Bakit importante ang pagdalo sa Simbahan?

Tanong: "Bakit importante ang pagdalo sa Simbahan?"

Sagot: Sinasabi sa atin ng Bibliya na kailangan nating dumalo sa Simbahan upang makapagsamba tayo sa Diyos kasama ang iba pang mga mananampalataya at maturuan tayo ng Kanyang mga Salita para sa ating paglago sa ating buhay Espiritwal (Mga Gawa 2:42; Hebreo 10:25). Ang Simbahan ang siyang lugar kung saan mag-iibigan sa bawat isa ang mga mananampalataya (1 Juan 4:12), palakasin ang loob ng bawat isa (Hebreo 3:13), pasiglahin ang kapwa (Hebreo 10:24), pagsilbihan ang bawat isa (Galacia 5:13), turuan ang bawat isa (Roma 15:14), respetuhin ang bawat isa (Roma 12:10), at maging mabait at maawain sa sa bawat isa (Efeso 4:32).

Sa panahong ang isang tao ay manampalataya kay Hesu Kristo bilang kanyang tagapagligtas, siya ay naging bahagi na ng katawan ni Kristo (1 Corinto 12:27). Para ang katawan ng simbahan ay magampanan ang kanyang tungkulin ng maayos, kinakailangang naroon ang lahat ng bahagi ng kanyang katawan (1 Corinto 12:14-20). Katulad din nito, ang isang mananampalataya ay hindi mararating ang pinakamataas na antas ng kanyang Espiritwalidad kung walang tulong at pagpapalakas ng loob na manggagaling sa kanyang kapwa mananampalataya (1 Corinto 12:21-26). Sa ganitong mga kadahilanan, ang pagdalo sa Simbahan, pakikipagbahagi, at pakikisalamuha sa mga kapwa mananampalataya ay dapat isang regular na aspeto sa buhay ng isang mananampalataya. Ang kada-linggong pagdalo ng isang mananampalataya sa Simbahan ay hindi hinihingi sa kanila, subalit ang isang tao na nanampalataya na kay Hesu Kristo ay dapat mayroong pagnanasang sumamba sa Diyos, maturuan ng Kanyang mga salita at makisalamuha sa mga kapwa mananampalataya.

Balik sa Tagalog Home Page