Paano ako magiging matuwid sa paningin ng Dios?

Tanong: "Paano ako magiging matuwid sa paningin ng Dios?"

Sagot: Para maging matuwid sa paningin ng Dios kinakailangan muna nating tanggapin na makasalanan tayo. Ayon sa salita ng Dios, “Ang lahat ay naligaw ng daan, at naging makasalanan. Walang gumagawa ng mabuti, wala kahit isa man lang” (Mga Awit 14:3). Sumuway tayo sa mga utos ng Dios; ang katulad natin ay “parang mga tupang naligaw” (Isaiah 53:6).

Kamatayan ang hatol ng Dios para sa ating mga nagkasala. “Ang taong nagkasala ay mamamatay” (Ezekiel 18:4). Ngunit may magandang balita - hindi tayo pinabayaan ng mapagmahal na Dios dahil gumawa siya ng paraan para mabigyan tayo ng kaligtasan. Ipinahayag ni Jesu-Cristo na ang kanyang layuni’y “hanapin at iligtas ang naliligaw” (Lucas 19:10). Habang nakapako sa krus si Jesus, sinabi niya ang mga katagang “naganap na” (Juan 19:30) bilang patunay sa tagumpay ng kanyang layuning iligtas tayong lahat sa kamatayan.

Para magkaroon tayo ng magandang relasyon sa Dios, kailangang aminin natin na nagkasala tayo sa kanya. Magpakumbaba tayo at ipahayag ang ating mga kasalanan sa Dios. At magpasya rin tayong talikuran ang ating mga kasalanan (Isaiah 57:15 at Roma 10:9, 10).

Ang pagsisisi ay dapat may kasamang pananampalataya na namatay si Jesus at muling nabuhay para maging tunay na tagapagligtas natin. Sinasabi sa Roma 10:9, “Kung ipapahayag ng iyong labi na si Jesus ay Panginoon at mananalig ka nang buong puso na siya’y muling binuhay ng Dios, maliligtas ka.” Marami pang ibang talata ang nagsasabi na kailangan ang pananampalataya katulad ng nasa Juan 20:27; Mga Gawa 16:31; Galacia 2:16; 3:11, 26; at Efeso 2:8.

Ang hangad nating maging matuwid sa paningin ng Dios ay tamang hakbang sa ating pagkilala sa lahat ng ginawa niya para sa atin. Ipinadala niya ang Tagapagligtas na siyang naging handog para maalis ang ating mga kasalanan (Juan 1:29), at nangako siya, “Ang sinumang tatawag sa Panginoon ay maliligtas” (Mga Gawa 2:21).

Isang magandang halimbawa ng pagsisisi at kapatawaran ay ang kuwento tungkol sa alibughang anak (Lucas 15:11-32). Ginastos nang ginastos ng bunsong anak ang kayamanang ipinamana sa kanya ng kanyang ama sa ‘di wastong pamumuhay. Nang mapag-isipan niyang nagkamali siya, nagpasya siyang umuwi. Sa kanyang palagay hindi na siya karapat-dapat na ituring na anak, ngunit nagkamali siya. Mahal pa rin pala siya ng kanyang ama sa kabila ng kanyang pagiging rebelde. Lubusan siyang pinatawad, at nagkaroon pa ng handaan.

Maaasahan ang Dios sa kanyang mga pangako, pati na ang pangakong patatawarin niya tayo. Ang sabi sa Mga Awit 34:18, “Malapit ang Panginoon sa mga taong bagbag ang puso, at tinutulungan niya ang mga nawalan na ng pag-asa.”

Kung gusto mong maging matuwid sa paningin ng Dios, narito ang isang panalangin na maaari mong ipanalangin. Alalahanin mong ang pagbigkas ng panalanging ito ay hindi makapagliligtas sa iyo. Tanging ang iyong pananampalataya at pagtitiwala kay Jesus ang makapagliligtas sa iyo. Ang panalanging ito ay isang simpleng pagpapahayag sa Dios ng iyong pananampalataya sa Kanya at pagpapasalamat sa kaligtasang ibinigay sa iyo. “O Dios, alam kong nagkasala ako sa iyo at nararapat lamang na parusahan mo ako. Ngunit inako ni Jesus ang aking kasalanan at tiniis ang parusang ipinataw mo sa akin. Patawarin mo ako sa aking mga kasalanan. Tinatanggap kita bilang aking Dios at tagapgaligtas. Salamat po sa iyong kahanga-hangang biyaya at kapatawaran. At salamat din sa buhay na walang hanggan. Amen!”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page