Question
Alla asé ne?
Answer
Zendilla Alla asé de yían oré saabut gorí no faré hendilla Alla nái de yían oré yó saabut gorí no faré. Añára re Pak Kalame (Baibéle) hoóde, añára ttú iman loi Alla asé de yían gosá foríbou: “Iman sára Alla ttú fosón lafán gorá namunkin, kiyólla-hoilé zee Allar hañsé aiyé tattú yián iman añna foribóu de ki, Íba moujud asé, ar zará Íba ré dildi tua tará re bokcíc de” (Híbraniyól 11:6).
Zodi Alla saá, toóile Alla Nize fura duniyái re dehá dii, Íba asé de yían saabut gorí faittóu. Montor, Zodi Alla ye yían goré toóile iman beházor ói zaibói. Hetólla Isá ye Toómas oré hoiyé de, “Toómas, tui Añáre deikkós dé hétolla iman ainnós de. Zetará no dekí iman ané ítara mubarek” (Yuhúnna 20:29).
Yían ólla, yián noó de ki, Alla asé de yían or honó saabut nái. Pak Kalame (Baibéle) hoóde, “Asman ókkolé Allar mohíma gaa, edde zobine Íbar át or ham oré dehá, fottí ekkán noiya dine Allar mohímar hotá hoó edde fottí ekkán raite Allar giyán zahér goré. Eçé honó hotá nái edde zubán o nái zeçé itarár abás no funé. ítarár abás furá duniyáit foóiccé edde ítarár hotá ókkol duniyáir céc-mata foijjónto foóiñccé” (Zobur 19:1-4).
Añára fottí ekzone tará, ar duniyái kúñçá sára tiyáiya asé de, edde fura duniyáir cúndoijja girí re dekí zani farí de edde meésus gorí farí de ki, iín beggún or Banoiya Ekzon asé.
Añára báfi saáile bicí sóyi gorí buzi farí de ki, Alla asé, tóu bicí maincé Alla asé de yían oré inkár goré. Pak Kalame (Baibéle) hoóde, ‘Foóle Alla asé de yían inkár goré’ (Zobur 14:1). Itíhac ot saáile lót fai de béc ekdók maincé Alla asé de yían biccác goré.
Añára re Pak Kalame (Baibéle) hoóde ki, bicí maincé Allar giyán oré forái felaibóu ar misá re biccác goríbóu. Romiyól 1:25 hoóde, “Kiyólla-hoilé ítara Allar sóiyi re misát bodoli félaiyé, ar ítara foidagoijjá jiníc or ebaadot goré montor Foidagoróyar ebaadot no goré, Zibár taarif hámica úwat táke! Aamin.” Pak Kalame (Baibéle) hoóde, honó kiyé Alla re waaja sára biccác no goré: “Kiyólla-hoilé duniyái banaiyé de héla lóti Íbar andeikká fítorot, yáni Íbar ofúrani kudurut edde Kúdayi sáf-sáf gorí daháza; Íba ye banaiyé de jiníc ottú híin zani fare, zeéne ítara honó bahána di no fare” (Romiyól 1:20).
Alla asé de yían or honó sáiñs ottú saabut nái de hetólla maincé Alla asé de yían oré inkár goré ar ítara biccác no goré de kiyólla hoilé, zodi ítará Alla ase de yían biccác goré toóile ítara ttú Allar hokumot or tolé taká foríbou edde Allar háñsottú ítara goijjé de gunár maf saá foribóu (Romiyól 3:23; 6:23).
Alla zodi asé de óile, tóoile añára ttú añárár ham or hísaf beggún Allar háñse diyá foríbou. Alla zodi nái de óile, toóile añára Alla ye añárár bisár goríbou de honó dhoór sára añára ttú ziyán goittíóu mone hoó yían gorí faríyum. Yían ólla bóuli Alla asé de yían bicí maincé biccác no goré de. Alla asé edde Alla asé de yían beggúne zané montor tóu ítará biccác no goré.
Alla asé de yían añára keéngorí zaní faijjúm? Añára Isáyí ókkolé Alla asé de yían zaní farí, kiyólla hoilé añára fottí din Alla llói hotá hoói. Alla ye hoóde híin añára añárár han ot no fúni montor Íba añárár fúañti asé de yían añára meésus gorí farí.; añára Íbar muhábbot oré zaní ar Íbar rahámot oré hasíl gorí.
Añárár zibon ot bicí sís ókkol oóde asé ziín honó kiyé kiyólla oddé yián buzái di no fare, montor baná Alla ye buzái di faré.
Alla ye añára re taajuippá gorí basáiye edde añára báfi kul gorí no faríde héndilla gorí añárár zindigi ré bodoillé. Añára Alla re modot gorí no fariyúm montor Íba asé de yían cikár gorí fariyúm edde Íba asé de yían ólla añára Íbar taarif gorí faijjúm.
Alla asé de yían tuñí torka-tórki di gosí no faribá montor iman di gosí faribá (Híbraniyól 11:6). Alla re biccác gorón maáni andar ot faál marón noó montor sómkedde foór ot zoón zeçé agé loti bicí manúic ókkol asé.
English
Alla asé ne?