Sungkunsungkun:
Aha do Kristen i?
Tangiang:
Sada pangantusion ni kamus sahalak Kristen i ma na sarupa tu “sasahalak na mangangkui haporseaon di Jesus na gabe Kristus manang di ugamo na marhite pangajarion ni Jesus.” Nang pe parmulaan na denggan do on, songon angka pangantusion ni godang kamus, hurang do hatorangan ni hasintongan ni Bibel i aha do lapatan ni Kristen. Hata “Kristen” dipargunahon do tolu hali di Padan na Imbaru (Ulaon ni Apostel 11:26; 26:28; 1 Petrus 4:16). Angka pangihut ni Jesus Kristus do na parjolo digoari “Kristen” di Antiokhia (Ulaon ni Apostel 11:26) alana pangalaho, ulaon, dohot panghataion nasida songon Kristus do. Hata “Kristen” marlapatan, “parsidohot tu punguan ni Kristus,” manang “pangihut ni Kristus.”
Alai di godangan tingki, hata “Kristen” nunga godang mago lapatanna jala jotjot do dipargunahon patoranghon sasahalak na marugamo manang na denggan pangalahona alai ndang manang ndang boi sahalak pangihut ni Jesus Kristus na tutu. Godang do jolma na so porsea jala ndang pos rohana di Jesus Kristus mangetong diri nasida Kristen holan ala na laho do nasida tu gareja manang mangolu nasida di negara “Kristen.” Alai laho tu gareja, manghobasi angka na hurang denggan sian hita, manang gabe halak na burju ndang na mambahen hita gabe Kristen i. Laho tu gareja ndang na mambahen hita gabe Kristen songon molo laho hita tu garasi ndang na mambahen hita gabe mobil i. Gabe sada ruas (anggota) ni gareja, mangihuthon parmingguon ganup ari Minggu, jala mangalehon tu gareja ndang na mambahen hita i gabe sahalak Kristen.
Bibel i mangajarhon tu hita ia angka ulaon denggan i ndang boi mambahen hita dijalo Debata. Titus 3:5 mandok, “Ndada ala ni ulaonta hatigoran, umbahen na dipalua Ibana hita; tung sian asi ni rohaNa do, marhitehite pandidion pangulahion tubu dohot marhitehite Tondi Parbadia na paimbaruhon i.” Jadi, sahalak Kristen i ma sasahalak naung tubu muse dibahen Tuhan i (John 3:3; Johannes 3:7; 1 Petrus 1:23) jala naung mambahen haporseaonna jala marhaposan di bagasan Jesus Kristus. Epesus 2:8 paboahon tu hita ai “…sian asi ni roha do, umbahen na malua hamu, marhite haporseaon--jala ndada sian dirim i, silehonlehon ni Debata do i.”
Sahalak Kristen na tutu i ma sahalak naung mambahen haporseaon dohot pos ni roha di diri dohot ulaon ni Jesus Kristus, dohot hamateanNa di silang na manggarar angka dosa dohot haheheonNa di ari patoluhon. Johannes 1:12 paboahon tu hita, “Alai tu sude na manjangkon Ibana, tu angka na porsea di goarNa, nunga dilehon Ibana huaso asa gabe ianakhon ni Debata.” Tanda ni halak Kristen na tutu i ma manghaholongi jolma na asing jala mangoloi Hata ni Debata (I Johannes 2:4, 10). Sahalak Kristen na tutu i ma sasintongna sada anak ni Debata, bagian ni keluarga ni Tuhan i, jala sahalak naung dilehon ngolu na imbaru di bagasan Jesus Kristus.
English
Ai adong sungkunsungkunmu?