Ano ba ang kapalit na sakripisyo?

Tanong: "Ano ba ang kapalit na sakripisyo?"

Sagot: Ang “kapalit na sakripisyo” ay tumutukoy sa katotohanang si Hesus ay namatay bilang kapalit ng lahat ng mga makasalanan. Itinuturo ng Bibliya na ang lahat ng tao ay pawang mga makasalanan (basahin ang Roma 3: 9-18 at Roma 3: 23). Ang kaparusahan ng ating mga kasalanan ay kamatayan. Mababasa sa Roma 6: 23 ang, “Ito ay sapagkat ang kabayaran ga mga kasalanan ay kamatayan ngunit ang walang bayad na kaloob ng Diyos ay buhay na walang hanggan kay Kristo Hesus na ating Panginoon.”

Ang talatang yaon ay nagtuturo sa atin ng ilang mga bagay. Lahat tayo ay mamamatay at nakatakdang magdusa sa impiyerno ng walang hanggan bilang kabayaran ng ating mga kasalanan. Ang kamatayan sa Bibliya ay tumutukoy sa “pagkahiwalay”. Ang lahat ay mamamatay, subalit ang ilan ay mananahan sa langit kasama ang Panginoon, samantalang ang ilan naman ay mananahan sa impiyerno ng walang hanggan. Ang kamatayan na tinutukoy dito ay tungkol sa buhay sa impiyerno. Gayon man, ang pangalawang bagay na itinuturo sa atin ng talatang ito ay ang buhay na walang hanggan ay makakamtan natin sa pamamagitan ng ating Panginoong Hesu Kristo. Ito ang Kanyang “kapalit na sakripisyo.”

Si Hesu Kristo ay namatay bilang kapalit natin noong ipinako Siya sa krus. Mas karapatdapat tayong ipako sa krus na iyon sapagkat tayo’y namumuhay ng makasalanang buhay. Subalit inako ng Panginoon ang kaparusahan ng ating mga kasalanan. “Ito ay sapagkat Siya na hindi nagkasala ay ginawang kasalanan para sa atin upang tayo ay maging katuwiran ng Diyos sa Kaniya” (2 Corinto 5:21). Siya ang ating naging kapalit sa parusang karapatdapat sana na maranasan natin.

“Dinala Niya sa Kaniyang sariling katawan ang ating mga kasalanan sa ibabaw ng krus upang tayo na namatay sa kasalanan ay maging buhay sa katuwiran at dahil sa Kaniyang sugat kayo ay gumaling” (1 Pedro 2:24). Nakikita natin ulit dito na inako ni Kristo ang mga kasalanang nagawa natin at binayaran ito para sa ating kaligtasan. Ang ilan pang mga mga talata ay mababasa natin, “Dahil si Cristo man ay minsang nagdusa dahil sa kasalanan. Ang matuwid para sa mga hindi matuwid upang madala Niya tayo sa Diyos. Pinatay Siya sa laman ngunit binuhay Siya sa pamamagitan ng Espiritu” (1 Pedro 3:18). Hindi lamang itinuturo sa atin ng mga talatang ito na si Hesus ang ating naging “Kapalit”, subalit Siya rin ang “katubusan”, ibig sabihin sapat na ang Kanyang kamatayan bilang kabayaran sa kasalanan ng sangkatauhan.

Ang isa pang talata na tumatalakay sa “kapalit na sakripisyo” ay ang Isaias 53:5. ang talatang ito ay tumatalakay tungkol sa pagdating ni Kristo na mamatay sa krus para sa ating mga kasalanan, naka detalye ang lahat ng ito at ang pagpako sa krus ay totoong nangyari kagaya ng sinabi noong una pa man. Pansinin ang mga salita habang binabasa mo ito. “Dahil sa ating mga kasalanan kaya Siya nasugatan; Siya ay binugbog dahil sa ating kasamaan. Tayo ay gumaling dahil sa pahirap na tinamo Niya at sa mga hampas na Kanyang tinaggap.” Pansinin ang pagpapalit. Nakikita natin ulit dito na binayaran ni Kristo ang kaparusahan ng ating mga kasalanan!

Hindi natin kailanman mababayaran ang ating mga kasalanan kung tayo lang. O kung mababayaran man natin ito, paparusahan tayo at itatapon sa impiyerno at magdurusa tayo magpakailan pa man. Subalit kusang nagparito sa mundo si Hesu Kristo bilang Anak ng Diyos, para pagbayaran ang ating mga kasalanan. Dahil ginawa Niya ito para sa atin, nasa sa atin na ngayon ang oportunidad hindi lang para mapatawad tayo sa ating mga kasalanan, subalit mayroon na rin tayong oportunidad na na makasama ang ating Panginoon ng walang hanggan. Upang magawa natin ito kinakailangang ilagay natin ang ating pananampalataya sa ginawa ni Kristo sa krus. Hindi natin maililigtas ang ating mga sarili; kailangan natin ang kapalit para gawin iyon para sa atin.

Balik sa Tagalog Home Page