Ang Diyos ba ay buhay? May katibayan ba na magpapatunay na ang Diyos ay buhay?

Tanong: "Ang Diyos ba ay buhay? May katibayan ba na magpapatunay na ang Diyos ay buhay?"

Sagot: Nakikita ko na binibigyan ng malaking pansin ang usapin tungkol sa katanungang "Ang Diyos ba ay buhay?” Lumabas sa pinakahuling pagsusuri, na higit sa 90% porsiyento ng populasyon ng tao ay naniniwala na mayroong Diyos o isang Nilalang na higit na Makapangyarihan sa lahat. Gayon pa man, tila nakaatang na sa balikat ng mga naniniwala sa Diyos ang pagpapatunay na ang Diyos nga ay buhay. Gayon pa man, talagang hindi ganap na mapapatunayan at lalong hindi mapapabulaanan na ang Diyos ay buhay. Ayon sa Banal na Kasulatan, kailangan nating tanggapin ang katotohanang ang Diyos ay buhay sa pamamagitan ng pananampalataya, "At hindi kinalulugdan ng Diyos ang hindi nananalig sa Kanya. Sapagkat ang sinumang lumalapit sa Diyos ay dapat maniwalang may Diyos, at Siya ang nagbibigay ng gantimpala sa mga humahanap sa Kanya"(Hebreo 11:6).

Kung nanaisin lamang ng Diyos, walang kahirap-hirap para sa Kanya na patunayan na Siya nga ay buhay. Subalit kung gagawin Niya iyan, wala nang saysay ang pananampalataya ng tao. "Sinabi sa kanya ni Hesus, 'Naniniwala ka na ba sapagkat nakita mo Ako? Mapapalad ang mga naniniwala kahit hindi nila Ako nakikita'." (Juan 20:29)

Hindi iyan nangangahulugan na wala nang katibayan ang pagiging buhay ng Diyos. Idineklara ng Banal na Kasulatan, "Ang langit ay naghahayag na ang Diyos ay dakila! Malinaw na nagsasaad kung ano ang Kanyang gawa! Bawat araw, bawat gabi, ang ulat ay walang patlang, patuloy na nag-uulat sa sunod na gabi't araw. Walang tinig o salitang ginagamit kung sabagay, at wala ring naririnig na kahit anong ingay; Gayon pa man, sa daigdig ay laganap yaong tinig, ang balita'y umaabot sa duluhan ng daigdig"(Awit 19:1-4). Tingalain natin ang mga tala, tantuin natin ang kalawakan, masdan natin ang kamangha-manghang kalikasan, sulyapan natin ang kagandahan ng takipsilim - ang lahat ng ito ay nagtuturo tungo sa Diyos na Lumikha. Dagdag pa rito ay ang katibayan ng Diyos na nasa kaibuturan ng ating puso. Sinasabi sa aklat ng Mangangaral 3:11, "Iniangkop Niya ang lahat ng bagay sa kapanahunan, ang tao'y binigyan Niya ng pagnanasang alamin ang bukas...". Narito sa kaibuturan ng ating puso ang pagkilala na mayroong mga bagay na nakahihigit kaysa kalagayan ng kasalukuyang buhay at mayroong mas higit na Makapangyarihan sa lahat. Sa isip lamang ay maaari nating balewalain ang kaalamang ito, ngunit ang presensiya ng Diyos sa atin at sa pamamagitan natin ay palagi-ang naririto. Sa kabila ng lahat ng ito, may babala ang Banal na Kasulatan na mayroon pa ring iilan na itatatwa ang Diyos, "Ang sabi ng hangal sa kanyang puso, 'Wala namang Diyos'."(Awit 14:1). At sapagkat higit sa 90% ng tao sa kasaysayan, sa lahat ng kalinangan o kultura, sa lahat ng kabihasnan, at sa lahat ng lupalop ng daigdig, ay naniniwalang nabubuhay ang Diyos - nararapat lamang na mayroong isang simulain na siyang pinagmulan ng naturang paniniwala.

Para sa karagdagang pangangatuwiran maliban sa kapahayagan ng Banal na Kasulatan, mayroon ring mga lohikal na argumento: Una ay ang Ontolohikal na argumento. Ang pinakatanyag na anyo ng pangangatuwirang Ontolohikal ay gumagamit ng kaisipang ukol sa Diyos upang patunayan na ang Diyos ay buhay. Ito'y nagsisimula sa pagbibigay ng katuturan sa Diyos bilang "Siya, na wala nang hihigit pa ang maaaring maabot at mabuo ng isipan". Samakatuwid, pinapalagay, na ang may buhay ay tunay na nakahihigit kay sa walang buhay, kung kaya't ang pinakadakilang katauhan na naaabot at nabubuo ng kaisipan ay kailangan at nararapat na nabubuhay. Kung ang Diyos ay hindi buhay, samakatuwid hindi Siya ang pinakadakila na maituturing - ngunit iyan ay salungat sa mismong katuturan ng Diyos.

Ang ikalawang argumento ay ang Teleolohikal. Pinaniniwalaan nito na ang lantad na kahanga-hangang sanlibutan ay nagpapakita lamang na mayroong Dakila at Banal na Siyang nagdisenyo niyon. Halimbawa na lamang na kung ang sangkalupaan o daigdig ay naging napakalapit o di kaya ay napakalayo sa araw, hindi nito kakayaning itaguyod ang maraming nilalang na nabubuhay sa kasalukuyan. Kung ang mga elemento sa himpapawid ay naiba kahit kaunting porsiyento lamang, bawat bagay sa kalikasan na nabubuhay ay hindi mananatiling buhay. Ang di-karaniwan at di-inaasahang pagkakataon na magkaroon ng hugis ang isang molekula ng protina ay isa(1) sa sampu(10) na sinundan ng 243 0's. Ang isang selula ay naglalaman ng milyon-milyong molekula ng protina.

Ang ikatlong argumento ay ang tinatawag na Kosmolohikal. Ang bawat kinalalabasan, epekto, o bunga ng anumang pangyayari ay may pinag-ugatan, sanhi, o pinagmulan. Ang sanlibutan at bawat bagay sa kalikasan na naririto ay mga epekto. Nararapat lamang at kailangan na mayroong isang panimula at sanhi ng kapanatilihan ng mga ito. Sa dulo't kahuli-hulihan, kailangan na mayroong "Walang-pinagmulan at Walang-hangganan" upang sa ganon ay magkaroon ng kapanatilihan ang lahat ng naririto. Iyang "Walang-pinagmulan at Walang-hangganan" ay ang Diyos.

Ang ika-apat na pangangatuwiran ay ang Moral. Ang bawat kalinangan o kultura sa kabuuan ng kasaysayan ay may pinagbatayang batas. Ang bawat isa ay may kamalayan kung ano at alin ang tama o mali. Ang pumatay, magsinungaling, magnakaw, at kalaswaan ay iwinawaksi at di katanggap-tanggap ng halos lahat ng tao sa buong mundo. Saan at kanino nagmula ang kamalayan at kaalaman kung ano at alin ang tama o mali kung hindi sa Banal na Diyos?

Sa kabila ng lahat ng ito, sinasabi sa Banal na Kasulatan na tatanggihan pa rin ng tao ang malinaw at di-maitatatuwang kaalaman tungkol sa Diyos at sa halip ay paniniwalaan ang kasinungalingan. Idineklara sa Roma 1:25 na, "Tinalikdan nila ang katotohanan tungkol sa Diyos at pinalitan ng kasinungalingan. Sinamba nila at pinaglingkuran ang nilalang sa halip na ang Lumalang na Siyang dapat papurihan magpakailanman! Amen". Ipinahahayag din ng Banal na Kasulatan na walang dahilan ang tao para hindi paniwalaan ang Diyos, "Mula pa nang likhain Niya ang sanlibutan at ang kalikasang di-nakikita, ang Kanyang walang hanggang kapangyarihan at pagka-Diyos ay maliwanag na inihahayag ng mga bagay na ginawa Niya. Kaya't wala na silang maidadahilan"(Roma 1:20).

Inangkin ng mga tao ang hindi maniwala sa Diyos sa dahilang wala di-umano itong "Siyentipikong katibayan". Ang tunay na katuwiran ay kapag tinanggap ng tao na may Diyos, nakaakibat dito ang kanilang pananagutan sa Kanya, at ang pangangailangan nila ng kapatawarang nagmumula sa Diyos (Roma 3:23; 6:23). Kung ang Diyos ay buhay, samakatuwid ay pananagutan natin sa Kanya ang mga ginagawa natin. Ngunit, kung hindi totoong may Diyos, magagawa natin ang anumang ating nanaisin na wala tayong pag-aalala na tayo ay hahatulan. Kung kaya't naniniwala ako na ganon na lamang ang pagtangkilik ng maraming tao sa lipunan sa itinuturo ng teoriyang ebolusyon - upang bigyan ang mga tao ng mapagpipilian sa paniniwala sa Diyos na Lumikha.

Ang Diyos ay buhay, at sa kahuli-hulihan ang bawat isa ay maniniwala na may Diyos. Sa pagtatangka ng marami na pabulaanan ang pagiging buhay ng Diyos, pinatutunayan lamang ng kanilang pangangatuwiran na may Diyos.

Pahintulutan ninyo ang isa pa at huling pangangatuwiran na ang Diyos ay buhay. Paano ko malalaman na buhay ang Diyos? Alam kong buhay ang Diyos sapagkat kinakausap ko Siya bawat araw. Hindi ko naririnig ang tinig ng Kanyang pangungusap sa akin ngunit nadarama ko ang Kanyang presensiya, nararamdaman ko ang Kanyang paggabay, batid ng puso ko ang pag-ibig Niya, minimithi ko ang pagpapala Niya. Maraming mga kaganapan sa buhay ko na ang tanging kapaliwanagan lamang ay wala nang iba pa maliban sa Kalooban ng Diyos. Isang himala na niligtas at binago ng Diyos ang buhay ko, na hindi ko magagawang di Siya kilalanin at papurihan. Alin man sa mga pangangatuwirang ito ay hindi makahihikayat sa kanino mang umaayaw sa malinaw na pagpapaliwanag. Sa katapusan, ang pagiging buhay ng Diyos ay dapat at kailangang tanggapin sa pamamagitan ng pananampalataya (Hebreo 11:6). Ang pananalig at pagsampalataya sa Diyos ay hindi pikit-matang paglundag sa kadiliman, ito'y ligtas at di-mapanganib na hakbang tungo sa maliwanag na silid kung saan naroon ang mga taong nakatanggap ng kaligtasan.

Balik sa Tagalog Home Page