Ano ang mangyayari sa mga taong walang pagkakataong makarinig tungkol kay Hesus?

Tanong: "Ano ang mangyayari sa mga taong walang pagkakataong makarinig tungkol kay Hesus?"

Sagot: Ang lahat ng tao ay may pananagutan sa Diyos kahit na sila ay “nakarinig tungkol sa Kanya” o wala. Sinasabi sa atin ng Bibliya na malinaw na inihahayag ng Diyos ang Kanyang sarili sa kalikasan (Roma 1: 20) at sa mga puso ng tao (Mangangaral 3:11). Ang problema ay ang sangkatauhan ay makasalanan; hindi natin tinanggap ang kaalamang ito tungkol sa Diyos at tayo ay naghimagsik laban sa Kanya (Roma 1: 21-23). Kung hindi dahil sa grasya ng Diyos, hahayaan Niya tayo sa makasalanang pagnanasa ng ating mga puso, upang malaman natin kung gaaano kawalang-saysay at kahabag-habag ang buhay na malayo sa Kanya. Ito ay Kanyang ginagawa sa mga taong hindi tumanggap sa Kanya (Roma 1:24-32).

Ang katotohanan ay hindi totoong ang ilang mga tao ay hindi nakarinig ng anuman tungkol sa Diyos. Sa halip, ang problema ay hindi nila tinanggap ang kanilang narinig at ang kanilang nakita mula sa kalikasan. Sinasabi ng aklat ng Deuteronomio 4: 29 “Magkagayunman, masusumpungan ninyo muli si Yahweh kung Siya’y buong sikap at taimtim ninyong hahanapin.” Ang talatang ito ay nagtuturo ng napaka-importanteng prinsipyo: ang lahat ng taong totoong humahanap sa Diyos ay masusumpungan Siya. Kung ang tao ay tapat na nagnanasang makilala ang Diyos, magpapakilala ang Diyos sa Kanya.

Ang problema ay, “Walang sinumang nakakaunawa, walang sinu-mang humahanap sa Diyos.” (Roma 3:11). Hindi tinatanggap ng tao ang kaalaman tungkol sa Diyos na makikita sa kalikasan at sa kanilang mga puso, at sa halip nagdesisyon silang sumamba sa diyus-diyosan na sila mismo ang may gawa. Isang kahangalan upang pagdebatihan ang pagiging matuwid ng Diyos na siyang nagpadala sa isang tao sa impiyerno na hindi nagkaroon ng pagkakataon na marinig ang Ebanghelyo ni Kristo. Ang mga tao ay responsable sa Diyos sa kung ano ang inihayag na ng Diyos sa kanila. Sinasabi ng Bibliya na hindi tinanggap ng mga tao ang ganitong kaalaman, samakatuwid ang Diyos ay matuwid sa pagparusa sa kanila sa impiyerno.

Sa halip na pagdebatihan ang kapalaran ng mga taong hindi nakarinig ng anuman tungkol sa Diyos, tayo, bilang mga Kristiyano, ay dapat ginagawa ang lahat ng ating makakaya upang marinig nila ang Ebanghelyo ng Diyos. Tayo ay tinawag upang ipaalam ang Ebanghelyo sa lahat ng mga bansa (Mateo 28:19-20; Mga Gawa 1:8). Ang katotohanang alam natin na ang mga tao ay hindi tinatanggap ang kaalaman tungkol sa Diyos na inihahayag ng kalikasan ay ang siyang magbuyo sa atin na iproklama ang mabuting balita ng kaligtasan sa pamamagitan ni Kristo. Sa pamamagitan lamang ng pagtanggap sa Ebanghelyo ng grasya ng Diyos sa Panginoong Hesu Kristo, ang tao ay maliligtas sa kanilang mga kasalanan at masasagip sa walang hanggang kaparusahan sa impiyerno.

Kung ating ipinapalagay na ang yaong hindi kailanman nakarinig ng Ebanghelyo ay pinagkalooban ng awa mula sa Diyos, magkakaroon tayo ng malaking problema. Kung ang mga taong hindi nakarinig ng Ebanghelyo ay naligtas…sisiguruhin nating walang sinumang makarinig ng Ebanghelyo. Ang pinakamasama pang magagawa natin ay ibabahagi natin ang ebanghelyo sa ibang tao at sasabihin nating huwag itong tanggapin. Kung iyan ang mangyayari, siya ay mahahatulan. Ang mga taong hindi nakarinig ng Ebanghelyo ay dapat hatulan, dahil kung hindi walang ng motibo para sa pagpapalaganap at pagbabahagi ng Ebanghelyo ng Diyos.

Balik sa Tagalog Home Page