Ano ba ang ikalawang pagparito ni Hesu Kristo?

Tanong: "Ano ba ang ikalawang pagparito ni Hesu Kristo?"

Sagot: Ang ikalawang pagparito ni Hesu Kristo ay ang pag-asa ng mga mananampalataya na ang Diyos ang may kapangyarihan sa lahat ng mga bagay, at Siya ay tapat sa Kanyang mga pangako at propesiya sa Kanyang salita. Sa Kanyang unang pagparito, naparito si Hesu Kristo sa mundo bilang isang sanggol sa sabsaban ng Betlehem, gaya ng nakasaad sa propesiya. Isinakatuparan ni Hesus ang karamihan sa mga propesiya tungkol sa Mesias sa panahon ng Kanyang kapanganakan, buhay, ministeryo, kamatayan at muling pagkabuhay. Gayon man, mayroong mga propesiya tungkol sa Mesias na hindi pa naisasakatuparan o nakatakda pang isakatuparan ni Hesus. Ang Ikalawang pagparito ni Kristo ay ang Kanyang pagbabalik sa mundo para isakatuparan ang mga natitira pang mga propesiya. Sa Kanyang unang pagparito, si Hesus ay ang nagdurusang tagapagsilbi. Sa Kanyang ikalawang pagparito, Siya ay isang Hari. Sa Kanyang unang pagparito, dumating Siya sa paraang napaka-mapagkumbabang paraan. Sa Kanyang ikalawang pagparito, darating si Hesus sa mundo na nasa tabi Niya ang mga sundalo ng kalangitan.

Hindi Binigyan ng mga Propeta sa Lumang Tipan ng pagkaka-iba ang dalawang pagbabalik ni Kristo. Maaari itong makita sa Kasulatan sa mga aklat ng Isaias 7:14; 9:6-7; at Zacarias 14:4. bilang resulta ng mga propesiya na tila tumutukoy sa dalawang katauhan, karamihan sa mga Hudyong iskolar ay naniniwalang mayroong dalawang Mesias ang nagdurusang Mesias at ang manlulupig na Mesias. Ang hindi nila naunawaan ay iisang Mesias lamang ang nakatakdang magsakatuparan ng lahat ng iyon. Isinakatuparan ni Hesus ang pagiging mapagtiis na tagapagsilbi (Isaias Kabanata 53) sa Kanyang unang pagparito. Isasakatuparan naman ni Hesus ang pagiging Hari at tagapagligtas ng Israel sa Kanyang muling pagparito. Ipinaliliwanag ng Zacarias 12:10 at Pahayag 1:7 ang ikalawang pagparito ni Hesus, tingnan muli si Hesus na pinaparusahan. Magdadalamhati ang Irsael, at ang buong mundo dahil sa hindi pagtanggap sa Mesias noong una itong pumarito sa mundo.

Matapos umakyat sa Langit si Hesus, idineklara ng mga Anghel sa mga Apostoles, "Mga taga-Galilea," sabi nila, "bakit kayo narito't nakatingala sa langit? Itong si Hesus na umakyat sa langit ay magbabalik tulad ng nakita ninyong pag-akyat Niya." (Gawa 1:11). Itinuturo ng Zacarias 14:4 ang bundok ng Olibo bilang lugar na kung saan mangyayari ang ikalawang pagparito. Idinedeklara ng aklat ng Mateo 24:30 ang, “Pagkatapos ay lilitaw sa langit ang tanda ng Anak ng Tao, at mananangis ang lahat ng bansa. Makikita nila ang Anak ng Tao na nasa alapaap, dumarating na may dakilang kapangyarihan at malaking karangalan.” Inilalarawan ng aklat ng Tito 2:13 ang muling pagbabalik ni Kristo bilang “ang dakilang Araw ng paghahayag sa ating dakilang Diyos at Tagapagligtas na si Hesu Kristo sa gitna ng Kanyang kaningningan.”

Ang Ikalawang pagparito ay napaka-detalyadong binabanggit sa aklat ng Pahayag 19: 11-16, v “Pagkaraan nito'y nabuksan ang langit, at nakita ko ang isang kabayong puti. Ang sakay nito'y tinatawag na Tapat at Totoo pagkat matuwid Siyang humatol at makidigma. Parang nagniningas na apoy ang Kanyang mga mata, at napuputungan Siya ng maraming korona. Nakasulat sa Kanyang katawan ang pangalan Niya, ngunit Siya ang tanging nakababatid ng kahulugan niyon. vTigmak ng dugo ang Kanyang kasuutan. "Salita ng Diyos" ang tawag sa Kanya. vSumusunod sa Kanya ang mga hukbong langit, na nakadamit ng malinis at puting lino at nakasakay rin sa mga kabayong puti. May lumabas na tabak sa kanyang bibig; gagamitin Niya itong panlupig sa mga bansa. At pamamahalaan Niya sila sa pamamagitan ng kamay na bakal at paaagusin mula sa pisaan ng ubas ang alak ng poot ng Diyos na Makapangyarihan sa lahat. vSa Kanyang kasuutan at sa Kanyang hita ay nakasulat ang pangalang "Hari ng mga hari at Panginoon ng mga panginoon."

Balik sa Tagalog Home Page

Ano ba ang ikalawang pagparito ni Hesu Kristo?