Ano ang Kristiyanong pananaw sa pagpapakamatay? Ano ang sinasabi ng Bibliya tungkol sa pagpapakamatay?

Tanong: "Ano ang Kristiyanong pananaw sa pagpapakamatay? Ano ang sinasabi ng Bibliya tungkol sa pagpapakamatay?"

Sagot: Ayon sa Bibliya, kung ang isang tao ay magpakamatay hindi ito ang magdedetermina kung makakapasok ba siya sa langit. Kung ang isang hindi mananampalataya ay nagpakamatay, wala siyang ginawa kundi ang padaliin ang kanyang pagpunta sa lawa ng apoy. Gayon man, ang taong nagpakamatay ay sa kahuli-hulihan mapupunta sa impiyerno dahil sa pagbalewala sa kaligtasang ibinibigay ni Kristo, at hindi dahil sa siya ay nagpakamatay. Binanggit ng Bibliya ang apat na partikular na mga tao na nagpakamatay: Saul (1 Samuel 31:4), Ahithophel (2 Samuel 17:23), Zimri (1 Hari 16:18), at Judas (Mateo 27:5). Bawat isa sa kanila ay masama, maysa-diyablo, at makasalanang tao. Tinitingnan ng Bibliya ang pagpapakamatay bilang kapantay ng pagpatay ng tao – dahil ito’y pagpatay sa sarili. Ang Diyos lamang ang nagdedesisyon kung kailan at paano mamamatay ang isang tao. Kung kukunin mo ang kapangyarihan na iyon at ilalagay mo sa iyong mga kamay, ayon pa sa Bibliya, ito’y isang pagkutya sa Diyos.

Ano ba ang sinasabi ng Bibliya sa isang Kristiyano na nagpakamatay? Hindi ako naniniwala na kung ang isang Kristiyano ay nagpakamatay, mawawala ang kanyang kaligtasan at mapupunta siya sa impiyerno. Itinuturo ng Bibliya na sa sandaling ang isang tao ay tapat na nanampalataya kay Kristo, siya ay may walang hanggang seguridad (Juan 3:16) Ayon pa sa Bibliya, malalaman ng mga Kristiyano na walang pagdududang mayroon na silang buhay na walang hanggan anuman ang mangyari. “Ang mga bagay na ito ay isinulat ko sa inyo na nananampalataya sa pangalan ng Anak ng Diyos, upang malaman ninyo na mayroon na kayong buhay na walang hanggan, upang magpatuloy kayo sa pananampalataya sa pangalan ng Anak ng Diyos” (1 Juan 5:13). Walang sinuman ang makapaghihiwalay sa isang Kristiyano mula sa pagmamahal ng Diyos! “Sapagkat natitiyak kong ang kamatayan, ang buhay, ang mga anghel, ang mga pamunuan, ang mga bagay sa kasalukuyan, ang mga bagay na darating, ang mga kapangyarihan, ang kataasan, ang kalaliman o alinmang nilalang ay hindi makapaghihiwalay sa atin sa pag-ibig ng Diyos sa pamamagitan ni Kristo Hesus na ating Panginoon (Romans 8:38-39).” Kung walang nilalang ang makapaghihiwalay sa isang Kristiyano mula sa pagmamahal ng Diyos, kahit na ang Kristiyanong nagpakamatay ay maituturing na “Nilalang,” samakatuwid kahit na ang pagpapakamatay ay hindi makapaghihiwalay sa kanya sa pagmamahal ng Diyos. Namatay si Hesus para sa lahat ng ating mga kasalanan…at kung ang isang totoong kristiyano ay nagpakamatay dahil sa isang atakeng espiritwal at kahinaan, isa iyon sa mga kasalanan na ikinamatay ni Hesus.

Hindi nito sinasabi na ang pagpapakamatay ay hindi seryosong kasalanan laban sa Diyos. Ayon sa Bibliya, ang pagpapakamatay ay pagpatay, ito ay palaging mali. Mayroon akong seryosong pagdududa kung totoo nga ba ang pananampalataya ng sinumang umaangking siya ay Kristiyano subalit siya ay nagpakamatay. Walang anumang sitwasyon ang makapagbibigay matuwid sa sinuman, lalong lalo na ang isang kristiyano, na kumitil sa kanyang sariling buhay. Ang mga Kristiyano ay tinawag upang isabuhay ang kanilang mga buhay para sa Diyos – ang desisyon kung kailan ka mamamatay ay tanging sa Diyos lamang. Maaaring ang isang magandang paraan para ilarawan ang pagpapakamatay para sa isang Kristiyano ay ang aklat ng Esther. Sa bansang Persia, mayroon silang batas na ang sinumang lalapit sa hari na hindi iniimbita ay maaaring patayin maliban na lang kung itututok niya ang kanyang baton sa iyo bilang simbolo ng pagkahabag. Ang pagpapakamatay para sa isang Kristiyano ay parang pinilit mong lumapit sa hari sa halip na maghintay na tawagin ka niya. Itututok niya ang kanyang baton sa iyo, at kinaawaan ang iyong buhay, subalit hindi ibig sabihin nito masaya siya dahil sa iyo. Kahit na hindi ito nagsasalarawan ng pagpapakamatay, ang talata sa Bibliya 1 Corinto 3:15 ay maaaring magandang paglalarawan sa kung ano ang mangyayari sa isang kristiyano na nagpakamatay: “Gayon man, maliligtas siya, lamang ay parang nagdaan sa apoy.”

Balik sa Tagalog Home Page