Ano ba ang ibig sabihin ng ang tao ay nilalang kagaya at ayon sa imahe ng Diyos (Genesis 1:26-27)?

Tanong: "Ano ba ang ibig sabihin ng ang tao ay nilalang kagaya at ayon sa imahe ng Diyos (Genesis 1:26-27)?"

Sagot: Sa huling araw ng paglalang, sinabi ng Diyos, “At sinabi ng Diyos, Lalangin natin ang tao sa ating larawan, ayon sa ating wangis: at magkaroon sila ng kapangyarihan sa mga isda sa dagat, at sa mga ibon sa himpapawid, at sa mga hayop, at sa buong lupa, at sa bawa't umuusad, na nagsisiusad sa ibabaw ng lupa” (Genesis 1:26). Tinapos ng Diyos ang kanyang trabaho ng may “personal na paghipo” Nilalang ng Diyos ang tao mula sa alabok at binigyan ito ng buhay sa pamamagitan ng Kanyang hininga (Genesis 2:7). Dahil dito, ang tao ay kakaiba kumpara sa iba pang mga nilalang ng Diyos, mayroon itong kapwa materyal (Katawan) at hindi materyal (Kaluluwa/Espiritu) na parte.

Ang pagkakaroon ng imahe o katangiang kagaya ng sa Diyos ay nangangahulugang, tayo ay nilalang kawangis ng Diyos. Hindi naging kawangis ni Adan ang Diyos sa paraang mayroon ring laman at dugo ang Diyos. Sinasabi ng Bibliya na ang “Diyos ay Espiritu” (Juan 4:24) samakatuwid siya’y umiiral ng walang katawan. Gayon man, ang katawan ni Adan ang sumasalamin sa buhay ng Diyos, noong ito’y nilalang ito’y nasa perpektong kalusugan at hindi mamatay.

Ang imahe ng Diyos ay tumutukoy sa hindi materyal na parte ng tao. Inihihiwalay nito ang tao mula sa mga mundo ng mga hayop, at iniangkop siya sa “pamamahala” ayon sa kagustuhan ng Diyos (Genesis 1:28), at binigyan siya ng kakayahang makipag-usap sa lumalang sa kanya. Ito’y pagkakahalintulad sa pag-iisip, moral at sosyal.

Ang tao ay nilalang ng may talino, sa ibang salita, mayroong kakayahang pumili at magdahilan. Ito ay sumasalamin sa katalinuhan at kalayaan ng Diyos. Sa anumang oras na ang isang tao ay maka-imbento ng isang bagay o makinarya, makapag-sulat ng libro, makapag-pinta ng isang obra, makapag-pangalan ng alagang hayop, pinoproklama niya ang katotohanang tayo ay ginawa ayon sa Kanyang imahe.

Sa paraang Moral, ang tao ay nilalang na may likas na pagsunod sa mabuti at perpektong pagkawalang-kasalanan, ito’y sumasalamin sa kabanalan ng Diyos. Nakita ng Diyos ang lahat ng Kanyang ginawa (kasali na ang tao) at tinawag itong “napaka-husay” (Genesis 1:31). Ang ating konsensiya ay isang indikasyon ng naturang orihinal na estado. Sa tuwing mayroong nagsusulat ng batas, umurong sa paggawa ng masama, pagpuri sa isang magandang ugali, o nakokonsensiya, kinukumpirma niya ang katotohanang nilalang tayo ayon sa imahe ng Diyos.

Nilalang ang tao para makipaghalubilo. Ito’y sumasalamin sa kalikasan ng Diyos at ng Kanyang pagmamahal. Sa hardin ng Eden, ang pangunahing relasyon ng tao ay tanging sa Diyos (Genesis 3:8 ay nagsasabi ng relasyon sa Diyos), at nilalang ng Diyos ang unang babae dahil “hindi mainam na mag-isa ang tao” (Genesis 2:18). Sa tuwing ang isang tao ay mag-aasawa, nagkakaroon ng kaibigan, dumadalo sa isang simbahan, ipinapakita lamang niya ang katotohanang nilalang tayo kawangis ng Diyos.

Ang parte ng paglalang sa atin kawangis ng Diyos ay nangangahulugang mayroong kakayahan si Adan na gumawa ng malayang pagpili. Kahit na binigyan siya ng mabuting kalikasan, gumawa si Adan ng masamang pagpili at nagrebelde siya laban sa lumalang sa kanya. Dahil dito, sinira ni Adan ang imahe ng Diyos sa kanyang sarili, at ipinasa niya ang naturang sirang imahe sa lahat ng kanyang mga anak, kasali na tayo (Roma 5:12). Ngayon, nananatili pa rin sa atin ang imahe ng Diyos (Santiago 3:9), subalit nananatili pa rin sa atin ang pilat ng kasalanan. Pag-iisip, moral, sosyal at pisikal, ipinapakita natin ang epekto.

Ang mabuting balita ay, sa panahong tinubos na ng Diyos ang isang tao, ibinalik Niya ang orihinal na imahe ng Diyos, ginawa Niya ang “ At kayo'y mangagbihis ng bagong pagkatao, na ayon sa Dios ay nilalang sa katuwiran at sa kabanalan ng katotohanan.” (Efeso 4:24; Tingnan din ang Colossas 3:10).

Balik sa Tagalog Home Page