Sungkunsungkun:
Nunga hubahen haporseaonhu di bagasan Jesus… saonari aha ma muse?
Tangiang:
Horas! Nunga dibahen ho haputuson na manguba hangoluan! Ra sungkunsungkun do ho, “Saonari aha do muse? Beha do pungkaonhu pardalananhu dohot Tuhan i?” Lima langka na dipaboa di toru on mangalehon hita tudutudu (petunjuk) sian Bibel i. Molo adong sungkunsungkun di pardalananmu, ro ma ho tu www.GotQuestions.org.
1. Tangkas ma antusi haluaon i.
I Johannes 5:13 paboahon tu hita, “Hugurithon angka on tu hamu na porsea di bagasan goar ni Anak ni Debata asa botoonmuna naung adong do di hamu hangoluan saleleng ni lelenga.” Lomo do roha ni Tuhan i asa taantusi haluaon i. Lomo do roha ni Tuhan i asa pos rohanta di na tangkas mamboto naung dipalua hita. Impolana, tahatai ma angka impola ni haluaon i:
(a) Sude do hita nunga mardosa. Nunga sude hita mangulahon angka na mambahen sogo ni roha ni Tuhan i (Rom 3:23).
(b) Alani dosanta, tama do hita hona uhum dohot parsirangan saleleng ni lelengna sian Tuhan i (Rom 6:23).
(c) Mate do Jesus di silang i manggarar panguhuman alani angka dosanta (Rom 5:8; II Korint 5:21). Jesus mate manggantihon hita, mambuat panguhumon na tama jaloonta. HaheheonNa patangkashon hamatean ni Jesus i nunga tama manggarar angka dosanta.
(d) Dilehon Tuhan i do panesaon ni dosa dohot haluaon tu angka na porsea di bagasan Jesus – manghaporseai hamateanNa na manggarar angka dosanta (Johannes 3:16; Rom 5:1; Rom 8:1).
I do tona ni haluaon i! Molo dung porsea hita di bagasan Jesus Kristus gabe Sipalua hita, nunga malua hita! Sude angka dosanta nunga disesa, jala marpadan do Tuhan i na so jadi tadinghononNa manang lupahononNa ho (Rom 8:38-39; Mateus 28:20). Ingot ma, haluaonmu nunga denggan diramoti Jesus Kristus (Johannes 10:28-29). Molo dihaporseai ho holan Jesus do Sipalua ho, boi do pos roham na rap dohot Debata do ho saleleng ni lelengna di surgo i!
2. Jumpangi ma sada gareja na denggan na mangajarhon Bibel i.
Unang pingkirhon gareja i sada bangunan. Angka jolma i do gareja i. Mansai ringkot do angka halak na porsea di bagasan Jesus Kristus rap masihaholongan di punguan. I do sada tujuan na rumingkot ni gareja i. Saonari dung dibahen ho haporseaonmu di Jesus Kristus, disosoi hami do mansai gomos asa dilului ho sada gareja na porsea di Bibel i di humaliangmu jala manghatai dohot pandita i. Paboa ma tu ibana taringot tu haporseaonmu na imbaru di bagasan Jesus Kristus.
Tujuan na paduahon ni gareja i i ma mangajarhon Bibel i. Boi do parsiajaranmu mangulahon angka parenta ni Tuhan i di bagasan ngolum. Mangantusi Bibel i i ma hinsu (kunci) asa denggan jala gomos mangolu di ngolu ni hakristenon. II Timoteus 3:16-17 mandok, “Ai nasa Hata ni Tuhan i na diombushon Tuhan i do i jala marguna do laho mangajari, maminsang, patingkoshon, dohot mangalatik di bagasan hatigoran, asa halak ni Debata boi denggan diparade di saluhutna tu sude angka ulaon na denggan.”
Tujuan na patoluhon ni gareja i i ma pamujion manang parmingguon. Pamujion i i ma mandok mauliate tu Tuhan i tu sude naung pinatupaNa! Nunga dipalua Tuhan i hita. Dihaholongi Tuhan i do hita. Ditogutogu jala diramoti Tuhan i do hita. Beha do hita boi mandok mauliate tu Ibana? Badia, tigor, denggan, parholong, parasiroha, jala gok dohot denggan basa do Tuhan i. Pangungkapon 4:11 mandok, “Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni rohaM do, umbahen manjadi angka i jala tartompa.”
3. Bahen ma tingki ganup ari na marsihohot tu Tuhan i.
Mansai ringkot do di hita mambahen tingki ganup asa marsihohot tu Tuhan i. Godang do jolma manggoari on “tingki na hohom.” Na asing mandok “partangiangan,” alana i ma tingki tingki talehon dirinta tu Tuhan i. Manang na piga mambahen tingkina di manogot, alai na asing mamillit di tingki borngin. Ndang pola ringkot manang aha digoari ho i manang sadihari diulahon ho i. Aha na ringkot i ma dilehon ho do tingki na taratur dohot Tuhan i. Tingki dia ma na denggan bahenonmu dohot Tuhan i?
(a) Tangiang. Tangiang i holan na manghatai do dohot Tuhan i. Manghatai ma hita tu Tuhan i taringot tu pingkiran dhot parsoalanta i. Pangido ma Tuhan i mangalehon tu ho bisuk dohot pangaramotion. Pangido ma tu Tuhan i asa diparade sude na ringkot di ho. Paboa ma tu Ibana sadia balga ma dihaholongi ho Ibana jala sadia balga ma diargai ho Ibana tu sude na pinatupaNa tu ho. I ma saluhutna taringot tu tangiang i.
(b) Manjaha Bibel. Songon na manambai tu naung diajari Bibel i di gareja, Singkola Minggul, dohot/manang Parsiajaran ni Bibel I – ringkot do ho manjaha sandiri Bibel i. Adong do di Bibel i saluhutna na ringkot botoonmu asa boi manghangoluhon ngolu ni Kristen na denggan. Adong do tudutudu sian Tuhan i disi taringot tu beha do mambahen haputuson na bisuk, beha do mamboto lomo ni roha ni Tuhan i, jala beha do asa lam magodang di partondion. Bibel i Hata ni Tuhan do i tu hita. Sasintongna Bibel i i ma pangaramotion ni Tuhan i do tu hita beha do mandalani ngolu on na pasonanghon Tuhan i jala na mambahen gok ngolunta i.
4. Bahen ma parsaoran dohot jolma na boi mangurupi ho di partondion.
I Korint 15:33 paboahon tu hita, “Unang hamu lilu: ‘Pardonganon na roa pamagohon parange na denggan do.’” Gok do Bibel i dohot angka sipaingot taringot tu panghorhon ni jolma na “so denggan” tu hita. Mangalehon tingki marsaor dohot angka pangalaho na mardosa na mamboan hita do i gabe tarunjun (tergoda) laho mangulahon angka ulaon i. Parange ni angka jolma di humaliangta na “mandabuhon” hita do i. I do umbahen na ringkot asa angka jolma na adong di humaliangta i ma angka jolma na manghaholongi Tuhan i jala na martahi mangoloi Ibana.
Talului ma sahalak manang dua halak dongan, ra sian garejanta, na boi mangurupi jala pagomoshon hita (Heber 3:13; 10:24). Pangido ma donganmi laho mambahen ho asa benget mambahen tingki na hohom, angka ulaon, dohot di pardalanan dohot Tuhan i. Sungkun ma manang na boi do bahenonmu na sarupa tu nasida. Ndang na mandok on asa tagotaphon sude angka dongan na so mananda Tuhan Jesus Sipalua nasida. Torushon ma mardongan dohot nasida jala haholongi ma naisda. Holan paboa ma tu nasida ai nunga diuba Jesus i ngolum jala ndang boi be ulahononmu angka ulaon na sai laon. Pangido ma Tuhan i mangalehon tingki tu ho laho mambaritahon Jesus tu angka donganmu.
5. Dibaptishon.
Godang do jolma na sala mangantusi taringot tu pambaptison manang pandidion. Hata baptis baptize lapatanna “mambonomhon tu bagasan aek.” Pambaptison manang pandidion i i ma dalan hombar tu Bibel i laho paboahon tu natorop haporseaonta na imbaru di bagasan Kristus jala padanta laho mangihuthon Ibana. Pambahenan na dibonomhon tu bagsan aek manggombarhon naung dikuburhon dohot Kristus. Pambahenan na ruar sian aek i manggombarhon haheheon ni Kristus. Molo dibaptishon na patuduhon dirinta do i tu hamatean, panguburon, dohot haheheon ni Jesus (Rom 6:3-4).
Pambaptison manang pandidion i ndang na paluahon ho i. Pambaptison i ndang na mamuri angka dosam i. Pambaptison i holan pangoloion sambing do i, paboahon tu natorop haporseaonta ai holan Kristus do dalan tu haluaon i. Pambaptison i mansai ringkot do i songon sada langka di pangoloion – mandok tu natorop haporseaon di bagasan Kristus dohot padanmu tu Ibana. Molo naung rade do ho dibaptishon ingkon manghatai ma ho dohot sada pandita.
English
Ai adong sungkunsungkunmu?