Totoo ba ang Diyos? Papaano ako lubos na makakasiguro na totoo ang Diyos?

Tanong: "Totoo ba ang Diyos? Papaano ako lubos na makakasiguro na totoo ang Diyos?"

Sagot: Alam natin na totoo ang Diyos sapagkat inihayag Niya ang Kanyang sarili sa tatlong paraan: Una, Sa kanyang mga nilalang. Pangalawa, Sa Kanyang salita at pangatlo, Sa Kanyang anak na si Hesu Kristo.

Ang pinakasimpleng patunay na totoo ang Diyos ay, ang Kanyang mga ginawa. “Mula pa nang likhain Niya ang sanlibutan, ang kalikasang di nakikita, ang kanyang walang hanggang kapangyarihan at pagka-Diyos ay maliwanag na inihahayag ng mga bagay na ginawa Niya. Kaya't wala na silang maidadahilan.” (Roma 1:20) " Ang langit ay naghahayag na ang Diyos ay dakila! Malinaw na nagsasaad kung ano ang kanyang gawa (Awit 19:1)!

Kung makakakita ako ng isang relo sa gitna ng bukid, hindi ko iisipin na ang naturang bagay ay lumitaw na lang ng kusa at wala itong pinagmulan o di kaya ang naturang relo ay nandoon na sa simula't simula pa. Base sa disenyo ng relo, iisipin kong mayroon talagang nagdisenyo dito. Subalit nakikita kong napakalayo ng kaibahan ng disenyo at pagkakatugma ng ating mundo kumpara sa relo. Ang sukat ng ating panahon ay hindi nakabase sa relong ating isinusuot, kung hindi nakabase ito sa gawa at kagustuhan ng Diyos, tulad ng regular na pag-ikot ng mundo. Ang buong sandaigdigan ay isang napakalaking disenyo at dahil dito, ito rin ay nangangailangan ng isang Dakilang manlilikha.

Kung makakakita ako ng isang mensaheng nakasulat sa pamamagitan ng simbolo, hahanap ako ng isang taong may kakayahang magbasa nito upang tulungan akong maunawaan ang nakatagong mensahe. Iisipin kong ang pinagmulan at ang sumulat ng naturang mensahe ay napakatalinong tao. Gaano ba kasalimuot ang "DNA Code" na dinadala natin sa bawat parte ng ating katawan? Hindi ba't ang pagka-komplikado at pagka-salimuot ng ating DNA ay nangangailangan din ng isang napakatalinong Maylikha?

“Iniangkop Niya ang lahat ng bagay sa kapanahunan. Ang tao'y binigyan Niya ng pagnanasang alamin ang bukas ngunit hindi binigyan ng pagkaunawa sa ginawa ng Diyos mula sa pasimula hanggang sa wakas.”(Mangangaral 3:11)

Likas sa tao ang persepsiyon na mayroon pang mas higit sa buhay kaysa sa nakikita lang ng mata, na mayroon pang buhay na mas mataas kaysa sa nakagawian na natin dito sa mundo. Ang ating pandama sa mga bagay na walang hanggan ay nakikita sa dalawang paraan: paggawa ng batas at pagsamba.

Ang bawat nakaraang sibilisasyon ay mayroong pinapahalagahang mga moral na batas, na nakapagtatakang kapareha ng iba't ibang mga kultura. Kagaya halimbawa ng; ang pagmamahal ay pinupuri sa buong mundo samantalang kinokondena naman sa buong sandaigdigan ang pagsisinungaling. Ang naturang magkaparehang moralidad, ang pandaigdigang kaalaman sa pagitan ng tama at mali ay nagtuturo lamang sa isang Dakilang Manlilikha na nagbigay sa atin ng naturang kaalaman.

Sa parehong dahilan ang lahat ng tao sa buong mundo, anuman ang kultura ay palaging may iniingatang sistema ng pagsamba. Maaaring magkaiba ang sentro ng kanilang sinasamba subalit ang kaalamang mayroong mas Makapangyarihan sa lahat ay hindi maipagkakailang parte ng pagiging tao. Ang ating pagnanais na sumamba ay kasundo ng katotohanang ginawa tayo ng Diyos hango sa kanyang larawan (Genesis 1: 27).

Inihayag din ng Diyos ang Kanayang sarili sa pamamagitan ng Kanyang salita, Ang Bibliya. Sa buong Bibliya ang katotohanan ng Diyos ay tinatratong tumpak na katotohanan. (Genesis 1:1, Exodo 3:14) Nang isulat ni Benjamin Franklin ang kanyang talambuhay, hindi niya sinayang ang kanyang oras para patotohanan na siya ay totoo at siya ay nabubuhay. Kagaya nito, hindi rin nagsayang ng panahon ang Diyos para patotohanan na Siya ay totoo sa kanyang aklat. Ang katangian ng bibliya na magbago ng buhay ng tao, ang kanyang integridad at ang mga milagrong kasama sa isinulat ay sapat ng dahilan para pagtuunan ito ng pansin.

Ang ikatlong paraan kung saan inihayag ng Diyos ang Kanyang sarili ay sa pamamagitan ng Kanyang Anak na si Hesus.( Juan 14:6-11) “Sa pasimula pa’y naroon na ang Salita. Kasama ng Diyos ang Salita at ang Salita ay Diyos…Naging tao ang Salita at Siya’y nanirahan sa piling natin.” (Juan 1:1,14) “Sapagkat ang buong kalikasan ng Diyos ay na kay Kristo nang Siya’y maging tao” (Colosa 2:9).

Sa buhay ni Hesus, perpekto Niyang nasunod ang buong batas ng lumang tipan at natupad ang mga propesiya na may kinalaman sa Mesiya.(Mateo 5:17) Gumawa din si Hesus ng di mabilang na pagtulong sa kapwa at mga milagro upang patotohanan ang Kanyang mensahe at patunayan ang Kanyang pagiging banal. (Juan 21:24-25) Matapos ang tatlong araw nang Siya’y ipako sa krus, bumangon Siya mula sa libingan, isang katotohanang pinatunayan ng daan daang mga nakasaksi (1 Corinto 15:6) Ang mga tala ng nakaraan ay nag-uumapaw sa mga katibayan kung sino talaga si Hesus. Ayon pa kay Apostol Pablo, ang bagay na ito ay hindi ginawa lamang sa isang sulok (Gawa 26:26).

Ating Napagtanto na mayroon talagang mga taong nagdududa at may mga sariling ideya tungkol sa Diyos. “Wala namang Diyos!” ang sabi ng hangal, ito ang palagi nilang katuwiran; kaya naman ngayon ang kanilang buhay, kakila-kilabot at kasuklam-suklam; Masasamang gawa’y kanilang libangan, wala nang matuwid wala ni isa man.” (Awit 14:1) Subalit ang lahat ay mauuwi lahat sa pananampalataya. “At hindi kinalulugdan ng Diyos ang hindi nananalig sa Kanya. Sapagkat ang sinumang lumalapit sa Diyos ay dapat maniwalang may Diyos, at Siya ang nagbibigay ng gantimpala sa mga humahanap sa Kanya” (Hebreo 11:6)

Balik sa Tagalog Home Page