Ka’at chi:
Mperize kuta okwikiriza kwangye omuri Yesu... hati nooza kukora ki?
Núuc t’aan:
Ninkukurusya! Okozire encwamu erikuhindura amagara gaawe! Obundi noobaasa kuba nooyebuuza oti: 'Mbwenu shi? Nimbaasa kutandika nta orugyendo rwangye na Ruhanga?' Engyenderwaho eitaano ezirikugambwaho ahaifo nizija kukuha obuhabuzi kuruga omu Baiburi. Ku oraabe oine ebibuuzo aha rugyendo rwawe, za aha www.GotQuestions.org.
1. Reeba ngu noyetegyereza okujunwa.
1 Yohaana 5: 13 netugambira: Ebi naabibahandiikira imwe abarikwikiriza eiziina ry'Omwana wa Ruhanga, ngu mubone kumanya ku mwine amagara agatahwaho. Ruhanga naayenda ngu tushwijume okujunwa. Naayenda ngu tugire obumanzi bw'okumanya ngu buzima tukajunwa. Omu bugufu, ka tureebe enshonga nkuru ezirikukwata aha kujunwa:
(a) Twena tusiisire. Twena tukozire ebintu ebitarikushemeza Ruhanga (Abarooma 3: 23).
(b) Ahabw'ekibi kyaitu, tushemereire kufubirwa n'okutana na Ruhanga ebiro byona (Abarooma 6: 23).
(c) Yesu akafeera aha musharaba kushashura ekifubiro ky'ebibi byaitu (Abarooma 5:8; 2 Abakorinso 5:21). Yesu akafeera omu mwanya gwaitu, yaatwara ekifubiro eki twabaire tushemereire kutunga. Okuzooka kwe kukahamya ngu okufa kwa Yesu kukaba nikumara kushashura ebibi byaitu.
(d) Ruhanga naaha okusaasirwa n'okujunwa abo boona abarikwikiririza omuri Yesu - barikwesiga okufa kwe nk'okushashura ebibi byaitu (Yohaana 3: 16; Abarooma 5: 1; Abarooma 8: 1).
Obwo nibwo butumwa bw'okujunwa! Ku oraabe waataire okwikiriza kwawe omuri Yesu Kristo nk'omujuni waawe, ori omujunwa! Ebibi byawe byona bisaasiirwe, kandi Ruhanga naaraganisa kutakurekaho nari kukutsigaho (Abarooma 8:38-39; Matayo 28:20). Ijuka, okujunwa kwawe kuri omuri Yesu Kristo (Yohaana 10:28-29). Ku oraabe nooyesiga Yesu wenka nk'omujuni waawe, noobaasa kugira obwesigye ngu noija kumara ebiro byona na Ruhanga omu iguru!
Ronda ekanisa nungi erikwegyesa Baiburi.
Reka kuteekateeka aha kanisa nk'ekyombeko. Ekanisa n'abantu. N'eky'omugasho munonga abikiririza omuri Yesu Kristo kukwatanisa n'abandi. Ogwo n'ogumwe aha migasho mikuru y'ekanisa. Mbwenu nk'oku wataire okwikiriza kwawe omuri Yesu Kristo, nitukuhiga munonga kuronda ekanisa erikwikiriza ebiri omu Baiburi omu kicweka kyanyu kandi ogambeho n'omuhereza. Mumurekye amanye okwikiriza kwawe kusya omuri Yesu Kristo.
Ekigyendererwa kya kabiri ky'ekanisa n'okwegyesa Baiburi. Nobaasa kwega oku orikubaasa kugyendera aha buhabuzi bwa Ruhanga omu magara gaawe. Okwetegyereza Baiburi nikyo kisumuruzo ky'okugira amagara marungi g'Ekikristaayo. 2 Timoseo 3: 16-17 nihagira ngu, "Ebyahandiikirwe byoona bihandiikirwe omwoyo wa Ruhanga, kandi biine omugasho gw'okwegyesa, n'okuhana, n'okuhabura, n'okutendeka omu kuhikiirira, ngu omuntu wa Ruhanga abone kuba ohikiiriziibwe kimwe, natebeekanisibwa kimwe kukora omurimo gwona omurungi."
Ekigyendererwa kya kashatu ky'ekanisa n'okuramya. Okuramya n'okusiima Ruhanga ahabw'ebyo byoona ebi akozire! Ruhanga atujunire. Ruhanga naatukunda. Ruhanga natureeberera. Ruhanga natwebembera kandi natuhabura. Nituzibirwaki obutamusiima? Ruhanga n'orikwera, ahikiriire, aine rukundo,aine okusasiira, kandi ow'embabazi nyingi. Okushuuruurwa 4: 11 nihagira hati: "Mukama waitu kandi Ruhanga waitu, oshemereire kuhimbisibwa n'okuheebwa ekitiinisa n'obushoboorozi, ahabw'okuba niiwe wahangire byoona, kandi ahabw'okusiima kwawe bikahangwa kandi bikabaho."
3. Gira obwire bw'okuteekateeka ahari Ruhanga buri izooba.
N'eky'omugasho munonga ahariitwe kumara obwire buriizooba turikuteekateeka ahari Ruhanga. Abantu abamwe eki nibakyeta "obwire bw'okuhunama." Abandi nibakyeta "okwehayo," ahabw'okuba n'obwire obu turikwehayo ahari Ruhanga. Abamwe nibakunda kutaho obwire omu kasheeshe, kandi abandi nibakunda omu mwabazyo. Tikiri ky'omugasho eki orikweta obwire obu nari obu orikuKIkora. Ekikuru n'okuguma nooheza obwire na Ruhanga. Ni bintu ki ebirikureeta obwire bwaitu na Ruhanga?
(a) Okushaba. Okushaba n'okugamba na Ruhanga. Gamba na Ruhanga ebirikukwerarikiriza n'oburemeezi bwawe. Shaba Ruhanga kukuha obwengye n'obuhabuzi. Shaba Ruhanga kukuha ebirikwetengyesa. Gambira Ruhanga oku orikumukunda n'oku orikusiima byona ebi arikukukukorera. Nikyo kikirikumanyisa okushaba.
(b) Okushoma Baiburi. Okwongyera aha kwegyesibwa Baiburi omu kanisa, Sande School, nainga omu kweyegyesa Baiburi - oine kuba noyeeshomera Baiburi. Baiburi erimu buri kimwe eki orikwetenga kumanya kubaasa kugira amagara marungi g'Ekikristaayo. Erimu obuhabuzi bwa Ruhanga aha ku orikubaasa kucwamu gye, oku orikubaasa kumanya ebi Ruhanga akukunda, oku orikubaasa kuheereza abandi, n'oku orikubaasa kukura omu by'omwoyo. Baiburi n'Ekigambo kya Ruhanga ahariitwe. Baibuli buzima n'obuhabuzi bwa Ruhanga aha ku turikubaasa kutwaza omu muringo ogurikumushemeza kandi ogurikutugaruramu amaani.
Gira omukago n'abantu abarikubaasa kukuhwera omu by'omwoyo.
1 Abakorinso 15:33 nihagira ngu, "Mutahabisibwa: ""Emikago mibi neeshiisha emicwe mirungi."" Baiburi eijwire okurabura oku abantu ""ababi"" barikubaasa kutugyemesereza. Kumara obwire n'abo abarikwejumba omu bikorwa bibi nikiija kutureetera kwohibwa ebikorwa ebyo. Emicwe y'abo abu turikuba turi nabo neija kutugyemesereza. Egi niyo nshonga ahabw'enki kiri kikuru kwetoroora abantu abandi abarikukunda Mukama kandi abamaririire ahariwe.
gyezaho kusherura omunywani nari babiri, obundi kuruga omu kanisa yaawe, abarikubaasa kukuhwera n'okukuhuumuriza (Abaheburaayo 3:13; 10:24). Shaba banywani baawe kukuha obujunaanizibwa ahabw'obwire bwawe bw'okuhunama, emirimo yaawe, n'okugyenda kwawe na Ruhanga. Shaba n'obu oraabe noobaasa kubakorera nikyo kimwe. Eki tikirikumanyisa ngu oine kurekyera aho banywani baawe boona abatarikumanya Mukama Yesu nk'omujuni waabo. Gumizamu ori munywani waabo kandi obakunde. Beegyese ngu Yesu ahindwire amagara gaawe kandi torikubaasa kukora byoona ebi waabaire okora. Shaba Ruhanga kukuha emigisha y'okugaaniira ahari Yesu n'abanywani baawe.
5. Batizibwa.
Abantu baingi baine okwetegyereza kubi okw'okubatizibwa. Ekigambo kubatiza nikimanyisa "okwibika omu maizi." Okubatizibwa n'omuringo gw'omu Baiburi gw'okworeka omu bantu ku buzima orikwikiririza omu Kristo n'okwehayo kwawe okumukuratira. Ekikorwa kyokukwibika omu maizi nikimanyisa okuziikwa hamwe na Kristo. Okuruga omu maizi nikimanyisa okuzooka kwa Kristo. Okubatizibwa nikimanyisa okwegaita hamwe n'okufa, okuziikwa, n'okuzooka kwa Yesu (Abarooma 6:3-4).
Okubatizibwa tikwo kurikukujuna. Okubatizibwa tikurikwozyaho ebibi byawe. Okubatizibwa n'omuringo gw'okworobera, okurangirira omu bantu okwikiriza kwawe omuri Kristo wenka ahabw'okujunwa. Okubatizibwa n'okw'omugasho ahabw'okuba n'omuringo gw'okworobera - okurangirira omu bantu okwikiriza kwawe omuri Kristo n'okwehayo kwawe ahariwe. Ku oraabe oyeteekateekire kubatizibwa, oshemereire kugamba n’omuhereza waawe.
English
Oine ebibuuzo?