Pinatawad ka na ba? Paano mapapatawad ng Dios ang lahat ng iyong mga kasalanan?

Tanong: "Pinatawad ka na ba? Paano mapapatawad ng Dios ang lahat ng iyong mga kasalanan?"

Sagot: Ayon sa aklat ng Mga Gawa 13:38, “Dapat ninyong malaman na sa pamamagitan ni Jesus ay ipinapahayag namin sa inyo ang balita na tayo'y patatawarin ng Dios sa ating mga kasalanan.”

Ano ang kapatawaran at bakit natin ito kailangan? Ang salitang “pagpapatawad” ay nahahambing sa pagkalinis ng nakaraan. Kapag nakagawa tayo ng kasalanan sa ating kapwa, humihingi tayo ng tawad upang manumbalik ang dating magandang relasyon. Ang kapatawaran ay ipinagkakaloob hindi dahil karapat-dapat siyang patawarin kundi dahil pagpapakita ito ng pag-ibig, awa at biyaya. Ito ay isang desisyon para alisin ang sama ng loob sa kapwa, sa kabila ng ginawa niya sa iyo.

Sinasabi ng Biblia na lahat tayo ay nangangailangan ng kapatawaran mula sa Dios. Tayong lahat ay nagkasala. Ayon sa Ecclesiastes 7:20, “Walang taong nabubuhay sa daigdig na gumagawa ng mabuti at hindi nagkasala.” Sinasabi rin sa 1 Juan 1:8, “Kung sinasabi nating wala tayong kasalanan, dinadaya natin ang ating sarili at wala sa atin ang katotohanan.” Ang kasalanan ay pagrebelde sa Dios, (Mga Awit 51:4). Dahil dito, mahalagang makamit natin ang kapatawaran galing sa Dios. Kapag hindi natin nakamit ang kapatawaran sa ating mga kasalanan, walang katapusan nating pagdurusahan ang ating mga kasalanan (Mateo 25:45; Juan 3:36).

Paano ko makakamtan ang kapatawaran?

Ang ating Dios ay mapagmahal at maawain. Handa niya tayong patawarin sa ating mga kasalanan. Sinasabi sa 2 Pedro 3:9, “Hindi nagpapabaya ang Panginoon sa pagtupad sa kanyang pangako gaya ng inaakala ng ilan. Ang totoo'y binibigyan lamang niya ng pagkakataon ang lahat na manumbalik sa kanya, sapagkat ayaw niyang mapahamak ang sinuman.” Gusto ng Dios na patawarin tayo kaya gumawa siya ng paraan.

Ang tanging nararapat na kabayaran para sa ating mga kasalanan ay kamatayan. Sinasabi sa unang bahagi ng Roma 6:23, “Sapagkat ang kabayaran ng kasalanan ay kamatayan.” Walang hanggang kamatayan ang naging bunga ng ating mga kasalanan. Ayon sa plano ng Dios, ang Dios ay naging tao – si Jesu-Cristo (Juan 1:1, 14). Namatay si Jesus sa krus sapagkat binayaran niya ang parusa na nararapat para sa atin dahil sa ating mga kasalanan. Sinasabi sa 2 Corinto 5:21, “Kailanma'y hindi nagkasala si Cristo, ngunit alang-alang sa atin ay itinuring siyang makasalanan upang maituring tayong matuwid ng Dios sa pamamagitan niya.” Ang kamatayan ni Jesus ang naging daan para mapatawad ang lahat ng kasalanan ng tao sa mundo. Sinasabi sa 1 Juan 2:2, “Siya mismo ang ibinigay na handog para sa kapatawaran ng ating mga kasalanan, at hindi lang ng ating mga kasalanan kundi pati na rin ng kasalanan ng buong mundo.” Muling nabuhay si Jesus mula sa mga patay at ito ay isang patunay na tagumpay niyang nilabanan ang kasalanan at kamatayan (1 Corinto 15:1-28 ). Purihin ang Dios dahil sa kanyang kamatayan at muling pagkabuhay, dahil dito ang ikalawang bahagi ng Roma 6:23 ay nagkatotoo, “…ang kaloob ng Dios ay buhay na walang hanggan sa pamamagitan ni Cristo Jesus na ating Panginoon.”

Gusto mo bang mapatawad ang lahat ng iyong kasalanan? Ginugulo ka ba ng iyong konsensiya dahil sa iyong nagawang kasalanan? Ang kapatawaran ay maaangkin mo kung mananampalataya ka kay Jesu-Cristo bilang iyong tagapagligtas. Sinasabi sa Efeso 1:7, “Sa pamamagitan ng dugo ni Cristo ay tinubos tayo, na ang ibig sabihin ay pinatawad ang ating mga kasalanan. Ginawa niya ito ayon sa kadakilaan ng kanyang biyaya na ipinagkaloob sa atin.” Binayaran ni Jesus ang ating mga pagkakasala upang mapatawad tayo. Ang tanging gagawin mo ay hilingin sa Dios na patawarin ka dahil sa naniniwala kang namatay si Jesus sa krus para mapatawad ka. Kahanga-hanga ang mensahe ng Juan 3:16-17 na nagsasabi ng ganito, “Sapagkat mahal na mahal ng Dios ang mundo, kaya ibinigay niya ang kanyang kaisa-isang Anak, upang ang sinumang sumasampalataya sa kanya ay hindi mapahamak kundi magkaroon ng buhay na walang hanggan. Hindi sinugo ng Dios ang kanyang Anak sa mundo upang hatulan ng kaparusahan ang mga tao, kundi upang sila'y iligtas. Ginawa niya ito ayon sa kadakilaan ng kanyang biyaya na ipinagkaloob niya sa atin.

Ganito lang ba kadali ang kapatawaran?

Oo, ganito lang kadali! Hindi mo maaaring bilhin sa Dios ang kapatawaran. Sumampalataya ka lamang at matatanggap mo na ito sa pamamagitan ng biyaya at awa ng Dios. Kaya kung gusto mong tanggapin si Jesu-Cristo bilang tagapagligtas mo at nang matanggap mo ang kapatawaran mula sa Dios, narito ang isang panalangin na maaari mong ipanalangin. “O Dios, inaamin kong nagkasala ako sa iyo at nararapat lamang na ako’y maparusahan. Ngunit inako ni Jesus ang aking kasalanan at tiniis ang parusang dapat ay sa akin. Patawarin mo ako sa lahat ng aking mga kasalanan. Sumasampalataya ako at nagtitiwala kay Jesus para sa aking kaligtasan. Salamat po sa iyong kahanga-hangang biyaya at kapatawaran. Maraming salamat din sa buhay na walang hanggan. Amen!”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page