Sungkunsungkun:
Ise do Jesus Kristus?
Tangiang:
Ndang songon sungkunsungkun “Ai adong do Debata?” sungkunsungkun manang na adong do Jesus Kristus i disungkun hira na ummotik jolma do. Dijalo godangan jolma do Jesus i jolma na tutu na mangolu di Israel 2.000 na salpu. Panghataion na marimbar dipungka do taringot tu hadirion na gok ni Jesus i. Hira sude ugamo na balga do mangajarhon ia Jesus i sada panurirang manang guru na burju manang jolma na badia do. Alai Bibel i paboahon tu hita lobi do sian panurirang, guru na burju, manang jolma na badia na manongtong Jesus i.
Si C. S. Lewis di bukuna Mere Christianity (Hakristenon Sambing) manggurithon na mangihut on: “Na naeng pasidinghon jolma do ahu dison asa unang mandok na maotohu taringot tu Ibana [Jesus Kristus]: ‘Rade do ahu manjalo Jesus guru hapantunon (moral) na sumurung, alai ndang hujalo hataNa na mandok Tuhan do Ibana.’ I ma na so jadi dokhononta. Jolma na holan sahalak jolma jala mandok angka aha na nidok ni Jesus ndang guru hapantunon nab alga i. Gabe na rintik do Ibana—songon jolma na mandok tolor na nirobus do Ibana—manang sibolis sian api naroko do Ibana. Ingkon bahenonta do sipillitonta. Ai jolma do Ibana najolo, dohot saonari, Anak ni Debata, manang jolma na rintik manang na rumoa sian i. Boi do sumpalonmu Ibana ala naoto, boi do tijuranmu Ibana jala mamunu Ibana songon sibolis; manang boi do sombaonmu Ibana jala peak di simanjojakNa jala manjou Ibana Tuhan dohot Debata. Alai unang ma tabahen panghataion na so marmusmus na mandok guru ni manisia na sumurung do Ibana. Ndang dilehon Ibana sipilliton tu hita. Ndang dihalomohon Ibana i” (Macmillan, 1952, alaman 55–56).
Jadi, ise do didok Jesus Ibana? Ise do didok Bibel i Ibana? Parjolo, Debata di bagasan daging do Ibana. Jesus mandok di Johannes 10:30, “Sada do Ahu dohot Ama i.” Di parnidaan na jempek, boi do songon na so mandok Debata i. Alai, taida ma alus ni angka halak Jahudi tu HataNa i. Naeng didangguri nasida do Ibana dohot batu “alani na padoshon dirina dohot Debata (blaspemi), alana Ho, sahalak jolma sambing, mandokhon Debata” (Johannes 10:33). Diantusi angka halak Jahudi do panghataion ni Jesus i na mandok Debata do Ibana. Di angka ayat na mangihut, ndang hea dipatingkos Jesus halak Jahudi i manang naeng patangkashon panghataionNa i. Ndang hea didok Ibana, “Ndang Hudok na Debata Ahu.” Tingki didok Jesus, “Sada do Ahu dohot Ama i” (Johannes 10:30), na tutu do Ibana mandok sarupa tu Debata.
Di Johannes 8:58 Jesus mandok taringot tu hadirionNa na parjolo, na patuduhon tu Debata: “‘Hupaboa ma na sasintongna,’ Jesus mangalusi, ‘andorang so tubu dope si Abraham, nunga adong Ahu!’” Di na mangadopi hata on, dibuat angka halak Jahudi i ma muse batu laho mandangguri Jesus (Johannes 8:59). Di na mandok naung adong Ibana sian najolo, Jesus manggunahon goar ni Debata tu diriNa sandiri—AHU DO AHU (ida ma II Musa 3:14). Ditulak halak Jahudi do hadirion ni Jesus i ma Debata naung gabe jolma, alai tangkas do diantusi nasida aha na nidokNa.
Hatorangan na asing ni Bibel i na mandok ai Debata di bagasan daging do Jesus i dohot do Johannes 1:1, na mandok, “Debata do Hata i,” rap dohot Johannes 1:14, na mandok, “Hata i nunga gabe daging.” Sisean si Tomas mandok tu Jesus, “Tuhanku jala Debatangku” (Johannes 20:28), Ndang dipatingkos Jesus ibana. Apostel Paulus patoranghon Jesus “Debatanami jala Sipalua hami, Jesus Kristus” (Titus 2:13). Apostel Petrus mandok na sarupa do, manjou Jesus “Debata jala Sipalua hami” (II Petrus 1:1).
Debata Ama i pe patangkashon hadirion ni Jesus do: “Alai taringot tu Anak i didok Ibana, ‘HabangsaM, O Debata, na manongtong do saleleng ni lelengna, jala hasintongan na manggohi harajaonMu do’” (Heber 1:8; bandinghon ma tu Psalmen 45:6). Panurirang ni Padan Na Robi i songon Jesaya 9:5 pabotohon hatuhanon ni Kristus do: “Ai nunga tubu di hita sada posoposo dilehon tu hita sada Anak, ampe tu abaraNa do sogot harajaon, jala bahenonna goarNa: Sipartahi Halongangan, Debata Pargogonasohatudosan, Ama saleleng ni lelengna, Raja ni hadameon” (pangondolion ditambai).
Boasa sungkunsungkun taringot tu hadirion ni Jesus ringkot? Boasa marlapatan na Debata do Jesus i? Manang na piga hatorangan:
• Songon na nidok ni si C. S. Lewis, molo so Debata do Jesus i, gabe pargabus na rumoa ma Jesus i jala ndang tama di manang aha pe.
• Molo ndang Debata Jesus i, gabe angka pargabus ma angka apostel i.
• Ingkon Debata do Jesus alana Mesias i nunga dijanjihon gabe “Sasadasa Nabadia i” (Psalmen 16:5, NASB). Ala ndang adong nanggo sada pe na tigor di jolo ni Debata (Psalmen 53:1; 143:2), Debata sandiri do na ingkon ro tu portibi on gabe jolma.
• Molo ndang Debata Jesus i, hamateanNa ndang na sae laho manggarar panguhuman alani dosa ni sandok portibi on (I Johannes 2:2). Holan Debata sambing do na boi paradehon pelean na manongtong, jala mararga salelengna (Rom 5:8; II Korint 5:21).
• Holan Debata do Sipalua i (Hosea 13:4; bandinghon ma tu I Timoteus 2:3). Molo Jesus do Sipalua i, ingkon Debata do Ibana.
Jesus ingkon duansa do Debata jala jolma. Songon Debata, Jesus boi do pagokhon rimas ni Debata. Songon jolma, boi do Jesus i mate. Songon jolma-Debata, Jesus do Pardomuan na rimpas ni surgo dohot portibi on (I Timoteus 2:5). Haluaon i rade do holan marhite haporseaon di bagasan Jesus Kristus. Songon na nidokNa, “Ahu do dalan dohot hatigoran dohot hangoluan. Ndang adong na sahat tu Ama i ianggo so marhite Ahu” (Johannes 14:6).
English
Ai adong sungkunsungkunmu?