Ang Kaligtasan ba ay sa pamamagitan lang ng pananampalataya o pananampalataya at saka gawa?

Tanong: "Ang Kaligtasan ba ay sa pamamagitan lang ng pananampalataya o pananampalataya at saka gawa?"

Sagot: Ito maaari ang pinaka-importanteng katanungan sa lahat ng Kristiyanong pag-aaral tungkol sa Diyos. Ang ganitong katanungan ay ang naging sanhi ng repormasyon - ang pagkakahati-hati ng Protestante at Katolikong Simbahan. Ang ganitong katanungan ay ang susi sa pagkakaiba ng Biblikal na Kristiyanismo at ang karamihan sa mga “Kristiyanong” kulto. Ang kaligtasan ba ay sa pamamagitan lang ng pananampalataya, o pananampalataya na may kasamang gawa? Ako ba ay naligtas sa pamamagitan lang ng pananampalataya kay Hesus, o kailangan kong maniwala kay Hesus at gumawa pa ng ilang bagay?

Ang katanungan na kung saan sa pamamagitan lang ba ng pananampalataya o pananampalataya at gawa makakamit ang kaligtasan ay mas lalo pang pinahirap ng ilang mga talata sa Bibliya na mahirap ipagkasundo. Kung ihahambing ang Roma 3:28 at Galacia 3:24 sa Santiago 2:24. Makikita ng ilan ang kaibahan sa pagitan ni Pablo (Kaligtasan sa pamamagitan lang ng pananampalataya) at Santiago (Kaligtasan sa pamamagitan ng pananampalataya at gawa).

Ang katotohanan, hindi magkasalungat ang itinuturo ni Pablo at Santiago. Ang punto lang ng hindi pagkakaunawaan na inaangkin ng ilan ay ang relasyon sa pagitan ng pananampalataya at gawa. Matatag ang ang paninindigan ni Pablo na ang kaligtasan ay sa pamamagitan lamang ng pananampalataya (Efeso 2:8-9) habang si Santiago naman ay lumalabas na parang sinasabi niyang ang kaligtasan ay sa pamamagitan ng pananampalataya na may kasamang gawa. Ang problemang ito ay nabigyan ng kasagutan sa pamamagitan ng masusing pag-aaral sa kung ano talaga ang ibig sabihin ni Santiago. Pinabubulaanan ni Santiago ang paniniwalang ang isang tao ay mayroong pananampalataya subalit wala namang ibinubungang mabuting gawa (Santiago 2: 17-18). Binibigyang-diin lamang ni Santiago ang puntong ang tunay na pananampalataya kay Kristo ay nagbubunga ng bagong buhay at mabuting gawa (Santiago 2:20-26). Hindi sinasabi ni Santiago na ang kaligtasan ay sa pamamagitan ng pananampalataya at gawa, sa halip kung ang isang tao ay totoong ligtas na dahil sa kanyang pananampalataya lalabas ang mabubuting gawa sa kanyang buhay. Kung ang isang tao ay umaangking isa siyang mananampalataya, subalit wala namang mabubuting gawa na lumalabas sa kanyang buhay-maaring wala pa siyang tunay na pananampalataya kay Kristo (Santiago 2:14, 17, 20, 26).

Ganoon din ang sinasabi ni Pablo sa kanyang mga sulat. Ang mabubuting bunga na dapat makita sa buhay ng isang mananampalataya ay nakasulat sa Galacia 5:22-23. Matapos niyang sabihin na kami ay naligtas sa pamamagitan ng pananampalataya at hindi gawa (Efeso 2:8-9), ipinaalam sa amin ni Pablo na kami ay nilalang upang gumawa ng mabuti (Efeso 2:10). Umaasa din si Pablo kagaya ni Santiago na mayroong pagbabago sa aming buhay, “Kaya’t ang sinumang nakipag-isa na kay Kristo ay isa nang bagong nilalang. Wala na ang dating pagkatao, siya’y bago na”(2 Corinto 5:17)!

Hindi nagkakasalungat ang mga turo ni Pablo at Santiago tungkol sa kaligtasan. Tinitingnan lamang nila ang iisang paksa sa iba’t-ibang pananaw. Binigyang diin lamang ni Pablo na ang kaligtasan ay sa pamamagitan lang ng pananampalataya habang binigyang diin naman ni Santiago ang katotohanang ang pananampalataya kay Kristo ay nagbubunga ng mabuting gawa.

Balik sa Tagalog Home Page