അശ്ലീല ചിത്രങ്ങളെപ്പറ്റി ബൈബിൾ എന്താണ്‌ പഠിപ്പിക്കുന്നത്‌?



ചോദ്യം: അശ്ലീല ചിത്രങ്ങളെപ്പറ്റി ബൈബിൾ എന്താണ്‌ പഠിപ്പിക്കുന്നത്‌?

ഉത്തരം:
ഇന്റര്‍നെറ്റിൽ ഏറ്റവും അധികം അന്വേഷിക്കപ്പെടുന്നത് അശ്ലീല സൈറ്റുകളാണ്. മറ്റേതിനേക്കാള്‍ അധികം ലോകത്തിൽ ഇന്ന്‌ പ്രചാരത്തിലുള്ളത്‌ അശ്ലീല ചിത്രങ്ങളാണ്‌. ദൈവം മനുഷ്യനു അനുഗ്രഹിച്ചുകൊടുത്ത ലൈംഗീകതയെ പിശാച്‌ വളച്ചൊടിച്ച്‌ മനുഷ്യനെ പാപത്തിന്‌ അധീനനാക്കി തീര്‍ത്തിരിക്കയാണ്‌. ലൈംഗീകതയില്‍ നിന്ന്‌ ഭാര്യാഭര്‍ത്താക്കന്‍മാര്‍ക്ക്‌ ദൈവം അനുഗ്രഹിച്ചുകൊടുത്ത നന്‍മയും അനുഗ്രഹവും പിശാച്‌ എടുത്ത്‌ അവയെ കാമചേഷ്ടകള്‍ക്കും, വ്യഭിചാരത്തിനും, സ്വവര്‍ഗ്ഗഭോഗത്തിനും, ബലാത്സംഗത്തിനും, അശ്ലീലതക്കും മാര്‍ഗ്ഗമാക്കിയിരിക്കുന്നു. അശ്ലീല ചിത്രങ്ങള്‍ കാണുന്നത്‌ പിന്നീട്‌ വലിയ ലൈംഗീകപാപജീവിതത്തിലേക്കും ദുഷ്ടതയിലേക്കുമുള്ള വാതിൽ ആയിത്തീരുന്നു (റോമർ 6:19). അശ്ലീല ചിത്രങ്ങള്‍ കാണുന്നവർ അതിന്‌ അടിമകളായിത്തീരുന്നു എന്നതിന്‌ വേണ്ടിടത്തോളം തെളിവുകൾ ഉണ്ട്‌. ഡ്രഗ്‌ ഉപയോഗിക്കുന്നവർ കാലക്രമത്തിൽ അധികം അധികം ഉപയോഗിച്ചെങ്കിലേ 'കിക്ക്‌' കിട്ടുകയുള്ളു എന്ന പോലെ തന്നെ അശ്ലീല ചിത്രങ്ങള്‍ കാണുന്നവരും കാലക്രമത്തിൽ അധികമധികം കാമാര്‍ത്തികളാൽ വശംവദരാകും.

വേദപുസ്തകത്തില്‍ പാപങ്ങളെ മൂന്നു പ്രധാന വകുപ്പുകളായി തിരിച്ചിരിക്കുന്നു. കണ്‍മോഹം, ജഡമോഹം, ജീവനത്തിന്റെ പ്രതാപം എന്നിവയാണ്‌ അവ (1 യോഹന്നാൻ 2:16). അശ്ലീലചിത്രങ്ങള്‍ സംശയലേശമില്ലാതെ കണ്‍മോഹത്തിൽ പെടുന്നതും ജഡമോഹത്താൽ ഉളവാകുന്നതുമാണ്‌. ഫിലിപ്പ്യർ 4:8 ൽ നാം നമ്മുടെ ചിന്തക്ക്‌ ഉള്‍പെടുത്തേണ്ട കാര്യങ്ങളെപ്പറ്റി പറഞ്ഞിട്ടുണ്ട്‌. അശ്ലീലചിത്രങ്ങള്‍ കാണുന്നത്‌ ഒരിക്കലും ആ പട്ടികയിൽ ഉള്‍പ്പെടുത്താവുന്നതല്ല. അശ്ലീല ചിത്രങ്ങള്‍ കാണുന്നത്‌ മൂലം നാം പാപത്തിന് അടിമപ്പെടുന്നു. (1 കൊരിന്ത്യർ 6:12; 2 പത്രോസ് 2:19). അത്‌ നമ്മെ നശിപ്പിക്കുന്നതാണ്‌ (സദൃ വാക്യങ്ങൾ 6:25-28; യെഹെസ്കേൽ 20:30; എഫെസ്യർ 4:19). അന്യ ജഡത്തെ മോഹിക്കുന്നത്‌ ദൈവം വെറുക്കുന്ന പാപമാണ്‌ (മത്തായി 5:28). ഒരു വ്യക്തി അശ്ലീല ചിത്രങ്ങള്‍ കണ്ടു രസിക്കുന്നത്‌ അവന്റെ ജീവിതത്തിന്റെ ഭാഗമായിത്തീര്‍ന്നെങ്കിൽ ആ വ്യക്തി ദൈവത്തെ അറിഞ്ഞവനല്ല എന്നതിന്റെ ഏറ്റവും വലിയ തെളിവാണത്‌ (1 കൊരിന്ത്യർ 6:9).

ആരെങ്കിലും ഈ ദുശ്ശീലത്തിന്‌ അടിമയായിപ്പോയിട്ടുണ്ടെങ്കിൽ അവര്‍ക്ക്‌ ദൈവത്തിന്റെ കൃപയാല്‍ വിടുവിക്കപ്പെടാവുന്നതാണ്‌. അശ്ലീല ചിത്രങ്ങള്‍ കാണുന്നതിൽ നിന്ന്‌ വിടുതൽ ആഗ്രഹിക്കുന്നവര്‍ താഴെപ്പറയുന്ന പടികൾ പിന്‍പറ്റാവുന്നതാണ്‌. 1) ദൈവത്തോട്‌ നിങ്ങളുടെ പാപത്തെ ഏറ്റു പറയുക (1യോഹന്നാൻ 1:9). 2) നിങ്ങളുടെ ഹൃദയത്തെ കഴുകി വെടിപ്പാക്കി അതിനെ പുതുക്കുവാൻ പ്രാര്‍ത്ഥിക്കുക (റോമർ 12:2). 3) ഫിലിപ്പ്യർ 4:8 ൽ വായിക്കുന്ന തരത്തിലുള്ള ചിന്തകളാല്‍ നിറപ്പപ്പെടുവാൻ ആഗ്രഹിക്കുക, പ്രാര്‍ത്ഥിക്കുക. 4). നിങ്ങളുടെ ശരീരങ്ങളെ വിശുദ്ധിയില്‍ സൂക്ഷിക്കുവാൻ പഠിക്കുക (1തെസ്സലോനിക്യർ 4:3-4). 5. ലൈംഗീകതയുടെ സ്ഥാനം മനസ്സിലാക്കി ജീവിത പങ്കാളിയില്‍ കൂടി മാത്രം അത്‌ ആസ്വദിക്കുക (1കൊരിന്ത്യർ 7:1-5). 6). ആത്മാവിനാല്‍ നടത്തപ്പെടുന്നവർ ജഡത്തിന്റെ അഭിലാഷങ്ങള്‍ക്ക്‌ അനുസരിച്ച്‌ ജീവിക്കുകയില്ല എന്ന്‌ മനസ്സിലാക്കുക (ഗലാത്യർ 5:16). 7). ചില പ്രായോഗീക കാര്യങ്ങള്‍ ചെയ്ത്‌ കമ്പ്യൂട്ടറിൽ അശ്ലീല ചിത്രങ്ങൾ വരുന്നത്‌ തടയുക. 8). നിങ്ങളെ ആത്മാര്‍ത്ഥമായി സ്നേഹിക്കുന്ന ഒരാളോട്‌ നിങ്ങൾക്ക് വിശുദ്ധിയിൽ ജീവിക്കുവാൻ കൃപ ലഭിക്കേണ്ടതിന്‌ പ്രാര്‍ത്ഥിക്കുവാനായി പറയുക.



മലയാളം ഹോം പേജിലേക്ക്‌ തിരികെ പോവുക



അശ്ലീല ചിത്രങ്ങളെപ്പറ്റി ബൈബിൾ എന്താണ്‌ പഠിപ്പിക്കുന്നത്‌?