Kailan mangyayari ang rapture bilang kaugnay ng tribulation?

Tanong: "Kailan mangyayari ang rapture bilang kaugnay ng tribulation?"

Sagot: Ang eksaktong panahon ng rapture kaugnay ng tribulation ay isa sa pinaka-kontrobersiyal na isyu sa mga simbahan ngayon. Ang tatlong nangungunang pananaw ay ang Pretribulational (mangyayari ang rapture bago pa ang tribulation), Midtribulational (magaganap ang rapture sa kalagitnaan ng tribulation), at Post-tribulational (magaganap naman ang rapture sa katapusan ng tribulation). Ang pang-apat na pananaw na mas kilala bilang Pre-Wrath, ay may posisyong Midtribulational subalit may kakaunting binago mula rito.

Una, napakaimportanteng malaman natin ang layunin ng tribulation. Ayon sa aklat ng Daniel 9: 27, mayroong pitumpung “linggo” (Pitong taon) na darating pa. Ang kabuuang propesiya ni Daniel na pitumpung linggo (Daniel 9:20-27) ay tumutukoy sa bansang Israel. Ito’y yugto ng panahon na kung saan nakatuon ang atensiyon ng Diyos lalong-lalo na sa Israel. Habang hindi naman nito ipinapahiwatig na ang simbahan ay maaaring hindi na umiiral, dinadala tayo sa katanungang bakit kinakailangan pang nasa mundo ang simbahan sa panahong iyon.

Ang pangunahing talata sa Bibliya tungkol sa rapture ay ang 1 Thessalonica 4:13-18. sinasabi nito na lahat ng mga nabubuhay na mga mananampalataya at mga mananampalataya na namatay na, ay sasalubungin ang Panginoong Hesu Kristo sa kalawakan at makakasama na Siya magpakailan pa man. Ang rapture ay ang pagkuha ng Diyos sa Kanyang mga anak mula sa mundo. Sinasabi rin ni Pablo sa talata 5:9, “Tinawag tayo ng Diyos hindi upang parusahan, kundi upang iligtas sa pamamagitan ng ating Panginoong Hesu Kristo.” Ang aklat ng Pahayag, na pangunahing tumutukoy sa yugto ng panahon ng tribulation, ay isang propesiyang mensahe na naglalahad kung papaano ibubuhos ng Diyos ang Kanyang poot sa mundo sa panahon ng tribulation. Tila hindi tugma sa pangako ng Diyos na hindi na magdurusa ang mga mananampalataya kung iiwan lamang at mananatili pa rin sila sa mundo sa panahon ng tribulation.

Ang isa pang mahalagang talata tungkol sa eksaktong panahon ng rapture ay ang Pahayag 3:10. doon, ipinangako ni Kristo na ililigtas Niya ang lahat ng mga mananampalataya sa “panahon ng pagsubok” na darating pa sa mundo. Maaaring ito ay mangangahulugan ng dalawang bagay: (1) Poprotektahan ng Diyos ang lahat ng mga mananampalataya sa gitna ng mga pagsubok, o (2) ililigtas ni Kristo ang lahat ng mga mananampalataya mula sa mga pagsubok. Gayon man, napaka-importanteng malaman kung saan ipinangako ng Diyos sa mga mananampalataya na ililigtas sila. Ito’y hindi lamang sa pagsubok, sa halip sa “oras” ng pagsubok. Ipinapangako ni Kristo na ililigtas Niya ang mga mananampalataya sa eksaktong panahon na mayroong mga pagsubok, ito’y ang panahon ng tribulation. Ang layunin ng tribulation, ng rapture, ang ibig sabihin ng 1 Thessalonica 5: 9, ang interpretasyon ng Pahayag 3: 10 ay nagbibigay ng maliwanag na suporta sa posisyong Pretribulational. Kung isasalin ang Bibliya ng literal, ang posisyong Pretribulational ay ang may pinaka-magkatugmang interpretasyon.

Balik sa Tagalog Home Page