora terikubaasa kutureetera kusiimwa Ruhanga. Tito 3: 5 nihagira ngu, "Akatukiza, ti habw'ebikorwa by'okuhikiirira ebi twabaire tukozire, kureka ahabw'embabazi ze. Akatukiza arikuraba omu kunaaba okw'okuzaarwa busya n'okuhindurwa basya Omwoyo Orikwera." N'ahabw'ekyo, Omukristaayo n'omuntu owaazairwe busya Ruhanga (Yohaana 3:3; Yohaana 3: 7; 1 Petero 1:23) kandi akaikiriza kandi yaayesiga Yesu Kristo. Abaefeso 2:8 nihatugambira ngu "... ahabw'embabazi za Ruhanga mukajunwa ahabw'okwikiriza, kandi eki tikirikuruga omuriimwe, n'ekiconco kya Ruhanga."
Omukristaayo w'amazima n'omuntu orikwikiririza omuri Yesu Kristo n'omurimo gwe, otwariiremu okufa kwe aha musharaba nk'omushara gw'ebibi n'okuzooka kwe aha kiro kya kashatu. Yohaana 1:12 neetugambira, "Kwonka boona abaamwakiire, abaikiriize eiziina rye, akabaha obushoboorozi bw'okuba abaana ba Ruhanga." Akamanyiso k'Omukristaayo w'amazima n'okukunda abandi n'okworobera Ekigambo kya Ruhanga (1 Yohaana 2: 4, 10). Omukristaayo w'amazima buzima n'omwana wa Ruhanga, omwe aha b'eka ya Ruhanga, kandi omuntu ohairwe amagara masya omuri Yesu Kristo.
English
Oine ebibuuzo?